റീൽസ് ചിത്രീകരണത്തിന്റെ മറവിൽ മയക്കുമരുന്ന് വിൽപ്പന; കണ്ണൂർ വിമാനത്താവള പരിസരത്ത് യുവതിയുൾപ്പെടെയുള്ള സംഘം പോലീസിന്റെ പിടിയിലായി

കണ്ണൂർ: (KVARTHA) അന്താരാഷ്ട്ര വിമാനത്താവള പരിസരങ്ങളിലെ ചെറിയ നഗരങ്ങളിൽ മയക്കുമരുന്ന് മാഫിയ പിടിമുറുക്കുന്നത് പോലീസിനും എക്‌സൈസിനും തലവേദനയാകുന്നു. ഓപ്പറേഷൻ ഡി-ഹണ്ടിന്റെ ഭാഗമായി കണ്ണൂർ ജില്ലയുടെ വിവിധ ഭാഗങ്ങളിൽ മയക്കുമരുന്ന് വിൽപ്പനയ്ക്കെതിരെ പോലീസും എക്‌സൈസും റെയ്ഡ് ശക്തമാക്കിയ സാഹചര്യത്തിലാണ് ജില്ലയിലെ പലയിടങ്ങളിൽനിന്നും യുവതി-യുവാക്കളുടെ ചെറുസംഘങ്ങൾ കുടുങ്ങുന്നത്. 

കണ്ണൂർ വിമാനത്താവളം സ്ഥിതി ചെയ്യുന്ന മട്ടന്നൂർ മൂർഖൻപറമ്പിന്റെ പ്രാന്തപ്രദേശങ്ങളായ ചാലോട്, മുട്ടന്നൂർ, ഉരുവച്ചാൽ, ഉളിയിൽ, നെല്ലൂന്നി ഭാഗങ്ങളിലൊക്കെ മയക്കുമരുന്ന് റാക്കറ്റുകൾ വിഹരിക്കുന്നുണ്ടെന്നാണ് എക്‌സൈസ് നൽകുന്ന വിവരം.

ശനിയാഴ്ച രാത്രി മട്ടന്നൂരിനടുത്തുള്ള ചാലോട് ടൗണിലെ ഇരിക്കൂർ റോഡിലുള്ള ഒരു ലോഡ്ജിൽനിന്ന് യുവതി ഉൾപ്പെടെ ആറുപേർ മയക്കുമരുന്ന് വിൽപ്പനയ്ക്കിടെ പിടിയിലായത് നാട്ടുകാരെ ഞെട്ടിച്ചു. യൂത്ത് കോൺഗ്രസ് നേതാവ് എടയന്നൂരിലെ ഷുഹൈബ് വധക്കേസിലെ പ്രതികളിലൊരാളായ എടയന്നൂർ തെരുരിലെ കെ. സഞ്ജയിന്റെ നേതൃത്വത്തിലാണ് സംഘം മയക്കുമരുന്ന് വിൽപ്പനയ്ക്കായി ലോഡ്ജിൽ തങ്ങിയത്. 

സഞ്ജയിന്റെ പെൺസുഹൃത്ത് രജിന രമേശ്, കൂട്ടാളികളായ എം.പി. മജ്‌നാസ്, എം.കെ. മുഹമ്മദ് റനീസ്, പി.കെ. സഹദ്, കെ. ശുഹൈബ് എന്നിവരാണ് പിടിയിലായത്. ബെംഗളൂരിൽനിന്ന് വലിയതോതിൽ മയക്കുമരുന്ന് കടത്തിക്കൊണ്ടുവന്ന് ചില്ലറ വിൽപ്പന നടത്തിവരികയായിരുന്നു പ്രതികൾ. 

ഇവരുടെ മൊബൈൽ ഫോൺ പരിശോധിച്ചതിൽനിന്ന് നിരവധി ഇടപാടുകാരുടെ ഫോൺ നമ്പറുകളും വിവരങ്ങളും പോലീസിന് ലഭിച്ചിട്ടുണ്ട്. 20-നും 35-നും ഇടയിൽ പ്രായമുള്ളവരാണ് മയക്കുമരുന്ന് ഇടപാടുകാർ.

ആരും സംശയിക്കാത്ത സ്ഥലമായതുകൊണ്ടാണ് ഇവർ വിമാനത്താവളത്തിനടുത്തുള്ള ചെറിയ ടൗണുകളായ ചാലോട്, മുട്ടന്നൂർ എന്നിവിടങ്ങളിൽ ലോഡ്ജിൽ മുറിയെടുത്തത്. റീൽസും ഷോർട്ട് ഫിലിമും ചിത്രീകരിക്കാനാണെന്ന് പറഞ്ഞാണ് നാട്ടുകാരനായ സഞ്ജയിനും എടയന്നൂരിലെ എം.പി. മജ്‌നാസും ലോഡ്ജിൽ മുറിയെടുത്തത്. 

കഴിഞ്ഞ വെള്ളിയാഴ്ച രാത്രി മുതൽ ഇവരെ കാണാനായി ജില്ലയുടെ വിവിധ പ്രദേശങ്ങളിൽനിന്ന് യുവാക്കൾ എത്തിത്തുടങ്ങിയിരുന്നു. ശനിയാഴ്ച പകൽ ഒട്ടേറെ ആളുകൾ ബൈക്കുകളിലും കാറുകളിലുമായി എത്താൻ തുടങ്ങിയതോടെ സംശയം തോന്നിയ നാട്ടുകാരിൽ ചിലർ പോലീസിനെ വിവരമറിയിക്കുകയായിരുന്നു. 

മട്ടന്നൂർ പോലീസും കണ്ണൂർ സിറ്റി പോലീസ് കമ്മീഷണറുടെ നിയന്ത്രണത്തിലുള്ള ഡാൻസെഫ് ടീമും നടത്തിയ റെയ്ഡിലാണ് 25 ഗ്രാമോളം എം.ഡി.എം.എ കവറിലാക്കിയ നിലയിൽ മേശവലിപ്പിനുള്ളിൽനിന്ന് കണ്ടെത്തിയത്. അപ്രതീക്ഷിത റെയ്ഡായതിനാൽ പ്രതികൾക്ക് ഓടി രക്ഷപ്പെടാനായില്ല. 

പ്രതികൾക്കെതിരെ എൻ.ഡി.പി.എസ്. ആക്ട് പ്രകാരം കേസെടുത്തു. ആറുപേരെയും മജിസ്‌ട്രേറ്റിന് മുന്നിൽ ഹാജരാക്കി റിമാൻഡ് ചെയ്തു. ഇവർക്കെതിരെയുള്ള തുടർനടപടികൾ വടകര എൻ.ഡി.പി.എസ്. കോടതിയിൽ നടക്കും.

ഈ വാർത്തയെക്കുറിച്ച് നിങ്ങളുടെ അഭിപ്രായമെന്താണ്? കൂടുതൽ ആളുകളിലേക്ക് എത്തിക്കാൻ ഷെയർ ചെയ്യൂ.

Article Summary: Police bust a drug ring near Kannur Airport, arresting six including a woman.

#DrugBust #Kannur #KeralaPolice #NDPSAct #CrimeNews #OperationD Hunt