ജയിൽചാട്ടം: ഉദ്യോഗസ്ഥർക്ക് വീഴ്ച സംഭവിച്ചു; ജസ്റ്റിസ് എൻ രാമചന്ദ്രൻ നായർ

കണ്ണൂർ: (KVARTHA) ഗോവിന്ദച്ചാമിയുടെ ജയിൽചാട്ടത്തിൽ ഉദ്യോഗസ്ഥർക്ക് വീഴ്ച സംഭവിച്ചതായി അന്വേഷണ സംഘം. രണ്ടംഗ അന്വേഷണ സംഘത്തിലെ അംഗമായ ജസ്റ്റിസ് സി.എൻ. രാമചന്ദ്രൻ നായർ കണ്ണൂരിൽ മാധ്യമങ്ങളോട് സംസാരിക്കുകയായിരുന്നു. ഗോവിന്ദച്ചാമിയുടെ ജയിൽചാട്ടത്തിൽ പ്രഥമദൃഷ്ട്യാ കണ്ണൂർ ജയിൽ ഉദ്യോഗസ്ഥർക്ക് വീഴ്ച സംഭവിച്ചതായി അദ്ദേഹം പറഞ്ഞു.

ജയിൽചാട്ടത്തിനായി ദിവസങ്ങൾ നീണ്ട തയ്യാറെടുപ്പ് ഗോവിന്ദച്ചാമി നടത്തിയിട്ടും ഡ്യൂട്ടിയിലുണ്ടായിരുന്നവർക്ക് അത് കണ്ടെത്താൻ സാധിച്ചില്ല. സെല്ലിന്റെ കമ്പി മുറിക്കാൻ ഉപയോഗിച്ച ആയുധത്തിൽ അവ്യക്തതയുണ്ട്. പൊലീസ് കണ്ടെടുത്ത ആയുധം ഉപയോഗിച്ച് കമ്പി മുറിക്കുന്നത് എളുപ്പമല്ലെന്നും അദ്ദേഹം കൂട്ടിച്ചേർത്തു.

കാലപ്പഴക്കം ചെന്ന സെല്ലുകൾ ജയിൽ സുരക്ഷയ്ക്ക് ഭീഷണിയാണ്. പലയിടങ്ങളിലും ജയിൽ ചുറ്റുമതിൽ തകർച്ചാഭീഷണിയിലാണ്. ജയിൽ ഉദ്യോഗസ്ഥർ ഇതെല്ലാം അറിഞ്ഞില്ല എന്നത് അത്ഭുതമാണെന്നും അദ്ദേഹം പറഞ്ഞു. 

രണ്ട് ദിവസമായി ജയിൽ സുരക്ഷ അന്വേഷിക്കാനെത്തിയ സംഘത്തിൽ മുൻ ഡി.ജി.പി. ജേക്കബ് പുന്നൂസുമുണ്ടായിരുന്നു. സംസ്ഥാനത്തെ മുഴുവൻ ജയിലുകളും സന്ദർശിച്ച് അന്വേഷണ സംഘം സർക്കാരിന് റിപ്പോർട്ട് സമർപ്പിക്കും.

മുഖ്യമന്ത്രിയുടെ നേതൃത്വത്തിൽ കഴിഞ്ഞ മാസം നടന്ന ജയിൽ സുരക്ഷാ അവലോകന യോഗത്തിലാണ് അന്വേഷണത്തിനായി രണ്ടംഗ സമിതിയെ സർക്കാർ നിയോഗിച്ചത്. ഇതേത്തുടർന്നാണ് രണ്ട് ദിവസത്തെ അന്വേഷണത്തിനായി സംഘം കണ്ണൂരിലെത്തിയത്. 

കണ്ണൂർ സെൻട്രൽ ജയിലിലെ അതീവ സുരക്ഷാ ബ്ലോക്കായ പത്തിലെ സെല്ലുകൾ ഉൾപ്പെടെ അന്വേഷണ സംഘം പരിശോധിച്ചു.

ഈ വിഷയത്തെക്കുറിച്ച് നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Investigation finds official negligence in Govindachami's jailbreak.

#Govindachami, #Jailbreak, #Kannur, #KeralaPolice, #PrisonReform, #Investigation