മീൻ മുറിക്കുകയായിരുന്ന വയോധികയുടെ മാല പൊട്ടിച്ചു; സിപിഎം കൗൺസിലർ അറസ്റ്റിൽ

കണ്ണൂർ: (KVARTHA) കൂത്തുപറമ്പ് കണിയാർകുന്നിൽ വയോധികയുടെ മാല പൊട്ടിച്ച സംഭവത്തിൽ സി.പി.എം നഗരസഭാ കൗൺസിലറെ അറസ്റ്റ് ചെയ്തതായി കൂത്തുപറമ്പ് പൊലീസ് അറിയിച്ചു. കൂത്തുപറമ്പ് നഗരസഭയിലെ നാലാം വാർഡായ നൂഞ്ഞുമ്പായിലെ സി.പി.എമ്മിന്റെ കൗൺസിലറായ പി.പി രാജേഷാണ് അറസ്റ്റിലായത്.

വ്യാഴാഴ്ച ഉച്ചയ്ക്ക് ഏകദേശം 12.30-ന് കൂത്തുപറമ്പ് കണിയാർകുന്നിലെ കുന്നുമ്മൽ ഹൗസിൽ നാണുവിന്റെ ഭാര്യ പി. ജാനകിയുടെ മാലയാണ് കവർച്ച ചെയ്യപ്പെട്ടതെന്നാണ് പരാതി. വീടിന്റെ പിൻവശത്ത് ഇരുന്ന് മത്സ്യം വൃത്തിയാക്കുകയായിരുന്ന വയോധികയുടെ ഒരു പവന്റെ സ്വർണ്ണമാല പൊട്ടിച്ച് ഇയാൾ സ്കൂട്ടറിൽ രക്ഷപ്പെടുകയായിരുന്നുവെന്ന് പരാതിയിൽ പറയുന്നു.

പ്രദേശത്തെക്കുറിച്ച് നല്ല ധാരണയുള്ളയാളാണ് കവർച്ച നടത്തിയതെന്ന സംശയം പൊലീസിന് തുടക്കത്തിൽ ഉണ്ടായിരുന്നു. വയോധിക വീട്ടിൽ തനിച്ചായിരുന്ന സമയത്താണ് റോഡരികിൽ സ്കൂട്ടർ നിർത്തിയിട്ട് ഇയാൾ വീട്ടിലെത്തിയത്. പിൻവശത്തെ അടുക്കള വാതിൽ തുറന്നാണ് വീടിനുള്ളിൽ കടന്നതെന്നും പരാതിയിൽ സൂചിപ്പിക്കുന്നു.

കവർച്ചയ്ക്ക് എത്തിയ പ്രതി ഹെൽമെറ്റ് അണിഞ്ഞിരുന്നുവെന്നും ഇയാൾ ഉപയോഗിച്ച ജുപ്പിറ്റർ സ്കൂട്ടറിന്റെ നമ്പർ പ്ലേറ്റ് മാറ്റിയാണ് എത്തിയതെന്നും പൊലീസ് അന്വേഷണത്തിൽ കണ്ടെത്തി. സംഭവം നടന്ന പ്രദേശത്തെ സി.സി.ടി.വി ദൃശ്യങ്ങൾ കേന്ദ്രീകരിച്ച് നടത്തിയ അന്വേഷണത്തിലാണ് രാജേഷ് കുടുങ്ങിയതെന്നും പൊലീസ് വ്യക്തമാക്കി.

കൂത്തുപറമ്പ് സഹകരണ ആശുപത്രിയിലെ സെക്യൂരിറ്റി ജീവനക്കാരൻ കൂടിയാണ് അറസ്റ്റിലായ പി.പി രാജേഷ്. ഇയാളെ വിശദമായി ചോദ്യം ചെയ്തുവരികയാണെന്ന് കൂത്തുപറമ്പ് പൊലീസ് അറിയിച്ചു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Article Summary: CPM councillor arrested in Kannur for chain snatching from an elderly woman cleaning fish.