കൊച്ചി: (KVARTHA) പാതിവില വാഗ്ദാനം നൽകി ഉപഭോക്താക്കളെ വഞ്ചിച്ച് കോടികൾ തട്ടിയ കേസിൽ മുഖ്യപ്രതി അനന്തു കൃഷ്ണനെ പൊലീസ് കസ്റ്റഡിയിൽ വിട്ടു. മൂവാറ്റുപുഴ അഡീഷണൽ സെഷൻസ് കോടതിയാണ് പ്രതിയെ രണ്ടു ദിവസത്തേക്ക് കസ്റ്റഡിയിൽ വിട്ടത്. ഏഴു ദിവസത്തെ കസ്റ്റഡി ആവശ്യപ്പെട്ട് ക്രൈംബ്രാഞ്ച് കോടതിയിൽ അപേക്ഷ സമർപ്പിച്ചിരുന്നു.

അനന്തു കൃഷ്ണൻ ഇതുവരെ 143.5 കോടി രൂപ തട്ടിയെടുത്തിട്ടുണ്ട് എന്നാണ് ക്രൈംബ്രാഞ്ചിന്റെ കസ്റ്റഡി അപേക്ഷയിൽ പറയുന്നത്. പ്രതിയുടെ 21 അക്കൗണ്ടുകളിലേക്ക് ഈ പണം ഒഴുകിയെത്തി. സംസ്ഥാനത്ത് 20,163 പേരിൽ നിന്ന് 60,000 രൂപ വീതവും 4035 പേരിൽ നിന്ന് 56,000 രൂപ വീതവുമാണ് തട്ടിയെടുത്തത് എന്നാണ് പൊലീസ് കണ്ടെത്തൽ.

അനന്തു കൃഷ്ണന്റെ സ്ഥാപനമായ സോഷ്യൽ ബീ വെഞ്ചേഴ്സിന്റെ പേരിലുള്ള 11 അക്കൗണ്ടുകൾ വഴി മാത്രം 548 കോടി രൂപ ലഭിച്ചതായി ക്രൈംബ്രാഞ്ച് കണ്ടെത്തിയിട്ടുണ്ട്. ഈ പണത്തിന്റെ ഉറവിടം കണ്ടെത്താനും കൂടുതൽ ആളുകൾ കേസിൽ ഉൾപ്പെട്ടിട്ടുണ്ടോയെന്ന് കണ്ടെത്താനും അന്വേഷണം ഊർജിതമാക്കിയിരിക്കുകയാണ്.

തിരഞ്ഞെടുപ്പിനും മറ്റുമായി രാഷ്ട്രീയ നേതാക്കൾക്ക് പണം കൈമാറിയെന്ന വിവരങ്ങളും പുറത്തുവന്നിട്ടുണ്ട്. ഈ ആരോപണങ്ങളെക്കുറിച്ചും അന്വേഷണം നടക്കുന്നുണ്ട്. എന്നാൽ ഇതുവരെയുള്ള അന്വേഷണത്തിൽ നാലേകാൽ കോടി രൂപ മാത്രമാണ് അനന്തു കൃഷ്ണന്റെ അക്കൗണ്ടിൽ നിന്ന് കണ്ടെത്താനായത്. കുറച്ച് ഇരുചക്രവാഹനങ്ങളും ലാപ്ടോപ്പുകളും വിതരണം ചെയ്തിട്ടുണ്ട്. 

കുറച്ചു ഭൂമിയും വാങ്ങിയിട്ടുണ്ട്. ബാക്കി തുക എങ്ങനെ വിനിയോഗിച്ചു എന്നതിനെക്കുറിച്ച് കൂടുതൽ വിവരങ്ങൾ ലഭ്യമല്ല. ഈ സാഹചര്യത്തിലാണ് വിശദമായ തെളിവെടുപ്പ് ആവശ്യമാണെന്ന് ക്രൈംബ്രാഞ്ച് വാദിക്കുന്നത്. കൂടുതൽ ചോദ്യം ചെയ്യലിലൂടെയും തെളിവെടുപ്പിലൂടെയും മാത്രമേ കൂടുതൽ വിവരങ്ങൾ ലഭ്യമാകൂ എന്ന് ക്രൈംബ്രാഞ്ച് അറിയിച്ചു.

ഈ വാർത്ത പങ്കുവെക്കുകയും അഭിപ്രായങ്ങൾ രേഖപ്പെടുത്തുകയും ചെയ്യുക 

Ananthukrishnan is in police custody for cheating billions by offering products at half-price. Investigations are ongoing to uncover the source of funds and possible political links.

#FraudCase #Ananthukrishnan #PoliceCustody #CheatingMillions #KochiNews #InvestigationOngoing