സൈബർ തട്ടിപ്പ് കേസ്: ഇൻകം ടാക്സ് ഓഫീസറുടെ 1.5 കോടി തട്ടിയ മുഖ്യപ്രതി അറസ്റ്റിൽ

പയ്യന്നൂർ: (KVARTHA) ഓൺലൈൻ വ്യാപാരത്തിൽ പണം നിക്ഷേപിച്ചാൽ വലിയ ലാഭം നേടാമെന്ന് വിശ്വസിപ്പിച്ച് ഏഴിലോട് സ്വദേശിയായ ഇൻകം ടാക്സ് ഓഫീസറിൽ നിന്നും ഒന്നര കോടിയിലധികം രൂപ തട്ടിയെടുത്ത സൈബർ തട്ടിപ്പ് സംഘത്തിലെ മുഖ്യപ്രതി അറസ്റ്റിൽ. അഹമ്മദ് കൈഫ് (24) എന്നയാളെയാണ് നെടുമ്പാശേരി വിമാനത്താവളത്തിൽ വെച്ച് റൂറൽ ജില്ലാ ക്രൈംബ്രാഞ്ച് സംഘം പിടികൂടിയത്.

2024-ലാണ് കേസിനാസ്പദമായ സംഭവം നടന്നത്. ഓൺലൈൻ വ്യാപാരം വഴി വൻ ലാഭമുണ്ടാക്കാമെന്ന് വിശ്വസിപ്പിച്ചാണ് സൈബർ തട്ടിപ്പു സംഘം ഇൻകം ടാക്സ് ഓഫീസറിൽ നിന്ന് പണം തട്ടിയെടുത്തതെന്നാണ് പരാതി. തട്ടിപ്പ് നടന്നതിന് പിന്നാലെ ഈ കേസിന്റെ സൂത്രധാരനായ മുഖ്യപ്രതി കുവൈത്തിലേക്ക് കടക്കുകയായിരുന്നുവെന്ന് അന്വേഷണ സംഘം അറിയിച്ചു.

പ്രതി വിദേശത്തേക്ക് കടന്നതോടെ, ഇയാളെ കണ്ടെത്താനായി റൂറൽ ജില്ലാ ക്രൈംബ്രാഞ്ച് ലുക്ക്ഔട്ട് നോട്ടീസ് പുറപ്പെടുവിച്ചിരുന്നു. ഈ നോട്ടീസിന്റെ അടിസ്ഥാനത്തിൽ എയർപോർട്ട് എമിഗ്രേഷൻ വിഭാഗം നൽകിയ സഹായത്തോടെയാണ് പ്രതി പിടിയിലായത്.

റൂറൽ ജില്ലാ പോലീസ് മേധാവി അനുജ് പലിവാളിന്റെ കർശന നിയന്ത്രണത്തിലായിരുന്നു കേസിന്റെ അന്വേഷണം. ജില്ലാ ക്രൈംബ്രാഞ്ച് ഡിവൈ.എസ്.പി. കീർത്തി ബാബുവിന്റെ നിർദേശപ്രകാരം ജില്ലാ ക്രൈം ബ്രാഞ്ച് എസ്.ഐ. മനോജ് കാനായി, എഎസ്.ഐ.എസ്.ജി. സതീശൻ, സീനിയർ സിവിൽ പോലീസ് ഓഫീസർ കെ.വി. അനീഷ്, ഡ്രൈവർ രതീഷ് എന്നിവരടങ്ങിയ പ്രത്യേക സംഘമാണ് പ്രതിയെ അറസ്റ്റ് ചെയ്തത്. അറസ്റ്റിലായ പ്രതിയെ പയ്യന്നൂർ കോടതിയിൽ ഹാജരാക്കിയതിനെ തുടർന്ന് റിമാൻഡ് ചെയ്തു.

ഈ വാർത്ത ഷെയർ ചെയ്യൂ. നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: Main accused in a ₹1.5 crore cyber fraud case arrested at Nedumbassery Airport after fleeing to Kuwait.

#CyberFraud #Arrest #KeralaPolice #KasaragodNews #Nedumbassery #IncomeTax