ബംഗളൂരു: (KVARTHA) കർണാടക മുൻ ഡിജിപി ഒ.എം. പ്രകാശ് (68) ബംഗളൂരു എച്ച്എസ്ആർ ലേഔട്ടിലെ വസതിയിൽ കൊല്ലപ്പെട്ടു. സംഭവവുമായി ബന്ധപ്പെട്ട് ഭാര്യ പല്ലവിയെ പൊലീസ് കസ്റ്റഡിയിലെടുത്തു.

കർണാടക കേഡറിൽ നിന്നുള്ള 1981 ബാച്ച് ഐപിഎസ് ഉദ്യോഗസ്ഥനായ ഒ.എം. പ്രകാശ് 2015 ൽ പൊലീസ് ഡയറക്ടർ ജനറലും ഇൻസ്പെക്ടർ ജനറലും (ഡിജിപി, ഐജിപി) ആയി സേവനമനുഷ്ഠിച്ചിട്ടുണ്ട്. 2017 ൽ അദ്ദേഹം വിരമിച്ചു. ഞായറാഴ്ച ഞായറാഴ്ച ഉച്ചയ്ക്ക് വീട്ടിൽ രക്തത്തിൽ കുളിച്ച നിലയിൽ അദ്ദേഹത്തെ കണ്ടെത്തുകയായിരുന്നു.

കൊലപാതകത്തിൽ നേരിട്ട് പങ്കുണ്ടെന്ന് സംശയിക്കുന്ന ഭാര്യ പല്ലവിയെ ചോദ്യം ചെയ്യുന്നതിനായി കസ്റ്റഡിയിലെടുത്തതായി പൊലീസ് അറിയിച്ചു.

പ്രകാശ് സാമ്പത്തിക ബുദ്ധിമുട്ടുകൾ നേരിട്ടിരുന്നുവെന്നും ഇത് കുടുംബത്തിൽ സംഘർഷങ്ങൾക്ക് കാരണമായിരുന്നുവെന്നും പൊലീസ് സൂചിപ്പിച്ചു. ഗണ്യമായ വായ്പകൾ അദ്ദേഹം എടുത്തിരുന്നു. ഇത് വീട്ടിൽ ഇടയ്ക്കിടെ തർക്കങ്ങൾക്ക് ഇടയാക്കി. കൂടാതെ, തന്നെ ഒഴിവാക്കി പ്രകാശ് നേരിട്ട് മകന് സ്വത്തിന്റെ ഉടമസ്ഥാവകാശം കൈമാറിയതിൽ ഭാര്യക്ക് അതൃപ്തിയുണ്ടായിരുന്നതായും വിവരങ്ങളുണ്ട്.

ബീഹാറിലെ ചമ്പാരൻ ജില്ലയിൽ നിന്നുള്ള ഒ.എം. പ്രകാശ് ഐ.പി.എസ് ലഭിച്ച ശേഷം ബെല്ലാരി ജില്ലയിലെ ഹാരപ്പനഹള്ളിയിൽ എ.എസ്.പിയായാണ് കർണാടകയിൽ ഔദ്യോഗിക ജീവിതം ആരംഭിച്ചത്. വർഷങ്ങളോളം ശിവമോഗ്ഗ, ഉത്തര കന്നട, ചിക്കമഗളൂരു ജില്ലകളിൽ എസ്.പിയായി സേവനമനുഷ്ഠിച്ചു.

കർണാടക വിജിലൻസ് സെൽ എസ്പി, ലോകായുക്തയിലെ എസ്ഐജി, ഫയർ സർവീസസ് ഡിഐജി, സിഐഡി ഐജിപി തുടങ്ങിയ വിവിധ പ്രധാന പദവികൾ അദ്ദേഹം വഹിച്ചിട്ടുണ്ട്. 1993-ലെ ഭട്കൽ വർഗീയ കലാപവേളയിൽ അദ്ദേഹം നിർണായക പങ്ക് വഹിച്ചിട്ടുണ്ട്. ഡിഐജി (അഡ്മിനിസ്ട്രേഷൻ), ഡിഐജി (നോർത്തേൺ റേഞ്ച്), ഡിഐജി (ട്രെയിനിംഗ്), എഡിജിപി (ക്രൈം ആൻഡ് ടെക്നിക്കൽ സർവീസസ്), എഡിജിപി (ഗ്രീവൻസസ് ആൻഡ് ഹ്യൂമൻ റൈറ്റ്സ്) തുടങ്ങിയ മുതിർന്ന പദവികളിലും അദ്ദേഹം പ്രവർത്തിച്ചു. 2015 ഫെബ്രുവരി 28-നാണ് ഒ.എം. പ്രകാശ് ഡിജിപിയായും ഐജിപിയായും സ്ഥാനമേറ്റെടുത്തത്.

കൂടുതൽ അന്വേഷണം പുരോഗമിക്കുകയാണ്. കൊലപാതകത്തിന്റെ യഥാർത്ഥ കാരണം സ്ഥിരീകരിക്കുന്ന ഔദ്യോഗിക വിവരങ്ങൾ പൊലീസ് ഇതുവരെ പുറത്തുവിട്ടിട്ടില്ല.

ഈ വാർത്ത ഷെയർ ചെയ്യുക, നിങ്ങളുടെ അഭിപ്രായങ്ങൾ രേഖപ്പെടുത്തുക.

Summary: Former Karnataka DGP OM Prakash was found murdered at his Bengaluru residence. His wife has been detained as police suspect financial troubles and a property dispute as potential motives.

#OMPrakash, #KarnatakaDGP, #Murder, #Bengaluru, #CrimeNews, #PropertyDispute