കൊച്ചിയിൽ രാഷ്ട്രീയ പാർട്ടി വേദികളിൽ വ്യാജ മെത്രാന്മാർ: തട്ടിപ്പിന് പിന്നിൽ തമിഴ്‌നാട് കേന്ദ്രമായ റാക്കറ്റെന്ന് സൂചന

അജോ കുറ്റിക്കൻ 

കൊച്ചി: (KVARTHA) കേരളത്തിൽ വ്യാജ മെത്രാന്മാർ വീണ്ടും പിടിമുറുക്കുന്നു. രാഷ്ട്രീയ പാർട്ടികളുടെ സമ്മേളനങ്ങളിലും പൊതുവേദികളിലും 'തിരുമേനി'മാരായി വേഷമിട്ടെത്തുന്ന ഇവർക്ക് പിന്നിൽ തമിഴ്‌നാട്ടിലെ വെല്ലൂർ കേന്ദ്രമായി പ്രവർത്തിക്കുന്ന വൻ റാക്കറ്റാണെന്ന് സൂചന ലഭിച്ചിട്ടുണ്ട്. 

കഴിഞ്ഞദിവസം കൊച്ചിയിൽ നടന്ന ലയന സമ്മേളനത്തിൽ വ്യാജ മെത്രാന്മാർ മുൻനിരയിൽ പ്രത്യക്ഷപ്പെട്ടതോടെയാണ് ഈ തട്ടിപ്പ് സംഘങ്ങളെക്കുറിച്ചുള്ള ഞെട്ടിക്കുന്ന വിവരങ്ങൾ പുറത്തുവരുന്നത്. മുൻ എംഎൽഎമാരായ എ വി താമരാക്ഷൻ, മാത്യു സ്റ്റീഫൻ എന്നിവർ ഹിന്ദുസ്ഥാൻ ആവോം മോർച്ചയിൽ ലയിക്കുന്നതിന്റെ ഭാഗമായി സംഘടിപ്പിച്ച ചടങ്ങിലാണ് വ്യാജന്മാർ കൂട്ടത്തോടെ എത്തിയത്. 

യാതൊരു ദൈവശാസ്ത്ര പശ്ചാത്തലമോ സഭാപരമായ അംഗീകാരമോ ഇല്ലാത്തവരാണ് തട്ടിപ്പിന് പിന്നിലുള്ളത്. മുൻപ് വിവിധ പെന്തക്കോസ്ത് സഭകളിൽ പാസ്റ്റർമാരായിരുന്ന ചിലരാണ് മെത്രാൻ വേഷത്തിൽ രംഗത്തുവരുന്നത്. വെല്ലൂർ ആസ്ഥാനമായുള്ള സംഘം നിശ്ചിത തുക വാങ്ങി ഇത്തരക്കാർക്ക് മെത്രാൻ കുപ്പായവും സഭാചിഹ്നങ്ങളും മറ്റ് ഔദ്യോഗിക രേഖകളും നൽകുന്നുവെന്നാണ് ലഭിക്കുന്ന വിവരം.

സ്വന്തമായി വിശ്വാസിസമൂഹമോ പള്ളികളോ ഇല്ലാത്ത ഇവർ പദവികൾ ദുരുപയോഗം ചെയ്ത് രാഷ്ട്രീയ സ്വാധീനം ഉറപ്പിക്കാനാണ് ശ്രമിക്കുന്നത്. കൊച്ചിയിലെ ചടങ്ങിൽ വ്യാജ സർട്ടിഫിക്കറ്റ് കേസിലെ പ്രതിയായ കൊല്ലം സ്വദേശി ജയിംസ് ജോർജ് ഉൾപ്പെടെയുള്ളവർ മെത്രാൻ വേഷത്തിൽ പങ്കെടുത്തത് ദുരൂഹത വർദ്ധിപ്പിക്കുന്നു. 

ഇയാൾ ഹാജരാക്കിയ രേഖകൾ വ്യാജമാണെന്ന് പൊലീസ് നേരത്തെ കണ്ടെത്തിയിട്ടുള്ളതാണ്. തിരഞ്ഞെടുപ്പ് കാലങ്ങളിലും മറ്റും രാഷ്ട്രീയ സ്ഥാനാർത്ഥികൾക്ക് 'ആത്മീയ പരിവേഷം' നൽകാൻ ഇത്തരം വ്യാജന്മാരെ വാടകയ്‌ക്കെടുത്തുകൊണ്ടുവരുന്നത് പതിവാകുകയാണ്.

കഴിഞ്ഞ പാർലമെന്റ് തിരഞ്ഞെടുപ്പ് കാലത്ത് കൊല്ലത്തെ ബിജെപി സ്ഥാനാർത്ഥിയുടെ വേദിയിൽ 'മലങ്കര മെത്രാപ്പോലീത്ത' എന്ന വ്യാജേന ജയിംസ് ജോർജ് എത്തിയത് വലിയ വിവാദമായിരുന്നു. പരിപാടിയുടെ സംഘാടന ചുമതലയുണ്ടായിരുന്ന ഇവന്റ് മാനേജ്‌മെന്റ് ഗ്രൂപ്പാണ് വിവാദത്തിൽപ്പെട്ട വ്യക്തികളെ ചടങ്ങിൽ പങ്കെടുപ്പിച്ചതെന്ന് നേതാക്കൾ വിശദീകരിച്ചു.

‘വേദിയിലുണ്ടായിരുന്നവർ വ്യാജന്മാരാണെന്ന വിവരം പരിപാടി കഴിഞ്ഞ ശേഷമാണ് ഞങ്ങളുടെ ശ്രദ്ധയിൽപ്പെട്ടത്. ഇതിൽ പാർട്ടിക്ക് യാതൊരു മുൻകൂട്ടിയറിവോ ഉദ്ദേശപൂർവ്വമായ പങ്കാളിത്തമോ ഇല്ല’ - നേതാക്കൾ പറഞ്ഞു.

ന്യൂനപക്ഷ സ്വാധീനം വ്യക്തമാക്കാൻ മനഃപൂർവ്വം ആളുകളെ എത്തിച്ചതാണെന്ന ആരോപണങ്ങൾ ശക്തമാകുന്നതിനിടെയാണ് പിആർ ഏജൻസിയെയും ഇവന്റ് ഗ്രൂപ്പിനെയും പ്രതിക്കൂട്ടിലാക്കി നേതാക്കൾ തടിയൂരുന്നത്. 

എന്നാൽ, മുൻ എംഎൽഎമാർ ഉൾപ്പെടെയുള്ള മുതിർന്ന നേതാക്കൾ പങ്കെടുക്കുന്ന ചടങ്ങിൽ അതിഥികളായി എത്തുന്നവരുടെ പശ്ചാത്തലം പരിശോധിക്കുന്നതിൽ സംഘാടകർക്ക് വലിയ വീഴ്ച പറ്റിയെന്ന വിമർശനം പ്രവർത്തകർക്കിടയിൽ തന്നെ ശക്തമാണ്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ താഴെ രേഖപ്പെടുത്തുമല്ലോ? സുഹൃത്തുക്കൾക്കും ഷെയർ ചെയ്യൂ. 

Article Summary: Fraudulent bishops attend political merger event in Kochi, suspected link to Vellore racket.

#FakeBishops #KochiNews #PoliticalScandal #FraudAlert #KeralaPolitics #VelloreRacket