ദിയ കൃഷ്ണയുടെ സ്ഥാപനത്തിൽ 66 ലക്ഷം രൂപയുടെ തട്ടിപ്പ്; ക്രെെംബ്രാഞ്ച് കുറ്റപത്രം സമർപ്പിച്ചു

തിരുവനന്തപുരം: (KVARTHA) നടൻ കൃഷ്ണകുമാറിൻ്റെ മകൾ ദിയ കൃഷ്ണയുടെ ഉടമസ്ഥതയിലുള്ള സ്ഥാപനത്തിൽ 66 ലക്ഷം രൂപയുടെ തട്ടിപ്പ് നടത്തിയ കേസിൽ ക്രെെംബ്രാഞ്ച് കുറ്റപത്രം സമർപ്പിച്ചു. 'ഓ ബൈ ഓസി' എന്ന ബൊട്ടീക്കിലെ മൂന്ന് ജീവനക്കാരികളും ഒരു ജീവനക്കാരിയുടെ ഭർത്താവുമാണ് കേസിൽ പ്രതികൾ. ദിയ കൃഷ്ണയുടെ ക്യൂആർ കോഡിന് പകരം ജീവനക്കാരികളുടെ ക്യൂആർ കോഡുകൾ ഉപയോഗിച്ചാണ് പ്രതികൾ പണം തട്ടിയെടുത്തത്.

വിനിത ജൂലിയറ്റ്, ദിവ്യ ഫ്രാങ്ക്ളിൻ, രാധാകുമാരി എന്നീ ജീവനക്കാരികളും വിനിതയുടെ ഭർത്താവ് ആദർശുമാണ് കേസിൽ പ്രതികളായ നാല് പേർ. വിശ്വാസ വഞ്ചന, മോഷണം, കൈവശപ്പെടുത്തൽ, ചതി എന്നീ കുറ്റങ്ങളാണ് ഇവർക്കെതിരെ ചുമത്തിയിരിക്കുന്നത്. ഏകദേശം രണ്ട് വർഷം കൊണ്ടാണ് പ്രതികൾ 66 ലക്ഷം രൂപ തട്ടിയെടുത്തതെന്നാണ് പൊലീസ് കണ്ടെത്തൽ.

പ്രതികൾ തട്ടിയെടുത്ത പണം ആഡംബര ജീവിതത്തിനായി ഉപയോഗിച്ചുവെന്നും അന്വേഷണത്തിൽ വ്യക്തമായിട്ടുണ്ട്. തട്ടിപ്പ് സംബന്ധിച്ച് കൃഷ്ണകുമാർ നൽകിയ പരാതിയുടെ അടിസ്ഥാനത്തിൽ മ്യൂസിയം പൊലീസ് കേസ് എടുത്തിരുന്നു.

തട്ടിപ്പ് പുറത്തായത് ഇൻസ്റ്റഗ്രാം സ്റ്റോറിയിലൂടെ

വ്യാജ ക്യൂആർ കോഡുകൾ ഉപയോഗിച്ച് ബൊട്ടീക്കിൻ്റെ പേരിൽ പണം തട്ടുന്നുണ്ടെന്ന് മനസ്സിലാക്കിയതിനെ തുടർന്ന് ദിയ കൃഷ്ണ നേരത്തെ ഇൻസ്റ്റഗ്രാമിൽ സ്റ്റോറി പോസ്റ്റ് ചെയ്തിരുന്നു. തട്ടിപ്പിനിരയായാൽ അറിയിക്കണമെന്നും അവർ ആവശ്യപ്പെട്ടിരുന്നു. തുടർന്ന് നിരവധി പേർ വ്യാജ ക്യൂആർ കോഡിൽ പണം നൽകിയതായി അറിയിച്ചതോടെയാണ് സ്ഥാപനത്തിൽ തട്ടിപ്പ് നടക്കുന്നതായി ദിയ കൃഷ്ണയ്ക്ക് ബോധ്യമായത്.

തുടർന്ന് നടത്തിയ പരിശോധനയിൽ സ്ഥാപനത്തിലെ ജീവനക്കാരികൾ തന്നെയാണ് അവരുടെ വ്യക്തിപരമായ പേയ്മെൻ്റ് ക്യൂആർ കോഡുകൾ ഉപഭോക്താക്കൾക്ക് നൽകി പണം തട്ടിയെടുത്തതെന്ന് മനസ്സിലാവുകയായിരുന്നു. തട്ടിപ്പ് തിരിച്ചറിഞ്ഞതോടെ ജീവനക്കാരികളെയും ബന്ധുക്കളെയും വിളിച്ചുവരുത്തി ചോദ്യം ചെയ്തപ്പോൾ അവർ പണം തട്ടിയ കാര്യം സമ്മതിച്ചതായി കൃഷ്ണകുമാർ പറയുന്നു.

എതിർ പരാതിയിൽ കഴമ്പില്ല

തട്ടിപ്പ് കേസിന് പിന്നാലെ കൃഷ്ണകുമാറിനും ദിയ കൃഷ്ണക്കുമെതിരെ പ്രതികളായ ജീവനക്കാരികൾ എതിർ പരാതി നൽകിയിരുന്നു. തട്ടിക്കൊണ്ടുപോയി ഭീഷണിപ്പെടുത്തിയെന്നും, പണം കവർന്നെന്നും സ്ത്രീത്വത്തെ അപമാനിച്ചെന്നുമാണ് പരാതിയിലുള്ളത്. എന്നാൽ, ഈ എതിർ പരാതിയിൽ കഴമ്പില്ലെന്ന് പൊലീസ് വ്യക്തമാക്കി. ജീവനക്കാരികളെ തട്ടിക്കൊണ്ടുപോയെന്ന കേസിലും അന്വേഷണം അന്തിമഘട്ടത്തിലാണ്.

66 ലക്ഷം രൂപയുടെ ഈ തട്ടിപ്പിനെക്കുറിച്ചുള്ള നിങ്ങളുടെ അഭിപ്രായം കമൻ്റ് ചെയ്യുക. ഈ വാർത്ത ഷെയർ ചെയ്ത് കൂടുതൽ പേരിലേക്ക് എത്തിക്കൂ. 

Article Summary: Crime Branch files charge sheet in Rs 66 lakh fraud at Diya Krishna's 'O By Osii' boutique against 4 accused.

#DiyaKrishna #CrimeBranch #Fraud #KVKvartha #Thiruvananthapuram #KeralaCrime