നിതിൻ രാജിൻ്റെ മരണം; ഒന്നാം പ്രതി ഡോ എം കെ റാം ക്രൈംബ്രാഞ്ച് ആസ്ഥാനത്ത് കീഴടങ്ങി

കണ്ണൂർ: (KVARTHA) അഞ്ചരക്കണ്ടി ദന്തല്‍ കോളജ് ഒന്നാം വർഷ വിദ്യാര്‍ഥി ആർ എൽ നിതിന്‍രാജിന്‍റെ മരണത്തില്‍ ഒന്നാം പ്രതിയായ ഡോക്ടര്‍ എം കെ റാം കീഴടങ്ങി. ഉച്ചയ്ക്ക് ശേഷമാണ് കണ്ണൂർ തളാപ്പിലുള്ള ക്രൈംബ്രാഞ്ച് ഓഫീസിൽ ഡോക്ടർ റാം കീഴടങ്ങിയത്.

ചോദ്യം ചെയ്യൽ പുരോഗമിക്കുന്നു

ക്രൈംബ്രാഞ്ച് എസ് പി മോഹനചന്ദ്രൻ്റെ നേതൃത്വത്തിൽ ഡോ. റാമിനെ ചോദ്യം ചെയ്തുവരികയാണ്. ഇതിനു ശേഷം കണ്ണൂർ ജില്ലാ ആശുപത്രിയിൽ വൈദ്യപരിശോധന നടത്തി കോടതിയിൽ ഹാജരാക്കും. തലശ്ശേരി എസ് സി, എസ് ടി പ്രത്യേക കോടതി അറസ്റ്റിനുള്ള ക്രൈംബ്രാഞ്ച് അപേക്ഷ പരിഗണിച്ചതിനു ശേഷം അനുമതി നൽകിയിരുന്നു. ഇതോടെ റാമിനെ ക്രൈംബ്രാഞ്ച് സംഘം ഓഫീസിലേക്ക് വിളിച്ചുവരുത്തുകയായിരുന്നു.

ആദ്യ അറസ്റ്റിലെ വീഴ്ചയും വിമർശനവും

മുൻപ് ഇയാളെ അറസ്റ്റ് ചെയ്തതിലെ നടപടിക്രമങ്ങളിലുണ്ടായ വീഴ്ച മൂലം റാമിനെ കോടതി വിട്ടയച്ചിരുന്നു. ഈ സാഹചര്യത്തിലാണ് അന്വേഷണ സംഘം വീണ്ടും അറസ്റ്റ് ചെയ്യാനുള്ള അനുമതിക്കായി കോടതിയെ സമീപിച്ചത്. പ്രതിയെ അറസ്റ്റ് ചെയ്ത നടപടിയിലെ നിയമപരമായ വീഴ്ചകളിൽ പൊലീസിനെയും സർക്കാരിനെയും കഴിഞ്ഞ ദിവസം ഹൈക്കോടതി രൂക്ഷമായി വിമർശിച്ചിരുന്നു.

കേസ് ഏൽപ്പിക്കപ്പെട്ടിട്ടുള്ള പ്രത്യേക ജഡ്ജി അന്വേഷണ ഉദ്യോഗസ്ഥന്‍റെ ഭാഗത്തുനിന്നുള്ള നടപടികൾ പാലിക്കപ്പെട്ടിട്ടുണ്ടെന്ന് ഉറപ്പുവരുത്തണമെന്നും, ഇത്തരം ഔപചാരികതകൾ പാലിച്ചിട്ടുണ്ടെന്ന് ഉറപ്പുവരുത്തിയതിനു ശേഷം മാത്രമേ റിമാൻഡ് പരിഗണിക്കാൻ പാടുള്ളൂവെന്നും വ്യക്തമാക്കിക്കൊണ്ടാണ് തലശ്ശേരി പ്രിൻസിപ്പൽ സെഷൻസ് കോടതി നേരത്തെ റാമിനെ വിട്ടയച്ചത്.

അന്വേഷണം പുതിയ സംഘത്തിന്

അതീവ ഗുരുതരമായ ആരോപണങ്ങളാണ് നേരത്തെ കേസ് അന്വേഷണം നടത്തിയ ക്രൈംബ്രാഞ്ചിനെതിരെ ഉയർന്നത്. ഇതോടെയാണ് സർക്കാർ പുതിയ അന്വേഷണ സംഘത്തെ നിയോഗിച്ചത്. മലപ്പുറം ക്രൈംബ്രാഞ്ച് എസ് പി മോഹനചന്ദ്രന്‍റെ നേതൃത്വത്തിലുള്ള പുതിയ അന്വേഷണ സംഘം നിലവിൽ കണ്ണൂരില്‍ തമ്പടിച്ചിട്ടുണ്ട്. നിയമോപദേശത്തിന്‍റെ അടിസ്ഥാനത്തിലാകും തുടർനടപടികൾ ഉണ്ടാകുക.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Dr MK Ram surrendered at Kannur Crime Branch office in Nithin Raj case.

#NithinRajDeath #DrMKRam #AnjarakandyDentalCollege #CrimeBranch #ThalasseryCourt #KannurNews #MalayalamNews #AnjanaNews