കാലിഫോർണിയയിലെ മലയാളി യുവതികളുടെ കൊലപാതകം: തലേദിവസവും ഒന്നിച്ചു സിനിമ കണ്ടവർ; പിന്നിൽ തൊഴിൽ നഷ്ടപ്പെട്ടതിലുള്ള നൈരാശ്യമെന്ന് സംശയം

കാലിഫോർണിയ: (KVARTHA) യുഎസിലെ കാലിഫോർണിയയിൽ രണ്ട് മലയാളി യുവതികൾ കൊല്ലപ്പെട്ട കേസിൽ ദുരൂഹത തുടരുകയാണ്. കൊലപാതകത്തിന് തലേദിവസവും മൂവരും ഒന്നിച്ച് സിനിമ കണ്ടിരുന്നതായും ഉല്ലാസവതികളായിരുന്നുവെന്നുമാണ് ബന്ധുക്കൾ നൽകുന്ന മൊഴി. ഒരേ അപ്പാർട്ട്മെൻ്റിൽ ഒന്നിച്ച് താമസിച്ചുവരികയായിരുന്ന യുവതികളിൽ ആൻ മേരി മാത്യു ഏതാനും മാസങ്ങൾക്ക് മുമ്പ് 10 കിലോമീറ്റർ അപ്പുറത്തുള്ള സ്ഥലത്തേക്ക് താമസം മാറ്റിയിരുന്നു. 

കൊലപ്പെടുത്താൻ എത്തിയതെന്നറിയാതെ അനിലയെ ആൻ വീട്ടിലേക്ക് സ്വീകരിച്ചത് വളരെ ഹൃദ്യമായാണെന്ന് ബന്ധു വെളിപ്പെടുത്തി. ആ സമയത്ത് ആൻ ബന്ധുവുമായി ഫോണിൽ സംസാരിക്കുകയായിരുന്നു. അവർക്കിടയിൽ യാതൊരു പ്രശ്നങ്ങളും ഇല്ലായിരുന്നുവെന്ന് ആ സംഭാഷണത്തിൽ നിന്ന് വ്യക്തമായിരുന്നുവെന്നാണ് ബന്ധു പറയുന്നത്.

ആസൂത്രിതമായ കൊലപാതകം

അതേസമയം ഒരേ അപ്പാർട്ട്മെൻ്റിൽ താമസിച്ചിരുന്ന അഞ്ജനയെ അനില താഴേക്ക് വിളിച്ച് ഇറക്കുകയായിരുന്നു. ഓണാഘോഷത്തിനായി ഇവർ തയ്ക്കാൻ നൽകിയ വസ്ത്രം ലഭിച്ചുവെന്ന് പറഞ്ഞാണ് അഞ്ജനയെ താഴേക്ക് വിളിച്ചതെന്നാണ് വിവരം. യാതൊരു അസ്വാഭാവികതയും തോന്നാത്തതിനാൽ, ജോലി സ്ഥലത്തായിരുന്ന ഭർത്താവിനെ വിവരമറിയിച്ച ശേഷമാണ് അഞ്ജന താഴേക്ക് പോയത്. 

താഴേക്ക് എത്തിയ അഞ്ജനയെ കാറിടിച്ച് കൊലപ്പെടുത്തുകയായിരുന്നുവെന്നാണ് പൊലീസ് റിപ്പോർട്ട്. ഈ വിവരം പറയുന്നതിനായി ആൻ മേരി മാത്യുവിനെ ഫോണിൽ വിളിച്ചിട്ടും ലഭിക്കാതെ വന്നതോടെയാണ് ആനിൻ്റെ ഭർത്താവ് ഫ്ലാറ്റിലേക്ക് എത്തിയത്. അവിടെ ആൻ കുത്തേറ്റ് ചോരവാർന്ന് കിടക്കുന്നതാണ് കണ്ടതെന്ന് ഭർത്താവ് മൊഴി നൽകി. ആനിൻ്റെ ഫോണും നഷ്ടപ്പെട്ടിട്ടുണ്ട്. ഇത് അനില കൊണ്ടുപോയതാകാമെന്നാണ് പൊലീസ് സംശയിക്കുന്നത്.

തുടർനടപടികളും മൃതദേഹം നാട്ടിലെത്തിക്കലും

കൊലപാതകത്തിന് പിന്നിലെ യഥാർഥ കാരണമെന്തെന്ന് വ്യക്തമല്ലെങ്കിലും, ജോലി നഷ്ടപ്പെട്ടതിലും വർക്ക് പെർമിറ്റ് കാലാവധി കഴിഞ്ഞതിലും അനില അസ്വസ്ഥയായിരുന്നുവെന്ന് സൂചന ലഭിച്ചിട്ടുണ്ട്. കുറ്റാരോപിതയായ അനിലയെ പൊലീസ് സാൻഹോസെ സൈക്ലിക് ജയിലിലേക്ക് മാറ്റിയെന്നാണ് വിവരം. 

കൊല്ലപ്പെട്ട യുവതികളിൽ ഒരാളുടെ പോസ്റ്റ്മോർട്ടം പൂർത്തിയായി. രണ്ടാമത്തെ ആളുടെ പോസ്റ്റ്മോർട്ടം വ്യാഴാഴ്ച (സെപ്റ്റംബർ 3) നടക്കും. വെള്ളിയാഴ്ചയോടുകൂടി (സെപ്റ്റംബർ 4) എംബസിയിൽ പേപ്പറുകൾ ശരിയാകുമെന്നും, ഈയാഴ്ച അവസാനത്തോടെ മൃതദേഹം നാട്ടിലെത്തിക്കാൻ ആകുമെന്നും പ്രതീക്ഷിക്കുന്നു. കേന്ദ്രമന്ത്രി സുരേഷ് ഗോപിയാണ് കുടുംബത്തെ ഇക്കാര്യം അറിയിച്ചത്.

പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: Mystery continues to surround the murder of two Malayali women, Ann Mary Mathew and Anjana, in California by their friend Anila, who is suspected of acting out of frustration over job loss and work permit expiry; their bodies are expected to reach Kerala by the weekend.

#Kvartha #CaliforniaMurder #MalayaliWomenKilled #USAMurderCase #KeralaNews #MalayalamNews #NRI #SureshGopi #CrimeNews #AmmuNews