രേഖകളില്ലാതെ ജോലി ചെയ്ത 4 ബംഗ്ലാദേശി യുവതികൾ റിമാൻഡിൽ; സ്പാകളിൽ റെയ്ഡ് ശക്തമാക്കുമെന്ന് പൊലീസ്

കണ്ണൂർ: (KVARTHA) വിസയും പാസ്പോർട്ടുമില്ലാതെ കണ്ണൂരിൽ ജോലി ചെയ്ത നാല് ബംഗ്ലാദേശി യുവതികളെ കണ്ണൂർ കോടതിയിൽ ഹാജരാക്കി റിമാൻഡ് ചെയ്തു. രഹസ്യാന്വേഷണ വിഭാഗത്തിന് ലഭിച്ച വിവരത്തിന്റെ അടിസ്ഥാനത്തിൽ കണ്ണൂർ ടൗൺ പൊലീസാണ് ഇവരെ അറസ്റ്റ് ചെയ്തത്. കഴിഞ്ഞ ദിവസം മറ്റൊരു യുവതി കൂടി പിടിയിലായിരുന്നു. ഇതോടെ രണ്ടുദിവസത്തിനുള്ളിൽ കണ്ണൂരിൽ അറസ്റ്റിലാകുന്ന ബംഗ്ലാദേശികളുടെ എണ്ണം അഞ്ചായി.

നസ്മ അഖ്തർ (40), കെ. തസ്ലിമ (25), കെ. മൊയ്ന (29), നസ്‌റിൻ ബീബി (28) എന്നിവരാണ് അറസ്റ്റിലായത്. കണ്ണൂർ നഗരത്തിലെ താണയിലെ ക്വാർട്ടേഴ്സിൽ താമസിച്ച് നഗരത്തിലെ ഒരു സ്പാ മസാജ് സെന്ററിൽ ജോലി ചെയ്യുകയായിരുന്നു ഇവർ.

അതിർത്തി കടത്താൻ വൻ മാഫിയ; നിർമിക്കുന്നത് വ്യാജ രേഖകൾ

ബംഗ്ലാദേശിൽനിന്ന് ഇന്ത്യയുടെ വിവിധ ഭാഗങ്ങളിലേക്ക് യുവതികളെ എത്തിക്കാൻ സംസ്ഥാനത്തും പുറത്തും വലിയ ഏജൻസികൾ പ്രവർത്തിക്കുന്നുണ്ടെന്ന് പൊലീസ് അന്വേഷണത്തിൽ വ്യക്തമായിട്ടുണ്ട്. ബംഗ്ലാദേശിൽനിന്ന് ഇവരെ അതിർത്തി കടത്താൻ പ്രത്യേകം ഏജന്റുമാരുണ്ട്. നേരെ പശ്ചിമബംഗാളിലേക്കാണ് ഇവർ ആദ്യം എത്തുന്നത്. ,അവിടെവെച്ച് ഫോട്ടോയെടുത്ത് വ്യാജ ആധാർ കാർഡും മൊബൈൽ സിം കാർഡും സംഘടിപ്പിക്കും. തുടർന്നാണ് കേരളം ഉൾപ്പെടെയുള്ള വിവിധ സംസ്ഥാനങ്ങളിലേക്ക് ജോലിക്കായി യാത്രതിരിക്കുന്നത്.

എവിടെയെങ്കിലും പൊലീസ് പരിശോധനയുണ്ടായാൽ ആധാർ കാർഡിലെ ഫോട്ടോയും കണ്ണിലെ കൃഷ്ണമണിയും പരിശോധിച്ചാൽ രേഖയിലുള്ള ആൾ തന്നെയാണെന്ന് ബോധ്യപ്പെടും വിധമാണ് വ്യാജരേഖകളുടെ നിർമാണം. എന്നാൽ ഇവരുടെ മേൽവിലാസം കൃത്യമായിരിക്കില്ല.

ലക്ഷ്യം സ്പാകളും മസാജ് സെന്ററുകളും

കൂണുപോലെ മുളച്ചുപൊന്തുന്ന സ്പാകളിൽ ജോലിക്കായിട്ടാണ് പലരും കേരളത്തിൽ എത്തിയതെന്നാണ് പൊലീസിന് ലഭിച്ച വിവരം. മുംബൈ കേന്ദ്രീകരിച്ചുള്ള ഏജന്റുമാർ മുഖേനയാണ് പ്രധാനമായും ഈ നിയമവിരുദ്ധ റിക്രൂട്ട്മെന്റ് നടക്കുന്നത്.

ജോലി ചെയ്യുന്ന സ്ഥാപനവും താമസസ്ഥലവും വിട്ട് ഇവർ എവിടെയും പോകാറില്ല. അവധി ദിവസങ്ങളിൽപോലും ഇവർ ജോലിചെയ്യും. ,ഉയർന്ന ശമ്പളത്തിനുപുറമെ വലിയ തുക 'ടിപ്പായും' ലഭിക്കുമെന്നുള്ളതാണ് ഈ മേഖലയിലേക്ക് കൂടുതൽ പേരെ ആകർഷിക്കുന്നത്. ,20 മുതൽ 50 വയസ്സുവരെയുള്ളവരാണ് പ്രധാനമായും ഇത്തരം ജോലികൾക്കായി എത്തുന്നത്.

പരിശോധന ശക്തമാക്കും; നാടുകടത്തുമെന്ന് കമ്മീഷണർ

ബംഗ്ലാദേശി പൗരന്മാർ ഇനിയും സംസ്ഥാനത്തിന്റെ പല ഭാഗങ്ങളിലുമുണ്ടെന്ന നിഗമനത്തിലാണ് പൊലീസ്. ഇതിന്റെ അടിസ്ഥാനത്തിൽ പരിശോധനകൾ കൂടുതൽ വിപുലമാക്കും.

‘അറസ്റ്റിലായവരുടെ റിമാൻഡ് കാലാവധി കഴിഞ്ഞാൽ നിയമനടപടികൾ പൂർത്തിയാക്കി ഇവരെ ബംഗ്ലാദേശിലേക്ക് തന്നെ തിരിച്ചയക്കും.’ - സിറ്റി പൊലീസ് കമ്മീഷണർ ബി.വി. വിജയ് ഭരത് റെഡ്ഡി വ്യക്തമാക്കി.

അനധികൃതമായി വിദേശികളെ താമസിപ്പിക്കുന്നവരും ജോലി നൽകുന്നവരും കർശന നിയമനടപടികൾ നേരിടേണ്ടി വരുമെന്ന് പൊലീസ് മുന്നറിയിപ്പ് നൽകി.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമന്റായി രേഖപ്പെടുത്താൻ മറക്കരുത്.

Article Summary: Four Bangladeshi women were arrested and remanded for working in a Kannur spa without valid visas or passports, bringing the total number of such arrests to five in two days. Police plan to intensify raids across the state and deport the accused.

#KannurPolice #FakeAadhaar #BangladeshiImmigrants #SpaRaid #KeralaNews #MalayalamNews #KannurTownPolice #Kvartha #AnjanaNews