'സഹോദരനെ പെട്രോൾ ഒഴിച്ച് തീ കൊളുത്തി'; ഗുരുതരാവസ്ഥയിൽ

കൊച്ചി: (KVARTHA) മദ്യലഹരിയിലുണ്ടായ തർക്കത്തെ തുടർന്ന് ജ്യേഷ്ഠൻ സഹോദരന്റെ ദേഹത്ത് പെട്രോൾ ഒഴിച്ച് തീ കൊളുത്തിയതായി പരാതി. ചോറ്റാനിക്കരയിലുണ്ടായ സംഭവത്തിൽ ഗുരുതരമായി പരിക്കേറ്റ മണികണ്ഠൻ കളമശേരി മെഡിക്കൽ കോളേജ് ആശുപത്രിയിൽ ചികിത്സയിലാണ്. പ്രതിയായ ജ്യേഷ്ഠൻ മാണിക്യനെ സംഭവവുമായി ബന്ധപ്പെട്ട് പൊലീസ് കസ്റ്റഡിയിലെടുത്തിട്ടുണ്ട്.

ഞയറാഴ്ച രാത്രി ചോറ്റാനിക്കര ക്ഷേത്രത്തിന്റെ പാർക്കിംഗ് ഏരിയയിൽ വെച്ചാണ് സംഭവം നടന്നത്. അന്വേഷണസംഘം നൽകുന്ന വിവരങ്ങൾ പ്രകാരം ഇരുവരും ലഹരി ഉപയോഗിച്ചതിന് ശേഷം തർക്കത്തിൽ ഏർപ്പെട്ടതാണ് ക്രൂരമായ അക്രമത്തിന് കാരണമായത്.

തിരുവനന്തപുരത്ത് താമസിക്കുന്ന മാണിക്യൻ ദീപാവലി ആഘോഷിക്കുന്നതിനായാണ് ചോറ്റാനിക്കരയിൽ എത്തിയതെന്ന് പൊലീസ് അറിയിച്ചു. ഇരുവരും ഒരുമിച്ച് ബാറിൽ പോയി മദ്യപിച്ച് തിരിച്ചുവരുന്നതിനിടെ ബൈക്കിലെ പെട്രോൾ തീർന്നു. തുടർന്ന് സമീപത്തെ പമ്പിൽ നിന്നും കുപ്പിയിൽ പെട്രോൾ വാങ്ങി.

മടങ്ങി എത്തിയതിന് ശേഷം ചോറ്റാനിക്കര ക്ഷേത്രത്തിന്റെ പാർക്കിംഗ് ഏരിയയിൽ വെച്ച് ഇവർ വീണ്ടും ലഹരി ഉപയോഗിച്ചു. ഈ സമയത്ത് ഇവർക്കിടയിൽ തർക്കമുണ്ടായതിനെ തുടർന്ന്, മാണിക്യൻ കുപ്പിയിലെ പെട്രോൾ അനുജനായ മണികണ്ഠനുമേൽ ഒഴിച്ച് തീയിടുകയായിരുന്നുവെന്ന് പരാതിയിൽ പറയുന്നു.

ഗുരുതരമായി പരിക്കേറ്റ മണികണ്ഠനെ ഉടൻതന്നെ കളമശേരി മെഡിക്കൽ കോളേജിൽ പ്രവേശിപ്പിച്ചു. 30 ശതമാനത്തിലധികം പൊള്ളലേറ്റതായാണ് ആശുപത്രി വൃത്തങ്ങൾ അറിയിച്ചത്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക. 

Article Summary: Elder brother sets younger brother on fire after a drunken dispute in Chottanikkara, Kochi.

#KochiCrime #Chottanikkara #FamilyDispute #Arrest #AttemptedMurder #KeralaNews