കണ്ണൂർ കണ്ണാടിപ്പറമ്പ് ക്ഷേത്രത്തിൽ ഗാനമേളയ്ക്കിടെ 'ഗണഗീതം'; വേദിയിൽ കയറി തടഞ്ഞ് ഡിവൈഎഫ്‌ഐ

കണ്ണൂർ: (KVARTHA) കണ്ണാടിപ്പറമ്പ് ശ്രീ മുത്തപ്പൻ ക്ഷേത്ര മഹോത്സവത്തിൻ്റെ ഭാഗമായി സംഘടിപ്പിച്ച ഗാനമേളയിൽ 'ഗണഗീതം' പാടിയത് തർക്കത്തിനും സംഘർഷാവസ്ഥയ്ക്കും വഴിവെച്ചു. ഗാനമേളയ്ക്കിടെ ആർഎസ്എസ് ഗണഗീതം ആലപിച്ചതിൽ പ്രതിഷേധിച്ച് ഡിവൈഎഫ്‌ഐ പ്രവർത്തകർ സ്റ്റേജിൽ കയറി പരിപാടി തടസ്സപ്പെടുത്തി. തിങ്കളാഴ്ച രാത്രിയാണ് സംഭവം.

മയ്യിൽ കണ്ണാടിപ്പറമ്പ് ക്ഷേത്രോത്സവത്തിൻ്റെ ഭാഗമായി തൃശ്ശൂർ 'പാട്ട് ഫാമിലി'യുടെ ഗാനമേള നടക്കുകയായിരുന്നു. ഇതിനിടയിലാണ് ഗായക സംഘം ആർഎസ്എസ് ഗണഗീതമായ ‘പരമ പവിത്രമതാമീ മണ്ണിൽ…’ എന്ന ഗാനം ആലപിച്ചത്.

പാട്ട് പകുതിയായപ്പോൾ സ്ഥലത്തുണ്ടായിരുന്ന ഡിവൈഎഫ്‌ഐ, സിപിഎം പ്രവർത്തകർ സ്റ്റേജിൽ കയറി ചോദ്യം ചെയ്യുകയും പാട്ട് നിർത്താൻ ആവശ്യപ്പെടുകയുമായിരുന്നു. പ്രതിഷേധം ശക്തമായതോടെ ഗായകസംഘം പാട്ട് പൂർത്തിയാക്കാതെ അവസാനിപ്പിച്ചു.

ഡിവൈഎഫ്‌ഐയുടെ ആരോപണം ക്ഷേത്രങ്ങൾ കേന്ദ്രീകരിച്ച് ആര്‍എസ്എസ് അജണ്ട നടപ്പിലാക്കുന്നതിന്റെ ഭാഗമായാണ് ഗാനമേളയിൽ ഗണഗീതം പാടിപ്പിച്ചതെന്ന് ഡിവൈഎഫ്‌ഐ കണ്ണാടിപ്പറമ്പ് ഈസ്റ്റ് മേഖലാ കമ്മിറ്റി ആരോപിച്ചു.

ക്ഷേത്രങ്ങളിൽ ഉത്സവങ്ങളും കലാപരിപാടികളും നടത്തുന്നത് നാടിൻ്റെ ഐക്യത്തെയും സാംസ്കാരിക പ്രവർത്തനങ്ങളെയും ശക്തിപ്പെടുത്താനാണ്. എന്നാൽ നാട്ടുകാരിൽ നിന്നും പണം പിരിച്ച് നടത്തുന്ന പരിപാടിയിൽ ആർഎസ്എസ് ഗണഗീതങ്ങൾ അവതരിപ്പിക്കുന്നത് ജനങ്ങളോടുള്ള വെല്ലുവിളിയാണ്.

വിശ്വാസത്തിൻ്റെ പേരിൽ ആർഎസ്എസ് അജണ്ടകൾ നടപ്പിലാക്കാൻ ശ്രമിക്കുന്ന വർഗീയവാദികളുടെ ഇത്തരം നീക്കങ്ങളെ ജനം തിരിച്ചറിയണമെന്നും, ഇതിനെതിരെ ശക്തമായ പ്രതിഷേധം സംഘടിപ്പിക്കുമെന്നും ഡിവൈഎഫ്‌ഐ ഭാരവാഹികൾ വാർത്താക്കുറിപ്പിൽ അറിയിച്ചു.

സംഘാടകരുടെ വിശദീകരണം എന്നാൽ, സംഭവത്തിൽ രാഷ്ട്രീയമില്ലെന്നാണ് ക്ഷേത്ര ഉത്സവ കമ്മിറ്റിയുടെയും സംഘാടകരുടെയും വിശദീകരണം. സദസ്സിൽ നിന്നും ശ്രോതാക്കളിൽ ചിലർ ആവശ്യപ്പെട്ടതുപ്രകാരമാണ് ഗാനമേള സംഘം ആ പാട്ട് പാടിയത്.

ക്ഷേത്ര ഉത്സവ കമ്മിറ്റിക്ക് ഇതിൽ പങ്കില്ലെന്നും, എല്ലാ വിഭാഗം ജനങ്ങളുടെയും കൂട്ടായ്മയുടെ നേതൃത്വത്തിൽ രാഷ്ട്രീയ ഭേദമന്യേയാണ് കാലാകാലങ്ങളിലായി ഉത്സവം നടത്തിവരാറുള്ളതെന്നും ഭാരവാഹികൾ പ്രതികരിച്ചു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യു

Article Summary: DYFI activists stopped a music program at Kannadiparamba Sri Muthappan Temple festival in Kannur alleging that an RSS song was sung. Tension prevailed as protesters entered the stage.

#KannurNews #DYFI #RSS #TempleFestival #KeralaPolitics #Kannadiparamba