പോലീസ് സ്റ്റേഷൻ വളപ്പിലിരുന്ന് മദ്യപാനം; ഗ്രേഡ് എസ്ഐ ഉൾപ്പെടെ മൂന്ന് പോലീസുകാർക്ക് സസ്പെൻഷൻ

ചേലക്കര: (KVARTHA) പോലീസ് സ്റ്റേഷൻ വളപ്പിലിരുന്ന് മദ്യപിച്ച മൂന്ന് പോലീസുകാർക്ക് സസ്പെൻഷൻ. ചേലക്കര പോലീസ് സ്റ്റേഷനിലെ ഗ്രേഡ് എസ്ഐ ജോളി സെബാസ്റ്റ്യൻ, സിവിൽ പോലീസ് ഓഫീസർമാരായ അഖിൽ കൃഷ്‌ണൻ, സജിത് എന്നിവർക്കെതിരെയാണ് കർശന നടപടി സ്വീകരിച്ചിരിക്കുന്നത്. കഴിഞ്ഞ വ്യാഴാഴ്ചയാണ് സസ്പെൻഷന് ആസ്പദമായ സംഭവം നടന്നത്.

വടക്കാഞ്ചേരി എസ്എച്ച്ഒയുടെ മിന്നൽ പരിശോധന

പോലീസുകാർ സ്റ്റേഷനിലിരുന്ന് മദ്യപിക്കുന്നുവെന്ന് സിറ്റി പോലീസ് കമീഷണർക്ക് രഹസ്യ വിവരം ലഭിച്ചിരുന്നു. ഇതേത്തുടർന്ന് ചേലക്കര എസ്എച്ച്ഒയെ അറിയിക്കാതെ വടക്കാഞ്ചേരി എസ്എച്ച്ഒയോട് സംഭവം അന്വേഷിക്കാൻ കമീഷണർ ചുമതലപ്പെടുത്തി. തുടർന്ന് വ്യാഴാഴ്ച രാത്രി 11 മണിയോടെ ചേലക്കര സ്റ്റേഷനിലെത്തി നടത്തിയ പരിശോധനയിൽ ഗ്രേഡ് എസ്ഐയും രണ്ട് സിവിൽ പോലീസ് ഓഫീസർമാരും ഉൾപ്പെടെ മദ്യപിച്ചതായി കണ്ടെത്തുകയായിരുന്നു. സ്റ്റേഷന് പുറകുവശത്തെ പൊളിഞ്ഞ കെട്ടിടത്തിലിരുന്ന് ഡ്യൂട്ടിയിലില്ലാത്ത പോലീസുകാരാണ് മദ്യപിച്ചതെന്നാണ് അനൗദ്യോഗിക വിവരം.

നടപടി സ്വീകരിച്ച് ഡിഐജി

സംഭവത്തിൽ കുന്നംകുളം എസിപി മുഖാന്തിരം സിറ്റി പോലീസ് കമീഷണർക്ക് അന്വേഷണ റിപ്പോർട്ട് നൽകിയിരുന്നു. ഈ റിപ്പോർട്ടിൻ്റെ അടിസ്ഥാനത്തിൽ ഇവരെ തൃശൂർ റേഞ്ച് ഡിഐജി സസ്പെൻഡ് ചെയ്യുകയായിരുന്നു.

ഡിവൈഎഫ്ഐ പ്രതിഷേധ മാർച്ച്

പോലീസ് സ്റ്റേഷനിൽ എസ്ഐയുടെ നേതൃത്വത്തിൽ മദ്യപിച്ചതിനെതിരെ ഡിവൈഎഫ്ഐ ചേലക്കര ബ്ലോക്ക് കമ്മിറ്റിയുടെ നേതൃത്വത്തിൽ പ്രതിഷേധ പ്രകടനം നടത്തി. സിപിഎം ഏരിയ കമ്മിറ്റിയംഗം ഒ എസ് സജി മാർച്ച് ഉദ്ഘാടനം ചെയ്തു. ഡിവൈഎഫ്ഐ ചേലക്കര ബ്ലോക്ക് പ്രസിഡൻ്റ് പി കൃഷ്‌ണപ്രസാദ് അധ്യക്ഷനായി. ട്രഷറർ കെ രഞ്ജിത്ത്, ജില്ലാ കമ്മിറ്റി അംഗം എം വിഷ്ണു, ബ്ലോക്ക് വൈസ് പ്രസിഡൻ്റ് എം പി വൃന്ദ എന്നിവർ സംസാരിച്ചു.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. കൂടുതൽ വാർത്തകൾ അറിയാൻ ഞങ്ങളുടെ ഫേസ്ബുക്ക് പേജും വാട്സാപ്പ് ചാനലും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Three police officers, including a Grade SI, were suspended by the Thrissur Range DIG for consuming alcohol within the Chelakkara police station premises, prompting a protest march by the local DYFI committee.

#Chelakkara #KeralaPolice #PoliceSuspension #DYFIProtest #ThrissurNews #MalayalamNews #AmmuNews