ഏറ്റുകുടുക്കയിൽ ബിഎൽഒ മരിച്ച നിലയിൽ: ദുരൂഹത നീക്കാനായി അന്വേഷണം ആരംഭിച്ചു

കാങ്കോൽ: (KVARTHA) ഏറ്റുകുടുക്കയില്‍ എസ്.ഐ.ആർ. ചുമതലയുണ്ടായിരുന്ന ബൂത്ത് ലെവൽ ഓഫീസറെ ദുരൂഹ സാഹചര്യത്തിൽ വീട്ടിൽ മരിച്ച നിലയിൽ കണ്ടെത്തിയ സംഭവത്തിൽ പെരിങ്ങോം പോലീസ് അസ്വാഭാവിക മരണത്തിന് കേസെടുത്ത് വിശദമായ അന്വേഷണം ആരംഭിച്ചു.

രാമന്തളി കുന്നരു എ.യു.പി. സ്കൂളിലെ പ്യൂണും ഏറ്റുകുടുക്ക നിവാസിയുമായ അനീഷ് ജോർജ്ജാണ് (45) മരിച്ചത്. പയ്യന്നൂർ നഗരസഭയിലെ പതിനെട്ടാം വാർഡിലെ ബൂത്തിലാണ് ഇദ്ദേഹം ബി.എൽ.ഒ. ചുമതല വഹിച്ചിരുന്നത്.

ഞായറാഴ്ച രാവിലെ 11 മണിയോടെ ഏറ്റുകുടുക്കയിലെ സ്വന്തം വീട്ടിലെ കിടപ്പുമുറിയിലാണ് അനീഷ് ജോർജ്ജിനെ തൂങ്ങി മരിച്ചനിലയിൽ കണ്ടെത്തിയത്. വോട്ടർ പട്ടിക പരിഷ്കരണവുമായി ബന്ധപ്പെട്ട ജോലി സമ്മർദ്ദമാണ് മരണത്തിലേക്ക് നയിച്ചതെന്നാണ് ബന്ധുക്കൾ നൽകുന്ന പ്രാഥമിക സൂചന. കഴിഞ്ഞ ദിവസങ്ങളിൽ അനീഷ് കടുത്ത ജോലി സമ്മർദ്ദത്തിലായിരുന്നുവെന്ന് ബന്ധുക്കൾ മൊഴി നൽകിയിട്ടുണ്ട്.

ഞായറാഴ്ച രാവിലെ പത്ത് മണിയോടെ കുടുംബത്തെ പ്രാർത്ഥനയ്ക്കായി പള്ളിയിൽ കാറിൽ കൊണ്ടുവിട്ടതിന് ശേഷമായിരുന്നു ഈ സംഭവം. വിവരമറിഞ്ഞ് പയ്യന്നൂർ ഡിവൈ.എസ്.പി. കെ. വിനോദ് കുമാർ, പെരിങ്ങോം പോലീസ് എന്നിവർ സ്ഥലത്തെത്തി തുടർ നടപടികൾ സ്വീകരിച്ചു. മൃതദേഹം ഇൻക്വസ്റ്റ് നടപടികൾ പൂർത്തിയാക്കിയ ശേഷം പോസ്റ്റുമോർട്ടത്തിനായി ആശുപത്രി മോർച്ചറിയിലേക്ക് മാറ്റി.

ജോലി സമ്മർദ്ദമാണോ മരണത്തിന് കാരണമായതെന്ന് ഇതുവരെ സ്ഥിരീകരിച്ചിട്ടില്ലെന്നും, ബന്ധുക്കളുടെ മൊഴികളടക്കം വിശദമായി പരിശോധിച്ചുവരികയാണെന്നും പോലീസ് അറിയിച്ചു. 

ഏറ്റുകുടുക്കയിലെ ജോർജ്ജ് മാഷിന്റെയും മേരി ടീച്ചറുടെയും മകനാണ് അനീഷ്. ഭാര്യ: ഫാബില. മക്കൾ: ലിവിയ, ജുവാൻ.

ഈ വാർത്ത ഷെയർ ചെയ്യുക. നിങ്ങളുടെ അഭിപ്രായങ്ങൾ കമൻ്റ് ചെയ്യുക. 

Article Summary: Booth Level Officer Anish George (45) found dead in Ettukudukka; police probe suspected work pressure.

#BLO #Ettukudukka #Kasaragod #PoliceInvestigation #WorkPressure #KeralaNews