മയക്കുമരുന്ന് വിൽപ്പനയ്ക്ക് ഗേ ഡേറ്റിങ് ആപ്പ് ഉപയോഗിച്ച സഹോദരങ്ങൾ പിടിയിൽ

കണ്ണൂർ: (KVARTHA) പരിശോധനകൾ ശക്തമാക്കിയതോടെ കണ്ണൂരിലെ ലഹരി മാഫിയ സംഘങ്ങൾ ലഹരി ഇടപാടുകൾക്കായി ഡേറ്റിങ് ആപ്പുകൾ ഉപയോഗിക്കുന്നതായി എക്സൈസിന് വിവരം ലഭിച്ചു. ഗ്രിൻഡർ എന്ന ഡേറ്റിങ് ആപ്പ് വഴിയാണ് യുവതീയുവാക്കൾക്കിടയിൽ ലഹരിയിടപാടുകൾ കൂടുതലും നടക്കുന്നത്. ആവശ്യക്കാരുടെ വ്യാജ അക്കൗണ്ടുകൾ ഉണ്ടാക്കിയാണ് ലഹരി മാഫിയ സംഘങ്ങളുടെ പ്രവർത്തനം.

ഇത്തരത്തിൽ ലഹരി കച്ചവടം നടത്തിയിരുന്ന പയങ്ങാടി പോലീസ് സ്റ്റേഷൻ പരിധിയിലെ സഹോദരങ്ങളെയാണ് കൊച്ചിയിൽ നിന്ന് എക്സൈസ് പിടികൂടിയത്. മുഹമ്മദ് റബീഹ്, സഹോദരൻ റിസ്വാൻ എന്നിവരാണ് പിടിയിലായത്. എറണാകുളം നോർത്ത് റെയിൽവേ സ്റ്റേഷന് സമീപമുള്ള ഗ്രാൻഡ് റെസിഡൻസി ലോഡ്ജിലെ 107-ാം നമ്പർ മുറിയിൽ നിന്നാണ് ഇരുവരും പിടിയിലായത്. ഇവരുടെ കൈവശം 37 ഗ്രാം എംഡിഎംഎ ഉണ്ടായിരുന്നു.

ഗ്രിൻഡർ ആപ്പിലൂടെ ഓർഡർ സ്വീകരിച്ചതിന് ശേഷം കൊച്ചിയിൽ എത്തിച്ചുനൽകണമെന്ന ആവശ്യപ്രകാരമാണ് ഇരുവരും എത്തിയത്. ഇടപാടുകാർക്ക് ലഹരി കൈമാറാൻ വന്നതായിരുന്നു ഇവർ. 

നേരിട്ടുള്ള കൈമാറ്റം ഒഴിവാക്കി വഴിയരികിൽ എവിടെയെങ്കിലും ഒളിപ്പിച്ചുവെച്ച് അതിന്റെ ലൊക്കേഷൻ ആപ്പ് വഴി നൽകുന്നതാണ് ഇവരുടെ രീതി. കൊച്ചിയിൽ ഇവർക്ക് പരിചയക്കാർ ആരുമില്ല.

ലഹരി കൈമാറാൻ മാത്രമായി എത്തിയതാണെന്ന് അന്വേഷണത്തിൽ കണ്ടെത്തി. സമാനമായ രീതിയിൽ പലർക്കും ഇവർ ലഹരി കൈമാറിയിട്ടുണ്ടെന്ന് എക്സൈസ് പറഞ്ഞു.

സമൂഹത്തിൽ ലഹരി വ്യാപനം തടയാൻ എന്ത് നടപടികളാണ് സ്വീകരിക്കേണ്ടത്? നിങ്ങളുടെ കാഴ്ചപ്പാടുകൾ കമന്റ് ചെയ്യുക.

Article Summary: Two brothers arrested in Kochi for drug dealing using a dating app.

#DrugArrest #KochiCrime #Grindr #MDMA #KeralaPolice #DrugTrafficking