ബെംഗ്ളുറു: (KVARTHA) സ്വർണം കടത്തുന്നതിനിടെ കന്നഡ നടി രന്യ റാവു അറസ്റ്റിൽ. ബെംഗ്ളുറു അന്താരാഷ്ട്ര വിമാനത്താവളത്തിൽ നടന്ന നിർണായകമായ നീക്കത്തിൽ ഡയറക്ടറേറ്റ് ഓഫ് റവന്യൂ ഇന്റലിജൻസ് (ഡിആർഐ) ഉദ്യോഗസ്ഥരാണ് രന്യ റാവുവിനെ തിങ്കളാഴ്ച രാത്രി അറസ്റ്റ് ചെയ്തത്. ദുബൈയിൽ നിന്ന് എമിറേറ്റ്സ് വിമാനത്തിൽ എത്തിയ നടിയുടെ പക്കൽ നിന്ന് 14.8 കിലോ സ്വർണം പിടികൂടി.

രന്യ റാവുവിന്റെ ദുബൈയിലേക്കുള്ള പതിവ് യാത്രകൾ കാരണം ഡിആർഐ ഉദ്യോഗസ്ഥർ നടിയെ നിരീക്ഷിച്ചുവരികയായിരുന്നു. കർണാടകയിലെ ഒരു ഐപിഎസ് ഉദ്യോഗസ്ഥന്റെ അടുത്ത ബന്ധുവാണ് നടി. ഭൂരിഭാഗം സ്വർണവും വസ്ത്രത്തിനുള്ളിൽ ഒളിപ്പിച്ച നിലയിലായിരുന്നു. സ്വർണക്കട്ടികളും വസ്ത്രത്തിനുള്ളിൽ ഒളിപ്പിച്ചിരുന്നു.

പ്രാഥമിക അന്വേഷണത്തിൽ, വിമാനത്താവളത്തിൽ എത്തിയപ്പോൾ നടി ഡിജിപിയുടെ മകളാണെന്ന് അവകാശപ്പെട്ടതായി പറയുന്നു. തുടർന്ന്, ലോക്കൽ പൊലീസ് ഉദ്യോഗസ്ഥരെ വിളിച്ച് കൂട്ടിക്കൊണ്ടുപോകാൻ ആവശ്യപ്പെടുകയും, അവർ അറിയാതെ നടിയെ വീട്ടിൽ എത്തിക്കുകയും ചെയ്തു. ഈ ഉദ്യോഗസ്ഥർക്കോ ഐപിഎസ് ബന്ധുവിനോ ഇതിൽ എന്തെങ്കിലും പങ്കുണ്ടോ അതോ അവരെ തെറ്റിദ്ധരിപ്പിച്ചതാണോ എന്ന് ഡിആർഐ അന്വേഷിക്കുന്നുണ്ട്.

കഴിഞ്ഞ 15 ദിവസത്തിനുള്ളിൽ നടി നാല് തവണ ദുബൈയിലേക്ക് യാത്ര ചെയ്തതായി കണ്ടെത്തിയതിനെ തുടർന്നാണ് അധികൃതർക്ക് സൂചന ലഭിച്ചത്. അറസ്റ്റിന് ശേഷം നടിയെ ബെംഗളൂരുവിലെ എച്ച്ബിആർ ലേഔട്ടിലുള്ള ഡിആർഐ ആസ്ഥാനത്തേക്ക് കൊണ്ടുപോയി ചോദ്യം ചെയ്തു. ചൊവ്വാഴ്ച നടിയെ കോടതിയിൽ ഹാജരാക്കി. രന്യ റാവു ഒരു വലിയ സ്വർണക്കടത്ത് സംഘത്തിന്റെ ഭാഗമാണോ എന്നതടക്കം അന്വേഷിച്ച് വരികയാണ്. 

കന്നഡ സൂപ്പർസ്റ്റാർ സുദീപിനൊപ്പം 'മാണിക്യ' എന്ന സിനിമയിൽ അഭിനയിച്ച രന്യ റാവു മറ്റ് ദക്ഷിണേന്ത്യൻ സിനിമകളിലും അഭിനയിച്ചിട്ടുണ്ട്.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക 

Kannada actress Rani Rao was arrested for smuggling 14.8 kg of gold at Bengaluru International Airport. She had traveled to Dubai four times in the last 15 days.

#GoldSmuggling, #RaniRao, #ActressArrested, #BengaluruAirport, #DRI, #CrimeNews