ഒടുവിൽ പൊലീസ് വലയിൽ! വീട്ടമ്മയെ ഉപദ്രവിച്ച കേസിൽ ഒളിവിൽ കഴിഞ്ഞിരുന്ന പ്രതി പിടിയിൽ

തിരുവനന്തപുരം: (KVARTHA) അയൽവാസിയായ വീട്ടമ്മയെ കയറിപ്പിടിച്ച് ഉപദ്രവിച്ച കേസിൽ ഒന്നര മാസമായി ഒളിവിൽ കഴിഞ്ഞിരുന്ന പ്രതിയെ തമ്പാനൂർ പൊലീസ് അറസ്റ്റ് ചെയ്തു. അനന്തുവിനെയാണ് (അച്ചു -27) തമ്പാനൂർ പൊലീസ് സംഘം പിടികൂടിയത്. 

ഒക്ടോബർ മാസത്തിലാണ് ഇയാൾ അയൽ വീട്ടിൽ അതിക്രമിച്ചു കയറി വീട്ടമ്മയെ ഉപദ്രവിച്ചതെന്നാണ് പൊലീസ് നൽകുന്ന വിവരം. സംഭവത്തിന് ശേഷം വിവിധ സ്ഥലങ്ങളിലായി ഒളിവിൽ കഴിഞ്ഞുവരികയായിരുന്നു ഇയാൾ.

പ്രതിക്കായുള്ള അന്വേഷണം ഊർജ്ജിതമാക്കിയിരുന്ന പൊലീസിന് ഇക്കഴിഞ്ഞ ദിവസം പുലർച്ചെ ഒന്നരയോടെ ഇയാൾ തൈക്കാട്ടുള്ള പെൺസുഹൃത്തിന്റെ വീട്ടിൽ എത്തിയതായി രഹസ്യവിവരം ലഭിച്ചു. തുടർന്ന് പൊലീസ് സംഘം സ്ഥലത്തെത്തി വീട് വളയുകയായിരുന്നു. 

പൊലീസിനെ കണ്ട പ്രതി ഓടി രക്ഷപ്പെടാൻ ശ്രമിച്ചെങ്കിലും പൊലീസ് പിന്നാലെ കൂടി. തന്നെ പിടികൂടാൻ ശ്രമിച്ച പൊലീസ് ഉദ്യോഗസ്ഥരെ കയ്യിലുണ്ടായിരുന്ന കത്തി ഉപയോഗിച്ച് ആക്രമിക്കാൻ ഇയാൾ ശ്രമിച്ചതായും പരാതിയുണ്ട്. തുടർന്ന് പൊലീസുകാർ ഇയാളെ ബലം പ്രയോഗിച്ച് കീഴ്പ്പെടുത്തുകയായിരുന്നു.

കരമന പൊലീസിന് നേരെ ബോംബെറിഞ്ഞ കേസിലും പൂജപ്പുര, തമ്പാനൂർ, പേട്ട, ശ്രീകാര്യം, വലിയതുറ എന്നീ സ്റ്റേഷനുകളിലെ വിവിധ ക്രിമിനൽ കേസുകളിലും അനന്തു പ്രതിയാണെന്ന് പൊലീസ് പറഞ്ഞു. കോടതിയിൽ ഹാജരാക്കിയ ഇയാളെ റിമാൻഡ് ചെയ്തു.

ഈ വാർത്ത ഷെയർ ചെയ്ത് മറ്റുള്ളവരിലേക്ക് എത്തിക്കൂ. 

Article Summary: Thampanoor police arrested a fugitive accused of molesting a woman and attacking police officers during the arrest.

#TrivandrumNews #ThampanoorPolice #PoliceArrest #CrimeNews #KeralaPolice #KeralaNews