കൊച്ചി: (KVARTHA) കളമശ്ശേരി പോളിടെക്നിക് കോളേജ് ഹോസ്റ്റലിൽ നടന്ന കഞ്ചാവ് കച്ചവടവുമായി ബന്ധപ്പെട്ട് കൂടുതൽ ഞെട്ടിക്കുന്ന വിവരങ്ങൾ പുറത്തുവന്നു. സംഭവത്തിൽ അറസ്റ്റിലായ മുഖ്യപ്രതിയും കൊല്ലം കരുനാഗപ്പള്ളി സ്വദേശിയുമായ അനുരാജ് ഹോസ്റ്റലിൽ കഞ്ചാവ് എത്തിച്ച് വിപണനം ആരംഭിച്ചിട്ട് ആറ് മാസമായെന്ന് പൊലീസ് കണ്ടെത്തി. ഇതിന് പിന്നിൽ പ്രവർത്തിച്ചത് ആഷിഖും ഷാലിഫുമാണെന്നും അനുരാജ് പൊലീസിനോട് പറഞ്ഞു.

ഏഴ് തവണ ഹോസ്റ്റലിൽ കഞ്ചാവ് എത്തിച്ചതായും സമ്മതിച്ചിട്ടുണ്ട്. അനുരാജ് നാല് കിലോഗ്രാം കഞ്ചാവ് വാങ്ങിയതായും എന്നാൽ ഇതിൽ രണ്ട് കിലോഗ്രാം മാത്രമാണ് ഇതുവരെ പൊലീസിന് കണ്ടെടുക്കാൻ കഴിഞ്ഞിട്ടുള്ളതെന്നും പൊലീസ് വൃത്തങ്ങൾ വ്യക്തമാക്കി. കാണാതായ രണ്ട് കിലോഗ്രാം കഞ്ചാവിനായുള്ള അന്വേഷണം പൊലീസ് ഊർജിതമാക്കിയിട്ടുണ്ട്. കഞ്ചാവ് വാങ്ങുന്നതിനായി അനുരാജ് ഗൂഗിൾ പേ വഴി 16,000 രൂപയും ബാക്കി തുക നേരിട്ടും കൈമാറിയതായി പൊലീസ് കണ്ടെത്തിയിട്ടുണ്ട്.

സ്ഥാപനത്തിലെ മുൻ വിദ്യാർത്ഥികളായ ആഷിഖ്, ഷാലിഫ് എന്നിവർക്കാണ് പണം നൽകിയതെന്ന് അനുരാജ് വെളിപ്പെടുത്തി. എന്നാൽ, എത്ര തുക ഇതുവരെ നൽകി, ആരൊക്കെയാണ് പണം നൽകിയത് എന്നതിനെക്കുറിച്ച് വ്യക്തമായ മറുപടി ലഭിച്ചിട്ടില്ല.  ഹോളി ആഘോഷത്തിന്റെ മറവിലാണ് അനുരാജ് കളമശ്ശേരി പോളിടെക്നിക്കിലേക്ക് കഞ്ചാവ് എത്തിക്കുന്നതിനായി പണം പിരിച്ചത്. എന്നാൽ, വ്യാപകമായ പണപ്പിരിവ് നടത്തിയിട്ടില്ലെന്നും കുറച്ചുപേർക്ക് മാത്രമാണ് കഞ്ചാവ് എത്തിച്ചതെന്നുമാണ് അനുരാജിന്റെ മൊഴി. 

ഈ മയക്കുമരുന്ന് കച്ചവടം കളമശ്ശേരി പോളിടെക്നിക് കോളജിൽ മാത്രം ഒതുങ്ങിനിൽക്കുന്നില്ലെന്ന് പൊലീസിന് സംശയമുണ്ട്. ഇതിന്റെ അടിസ്ഥാനത്തിൽ സമീപത്തുള്ള മറ്റ് കോളജുകളിലെ ഹോസ്റ്റലുകളിലേക്കും അന്വേഷണവും പരിശോധനയും വ്യാപിപ്പിച്ചിട്ടുണ്ട്. യു.പി.ഐ. വഴിയാണ് പണമിടപാടുകൾ നടത്തിയിട്ടുള്ളതിനാൽ, ഇതിൽ പങ്കാളികളായവരെ കണ്ടെത്താനായി അറസ്റ്റിലായ അനുരാജിന്റെയും മറ്റ് വിദ്യാർത്ഥികളുടെയും ബാങ്ക് സ്റ്റേറ്റ്മെന്റുകൾ പൊലീസ് പരിശോധിക്കും. 

ബാങ്കുകളിൽ നിന്ന് ലഭിക്കുന്ന വിവരങ്ങളിലൂടെ പണം നൽകിയവരെ തിരിച്ചറിയാനും, ഈ മയക്കുമരുന്ന് കച്ചവടവുമായി ബന്ധപ്പെട്ട എല്ലാവരെയും പിടികൂടാനുമുള്ള അന്വേഷണം ഊർജ്ജിതമാക്കാനാണ് പൊലീസ് ലക്ഷ്യമിടുന്നത്. ഇതുവരെ ഈ കേസിൽ ആറ് പേരെയാണ് പൊലീസ് അറസ്റ്റ് ചെയ്തിട്ടുള്ളത്. റിമാൻഡിൽ കഴിയുന്ന അനുരാജിനെ കസ്റ്റഡിയിൽ വാങ്ങി കൂടുതൽ ചോദ്യം ചെയ്യാനായി പൊലീസ് കോടതിയിൽ അപേക്ഷ നൽകും.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക.

Details have emerged in the Kalamassery Polytechnic ganja bust, revealing that the main accused, Anuraj, was trading cannabis in the hostel for six months, with transactions partly done via Google Pay. Police have recovered only 2 kg of the 4 kg he reportedly bought and are investigating further links and financial transactions.

#KalamasseryDrugs #HostelDrugTrade #GooglePayTransaction #KeralaPolice #DrugBust #UPIPayment