തിരുവനന്തപുരം: (KVARTHA) വെഞ്ഞാറമൂട്ടിൽ 23 വയസ്സുകാരനായ അഫാൻ നടത്തിയ കൊടുംക്രൂരകൃത്യം കേരളത്തെയാകെ ഞെട്ടിച്ചിരിക്കുകയാണ്. മൂന്നിടങ്ങളിലായി അഞ്ചുപേരെ കൊലപ്പെടുത്തിയ ശേഷം അഫാൻ പൊലീസ് സ്റ്റേഷനിൽ കീഴടങ്ങുകയായിരുന്നു. അവിടെവെച്ച് താൻ വിഷം കഴിച്ചതായും പൊലീസിനോട് പറഞ്ഞു. തുടർന്ന് ഇയാളെ തിരുവനന്തപുരം മെഡിക്കൽ കോളേജ് ആശുപത്രിയിൽ പ്രവേശിപ്പിച്ചു. കുഴിമന്തിയിൽ എലിവിഷം കലർത്തി കഴിച്ചാണ് ഇയാൾ ആത്മഹത്യക്ക് ശ്രമിച്ചത് എന്നാണ് വിവരം. നിലവിൽ 32-ാം വാർഡിൽ പൊലീസ് നിരീക്ഷണത്തിലാണ് ഇയാൾ. ആശുപത്രിയിൽ അസ്വസ്ഥതകൾ പ്രകടിപ്പിക്കുന്നതായും റിപ്പോർട്ടുകളുണ്ട്.

വെളിപ്പെടുത്തലും മരണങ്ങളും

തിങ്കളാഴ്ച വൈകുന്നേരമാണ് അഫാൻ വെഞ്ഞാറമൂട് പൊലീസ് സ്റ്റേഷനിൽ ഹാജരായി കുറ്റം സമ്മതിച്ചത്. 16 കിലോമീറ്റർ പരിധിയിലുള്ള മൂന്ന് വീടുകളിലാണ് കൊലപാതകം നടന്നത്. അഫാന്റെ വെളിപ്പെടുത്തലിന്റെ അടിസ്ഥാനത്തിൽ പൊലീസ് അഞ്ച് മൃതദേഹങ്ങൾ കണ്ടെത്തി. അഫാന്റെ മുത്തശ്ശി സൽമാ ബീവി (88) പാങ്ങോട്ടെ വീട്ടിലും, പിതാവിന്റെ മൂത്ത സഹോദരൻ ലത്തീഫ് (69), ഭാര്യ ശാഹിദ (59) എന്നിവരെ എസ് എൻ പുരത്തെ വീട്ടിലും, സഹോദരൻ അഹ്‌സാൻ (15), കാമുകി ഫർസാന എന്നിവരെ പെരുമുളയിലുമാണ് കൊലപ്പെടുത്തിയത്. അഫാന്റെ മാതാവ് ഷെമി ഗുരുതരാവസ്ഥയിൽ ആശുപത്രിയിൽ ചികിത്സയിലാണ്.

വെഞ്ഞാറമൂട്ടിൽ നിന്ന് ചുറ്റിക വാങ്ങി വീട്ടിലെത്തിയ അഫാൻ ആദ്യം മാതാവിന്റെ തലയ്ക്കടിച്ചു. പിന്നീട് മുത്തശ്ശിയെയും പിതാവിന്റെ സഹോദരനെയും ഭാര്യയെയും കൊലപ്പെടുത്തി. വീട്ടിൽ തിരിച്ചെത്തിയ ശേഷം സഹോദരനെയും കൊന്നു. തങ്ങളെല്ലാം മരിച്ചാൽ കാമുകി അനാഥയാകുമെന്നു കരുതി അവളേയും വീട്ടിലേക്ക് വിളിച്ചു വരുത്തി കൊലപ്പെടുത്തി എന്നാണ് അഫാൻ പൊലീസിനോട് പറഞ്ഞത്. ശേഷം, വിഷം കഴിച്ച് ഓട്ടോറിക്ഷയിൽ പോലീസ് സ്റ്റേഷനിൽ എത്തുകയായിരുന്നു മുത്തശ്ശിയെ കൊല്ലാനായി ഉച്ചയ്ക്ക് 12.30ന് അഫാൻ കല്ലറയിലുള്ള വീട്ടിലേക്ക് വരുന്ന സിസിടിവി ദൃശ്യങ്ങൾ പുറത്തുവന്നിട്ടുണ്ട്. കൊലപാതകത്തിനു മുൻപ് അനുജനെ ഹോട്ടലിൽ കൂട്ടിക്കൊണ്ടു പോയി കുഴിമന്തി വാങ്ങി നൽകിയതായും വ്യക്തമായിട്ടുണ്ട്.

ലഹരിയും സാമ്പത്തിക പ്രശ്നങ്ങളും

അഫാൻ കുറ്റം ചെയ്യുമ്പോൾ ലഹരിയുടെ സ്വാധീനത്തിലായിരുന്നോ എന്ന് പോലീസ് സംശയിക്കുന്നു. രക്തസാമ്പിളുകൾ പരിശോധനയ്ക്ക് അയച്ചിട്ടുണ്ട്. ചൊവ്വാഴ്ച ഇയാളെ വിശദമായി ചോദ്യം ചെയ്യും. കൊലപാതകത്തിന് പിന്നിലെ കാരണം അന്വേഷിക്കുകയാണ് പൊലീസ്. അഫാന് സാമ്പത്തിക പ്രശ്നങ്ങളുണ്ടായിരുന്നതായി അയൽവാസികൾ പറയുന്നു. പലരിൽ നിന്നും പണം കടം വാങ്ങിയിരുന്നെന്നും വിവരമുണ്ട്.

ബന്ധുക്കളോട് പണം ആവശ്യപ്പെട്ടിരുന്നെന്നും, നൽകാത്തതിനെ തുടർന്ന് കൊലപാതകം നടത്തി എന്നുമാണ് പുറത്തുവരുന്ന വിവരങ്ങൾ. അഫാന്റെ പിതാവ് റഹീം സൗദി അറേബ്യയിൽ വ്യാപാരിയാണ്. രണ്ട് വർഷം മുൻപ് അഫാനും, മാതാവ് ഷെമിയും, അഹ്‌സാനും വിസിറ്റിംഗ് വിസയിൽ സൗദി അറേബ്യയിൽ പോയിരുന്നു. നിലവിൽ സാമ്പത്തിക പ്രശ്നങ്ങളാണ് കൊലപാതകത്തിലേക്ക് നയിച്ചതെന്നാണ് സംശയമെന്നും മറ്റെല്ലാ വശങ്ങളും അന്വേഷിക്കുകയാണെന്നും അറ്റിങ്ങൽ ഡിവൈഎസ്‌പി മഞ്ജുലാൽ മാധ്യമങ്ങളോട് പറഞ്ഞു.

പ്രണയവും കൊലപാതക കാരണവും

കൊലപാതകത്തിന് രണ്ട് ദിവസം മുൻപ് അഫാൻ കാമുകി ഫർസാനയെ വീട്ടിൽ കൊണ്ടുവന്നിരുന്നതായും ഇത് കുടുംബാംഗങ്ങളുടെ എതിർപ്പിന് കാരണമായിരുന്നുവെന്നുമാണ് സൂചന. ഫർസാനയുടെ കുടുംബത്തിന് ഇവരുടെ ബന്ധത്തെക്കുറിച്ച് അറിയാമായിരുന്നു. അഫാൻ വീട്ടിൽ വന്ന് വിവാഹത്തെക്കുറിച്ച് സംസാരിച്ചിരുന്നതായി ഫർസാനയുടെ സഹോദരൻ അമൽ മുഹമ്മദ് പറഞ്ഞു. വിവാഹത്തിന് സമ്മതിച്ചിരുന്നെന്നും സഹോദരൻ സ്ഥിരീകരിച്ചു. ഫർസാന അഞ്ചലിലെ കോളേജിൽ ബിഎസ്‌സി കെമിസ്ട്രി വിദ്യാർത്ഥിനിയായിരുന്നു.

പിതാവിന്റെ കടബാധ്യത പരിഹരിക്കാനാണ് കൊലപാതകമെന്നാണ് പ്രതി പൊലീസിന് നൽകിയിരിക്കുന്ന മൊഴി. പിതാവിന് കടബാധ്യതയുമായി ബന്ധപ്പെട്ട് കുടുംബങ്ങൾ സഹായിക്കുന്നില്ലെന്ന പരാതിയും അതിന്റെ കൂടെ പെൺകുട്ടിയെ വിവാഹം കഴിക്കാൻ ആഗ്രഹിച്ചിരുന്നുവെന്നും അതിന് കുടുംബത്തിൽ നിന്ന് പ്രത്യേകമായി പണം ആവശ്യപ്പെട്ടിരുന്നുവെന്നും സൂചനകളുണ്ട്. ഇതെല്ലാമായിരിക്കാം അഫാന്റെ  കൊടുംക്രൂരതയ്ക്ക് പിന്നിലെ കാരണങ്ങളെന്ന് കരുതുന്നു. കൂടുതൽ വിവരങ്ങൾ പൊലീസ് അന്വേഷണത്തിന് ശേഷം പുറത്തുവരും

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Afan from Vengara killed five family members and his lover. The motive behind the brutality might be financial issues or love, and the police are investigating.

#AfanMurderCase #KeralaCrime #BrutalityInKerala #CrimeNews #Investigation #FinancialProblems