10 ഇഞ്ച് ഓർഡർ ചെയ്തു, കിട്ടിയത് 7 ഇഞ്ച് പിസ; ഫുഡ് ഡെലിവറി ആപ്പിനും കഫേയ്ക്കും 10,520 രൂപ പിഴ വിധിച്ച് ഉപഭോക്തൃ കോടതി
ADVERTISEMENT
● ഉത്തരാഖണ്ഡിലെ ഹരിദ്വാർ ജില്ലാ ഉപഭോക്തൃ തർക്ക പരിഹാര കമ്മീഷൻ്റെതാണ് വിധി
● ജ്വാലാപൂർ സ്വദേശിയായ രാജ് ട്രേഹൻ നൽകിയ പരാതിയിലാണ് നടപടി
● 2020 മാർച്ചിൽ 505 രൂപയ്ക്കാണ് ഇദ്ദേഹം കഫേ ഫോസ്റ്റ് ഫാക്ടറിയിൽ നിന്ന് പിസ ഓർഡർ ചെയ്തത്
● ഡെലിവറിയിൽ പിഴവ് വന്നെന്ന് തിരിച്ചറിഞ്ഞിട്ടും റീഫണ്ടിന് കമ്പനി തയാറായിരുന്നില്ല
● വിധി വന്ന് 45 ദിവസത്തിനുള്ളിൽ നഷ്ടപരിഹാരം നൽകണമെന്നാണ് കോടതിയുടെ നിർദേശം
ഡെറാഡൂൺ: (KVARTHA) 10 ഇഞ്ച് നീളമുള്ള പിസ ഓർഡർ ചെയ്ത് ഉപയോക്താവിന് ഏഴ് ഇഞ്ച് മാത്രം നീളമുള്ള പിസ നൽകിയ ഫുഡ് ഡെലിവറി ആപ്പിനും കഫേയ്ക്കും പിഴ. ഉത്തരാഖണ്ഡിലെ ഉപഭോക്തൃ കമ്മീഷനാണ് പിഴ വിധിച്ചത്. ഇരുകക്ഷികളും ചേർന്ന് 10,520 രൂപ ഉപയോക്താവിന് നഷ്ടപരിഹാരം നൽകണമെന്നാണ് ഹരിദ്വാർ ജില്ലാ ഉപഭോക്തൃ തർക്ക പരിഹാര കമ്മീഷൻ്റെ വിധി.
കമ്മീഷൻ പ്രസിഡൻ്റ് ഗഗൻ കുമാർ ഗുപ്തയും അംഗങ്ങളായ ഡോ. അമരേഷ് റാവത്ത്, രഞ്ജന ഗോയൽ എന്നിവരാണ് പരാതി പരിഗണിച്ചത്. പരാതിക്കാരൻ ഓർഡർ ചെയ്ത പിസയെക്കാൾ മൂന്ന് ഇഞ്ച് കുറഞ്ഞതാണ് ഡെലിവറി ചെയ്തതെന്ന് കമ്മീഷൻ നിരീക്ഷിച്ചു. തുടർന്ന് പരാതിക്കാരന് നേരിടേണ്ടി വന്നത് അനീതിപരമായ വ്യാപാര രീതിയും മോശം സേവനവുമാണെന്നും കമ്മീഷൻ ചൂണ്ടിക്കാട്ടി.
പരാതി നൽകിയത് ജ്വാലാപൂർ സ്വദേശി
ജ്വാലാപൂർ സ്വദേശിയായ രാജ് ട്രേഹനാണ് പരാതിക്കാരൻ. 2020 മാർച്ചിൽ തപോവനിലെ കഫേ ഫോസ്റ്റ് ഫാക്ടറിയിൽ നിന്നാണ് രാജ് 505 രൂപയ്ക്ക് പിസ ഓർഡർ ചെയ്തത്. ബണ്ടിൽ ടെക്നോളജീസ് പ്രൈവറ്റ് ലിമിറ്റഡ് (സ്വിഗ്ഗി) വഴിയായിരുന്നു പിസ വാങ്ങിയത്.
ഡെലിവറിയിൽ പിഴവ് വന്നെന്ന് തിരിച്ചറിഞ്ഞിട്ടും എതിർകക്ഷികൾ റീഫണ്ടിന് തയാറാവാത്തതിനാലാണ് രാജ് നാഷണൽ കൺസ്യൂമർ ഹെൽപ്പ് ലൈൻ വഴി പരാതി നൽകിയത്. കഫേയ്ക്ക് ഉപയോക്താവിനും ഇടയിലുള്ള ഒരു ഇടനിലക്കാരൻ മാത്രമാണ് തങ്ങൾ എന്നായിരുന്നു ഫുഡ് ഡെലിവറി ആപ്പിൻ്റെ വാദം. എന്നാൽ ഈ വാദം കമ്മീഷൻ തള്ളി.
നഷ്ടപരിഹാര തുകയും പലിശയും
നഷ്ടപരിഹാര തുകയിൽ 505 രൂപ പിസയുടെ വിലയും 15 രൂപ ഡെലിവറി ചാർജുമാണ്. മാനസികവും ശാരീരികവുമായ ഉപദ്രവത്തിന് 5,000 രൂപയും, നിയമനടപടിക്ക് ചെലവായ തുകയായി 5,000 രൂപയും അടക്കമാണ് പരാതിക്കാരന് എതിർകക്ഷികൾ നൽകേണ്ടത്.
വിധി വന്ന് 45 ദിവസത്തിനുള്ളിൽ നഷ്ടപരിഹാരം പരാതിക്കാരന് നൽകണമെന്നാണ് നിർദേശം. നിശ്ചിത സമയപരിധിക്കുള്ളിൽ നഷ്ടപരിഹാരം പരാതിക്കാരന് ലഭിച്ചില്ലെങ്കിൽ പ്രതിവർഷം 10 ശതമാനം എന്ന നിരക്കിൽ പലിശ നൽകാനും എതിർകക്ഷികൾ ബാധ്യസ്ഥരായിരിക്കുമെന്ന് ഉത്തരവിൽ പറയുന്നു.
ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം
Article Summary: An Uttarakhand consumer court ordered Swiggy and a local cafe to pay a Rs 10,520 compensation to a customer for delivering a 7-inch pizza instead of a 10-inch one, dismissing the app's claim of being a mere intermediary.
#Kvartha #ConsumerCourt #Swiggy #DehradunNews #Uttarakhand #PizzaOrder #NationalNews #MalayalamNews #ConsumerRights #AmmuNews
