ജയിൽ മോചിതനായ പ്രതിക്ക് 'ഹരം' മോഷണം; തേങ്ങയും അടക്കയും മോഷ്ടിച്ച് അരലക്ഷം രൂപയുടെ നഷ്ടം

കണ്ണൂർ: (KVARTHA) ജയിൽ ശിക്ഷ കഴിഞ്ഞ് പുറത്തിറങ്ങിയ നിരവധി മോഷണ കേസുകളിലെ പ്രതി അടച്ചിട്ട വീട്ടിൽ അതിക്രമിച്ച് കയറി അരലക്ഷം രൂപയുടെ തേങ്ങയും അടയ്ക്കയും മോഷ്ടിച്ച സംഭവത്തിൽ പയ്യന്നൂർ പൊലീസ് കേസെടുത്തു. പയ്യന്നൂർ കോറോം സ്വദേശിയായ തമ്പാനെതിരെയാണ് പൊലീസ് കേസെടുത്തത്. ബെംഗളൂരിൽ താമസിക്കുന്ന കോറോം സ്വദേശിയുടെ വീട്ടിലാണ് മോഷണം നടന്നത്. വീടിന്റെ പലയിടങ്ങളിലും സ്ഥാപിച്ച സിസിടിവി ക്യാമറകളിൽ മോഷണ ദൃശ്യങ്ങൾ വ്യക്തമായി പതിഞ്ഞിട്ടുണ്ട്.

നാല് മാസം മുൻപാണ് തമ്പാൻ ജയിൽ ശിക്ഷ കഴിഞ്ഞ് പുറത്തിറങ്ങിയത്. അതിനുശേഷം ആഗസ്റ്റ് മാസം മുതൽ ഇയാൾ ഈ വീട്ടിൽ പല തവണകളായി അതിക്രമിച്ച് കയറി തേങ്ങയും അടയ്ക്കയും മോഷ്ടിക്കുകയായിരുന്നു. ബെംഗളൂരിൽ ഇരുന്ന് സിസിടിവി ദൃശ്യങ്ങൾ കണ്ട വീട്ടുടമ തെളിവുകൾ സഹിതം പയ്യന്നൂർ പൊലീസ് സ്റ്റേഷനിലേക്ക് മെയിലിൽ പരാതി അയച്ചു. ഈ പരാതിയുടെ അടിസ്ഥാനത്തിൽ പൊലീസ് നടത്തിയ അന്വേഷണത്തിലാണ് മോഷണം നടത്തിയ പ്രതി തമ്പാനാണെന്ന് തിരിച്ചറിഞ്ഞത്.

നേരത്തെയും നിരവധി മോഷണക്കേസുകളിൽ പ്രതിയായിരുന്നു തമ്പാൻ. ജയിൽ ശിക്ഷ കഴിഞ്ഞ് പുറത്തിറങ്ങിയതിനുശേഷം ഇയാൾ മോഷണം വീണ്ടും സജീവമാക്കുകയായിരുന്നു. തമ്പാനായി പൊലീസ് അന്വേഷണം ഊർജ്ജിതമാക്കിയിട്ടുണ്ട്. പ്രതിയെ ഉടൻ പിടികൂടാൻ കഴിയുമെന്ന പ്രതീക്ഷയിലാണ് പൊലീസ്.

ഇങ്ങനെയുളള സംഭവങ്ങൾ നിങ്ങളുടെ നാട്ടിൽ നടന്നിട്ടുണ്ടോ?

Article Summary: Ex-convict arrested for stealing coconuts, areca nuts in Kannur.

#Kannur #Theft #CCTV #CrimeNews #KeralaPolice #ExConvict