ഇരവിപേരൂരിൽ സുഹൃത്തുക്കൾ തമ്മിലുള്ള തർക്കത്തിനിടെ യുവാക്കൾ കിണറ്റിൽ വീണു; ഒരാൾക്ക് ദാരുണാന്ത്യം, 2 പേർ കസ്റ്റഡിയിൽ

ഇരവിപേരൂർ: (KVARTHA) പത്തനംതിട്ട ഇരവിപേരൂരിൽ കൂട്ടുകാർ തമ്മിലുണ്ടായ തർക്കത്തിനിടെ രണ്ട് പേരെ കിണറ്റിലേക്ക് തള്ളിയിട്ട സംഭവത്തിൽ ഒരാൾ മരിച്ചു. ഇരവിപേരൂർ കുളക്കാട് വീട്ടിൽ ജൂവൽ (34) ആണ് മരിച്ചത്. കിണറ്റിൽ വീണ് രക്ഷപ്പെട്ടയാളെയും കരയ്ക്കുനിന്ന സുഹൃത്തിനെയും പൊലീസ് കസ്റ്റഡിയിലെടുത്തു. ഇരവിപേരൂർ ഒഇഎം പബ്ലിക് സ്‌കൂളിന് സമീപം ഞായറാഴ്ച (ഓഗസ്റ്റ് 30) 11 മണിയോടെയായിരുന്നു നാടിനെ നടുക്കിയ സംഭവമുണ്ടായത്. ജൂവലിൻ്റെ പിതാവ്: ജോൺ വർഗീസ്. മാതാവ്: ലിസി.

രക്ഷപ്പെട്ടത് ജോജോ

ജൂവലും കൂട്ടുകാരായ ജോജോ ജോണും വൈശാഖും കിണറ്റിൻകരയിൽ സംസാരിച്ചുനിൽക്കുന്നതിനിടെ തർക്കമുണ്ടാകുകയും പരസ്പരം പിടിച്ചുതള്ളലുണ്ടാകുകയും ചെയ്തെന്നാണ് പൊലീസിന് ലഭിച്ച പ്രാഥമിക വിവരം. ഇതിനിടെ ജൂവലും ജോജോയും കിണറ്റിൽ വീഴുകയായിരുന്നു. തുടർന്ന് കരയിലുണ്ടായിരുന്ന വൈശാഖാണ് അഗ്നിരക്ഷാസേനയെ വിവരം അറിയിച്ചത്. ഇവർ എത്തിയപ്പോഴേക്കും ജോജോ കിണറ്റിൽ നിന്ന് കരയ്ക്ക് കയറിയിരുന്നു. ജൂവലിനെ പുറത്തെടുത്ത് അഗ്നിരക്ഷാസേന തിരുവല്ല താലൂക്ക് ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.

മൊഴി വിശ്വസിക്കാതെ പൊലീസ്

കിണറ്റിൻ്റെ കെട്ടിലിരിക്കുമ്പോൾ അബദ്ധത്തിൽ വീണെന്നാണ് കസ്റ്റഡിയിലുള്ള ജോജോ പൊലീസിന് നൽകിയ മൊഴി. എന്നാൽ സ്ഥലത്തെത്തിയ തിരുവല്ല പൊലീസ് ഈ മൊഴി വിശ്വാസത്തിലെടുത്തിട്ടില്ല. തുടർന്നാണ് ജോജോയെ വിശദമായി ചോദ്യം ചെയ്യുന്നതിനായി കസ്റ്റഡിയിലെടുത്തത്. സംഭവത്തിന് ശേഷം സ്ഥലത്തുനിന്നു മുങ്ങിയ വൈശാഖിനെയും പൊലീസ് പിന്നീട് പിടികൂടി. ജൂവലിൻ്റെ മൃതദേഹം പോസ്റ്റ്മോർട്ടം ചെയ്തശേഷമേ മരണം സംബന്ധിച്ച് കൂടുതൽ വ്യക്തത വരുത്താനാകൂ എന്ന് പൊലീസ് അറിയിച്ചു.

പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക.

Article Summary: A 34-year-old man named Juval from Eraviperoor, Pathanamthitta, died after falling into a well during a dispute with his friends on Sunday, August 30, 2026, leading the police to take two of his friends into custody for questioning due to suspicious circumstances.

#Kvartha #PathanamthittaNews #Eraviperoor #CrimeNews #KeralaPolice #MalayalamNews #AccidentalDeath #KeralaNews #AmmuNews