സംഭാൽ: (KVARTHA) ഉത്തർപ്രദേശിലെ സംഭാൽ ജില്ലയിൽ ബിജെപി നേതാവിനെ വിഷം കുത്തിവച്ച് കൊലപ്പെടുത്തിയെന്ന കേസിൽ, പോസ്റ്റ്‌മോർട്ടം റിപ്പോർട്ടിൽ ശരീരത്തിൽ വിഷാംശം കണ്ടെത്തിയില്ലെന്ന് പൊലീസ് അറിയിച്ചു. ഗുൽഫാം സിംഗ് യാദവ് എന്ന ബിജെപി നേതാവിനാണ് ദാരുണാന്ത്യം സംഭവിച്ചത്. 66 കാരനായ ഇദ്ദേഹത്തിന്റെ ആന്തരിക അവയവങ്ങൾ വിശദമായ പരിശോധനയ്ക്കായി ഫോറൻസിക് ലാബിലേക്ക് അയക്കുമെന്നും പൊലീസ് കൂട്ടിച്ചേർത്തു.

തിങ്കളാഴ്ച ഉച്ചകഴിഞ്ഞ് ദേബ്താര ഹിമാചൽ ഗ്രാമത്തിലെ ഫാമിൽ വെച്ചാണ് സംഭവം നടന്നത്. ഗുൽഫാം സിംഗ് യാദവിനെ മൂന്ന് പേർ ചേർന്ന് കാലിൽ തൊട്ട് വന്ദിച്ചു. തുടർന്ന് വെള്ളം നൽകാനായി വീട്ടിലെ സഹായിയോട് ഗുൽഫാം ആവശ്യപ്പെട്ടു. ഒരാൾ പുറത്തേക്ക് പോയതിന് ശേഷം, മറ്റ് രണ്ടുപേർ ഗുൽഫാമിനൊപ്പം ഇരുന്നു. അതിൽ ഒരാൾ ഗുൽഫാമിന്റെ വയറ്റിൽ വിഷം കുത്തിവച്ച് ബൈക്കിൽ രക്ഷപ്പെട്ടുവെന്ന് പൊലീസ് പറഞ്ഞു. ഉടൻതന്നെ ഗുൽഫാമിനെ അടുത്തുള്ള ആശുപത്രിയിലും പിന്നീട് അലിഗഢിലേക്കും കൊണ്ടുപോയെങ്കിലും യാത്രാമധ്യേ അദ്ദേഹം മരണപ്പെട്ടു.

സംഭവത്തിൽ ഗുൽഫാമിന്റെ മകൻ വിനയ് പ്രകാശ് ചൊവ്വാഴ്ച ജുനവായ് പൊലീസ് സ്റ്റേഷനിൽ മൂന്ന് അജ്ഞാതർക്കെതിരെ പരാതി നൽകി. ഭാരതീയ ന്യായ സംഹിതയിലെ സെക്ഷൻ 101 (കൊലപാതകം) പ്രകാരം എഫ്‌ഐആർ രജിസ്റ്റർ ചെയ്തു. ഒളിവിൽപോയ പ്രതികളെ കണ്ടെത്താനായി എട്ട് പൊലീസ് ടീമുകളെ നിയോഗിച്ചിട്ടുണ്ടെന്ന് ജുനവായ് പൊലീസ് സ്റ്റേഷൻ എസ്എച്ച്ഒ സുനിൽ കുമാർ സിംഗിനെ ഉദ്ധരിച്ച് ദി ന്യൂ ഇന്ത്യൻ എക്‌സ്പ്രസ് റിപ്പോർട്ട് ചെയ്തു.

'പോസ്റ്റ്‌മോർട്ടം റിപ്പോർട്ട് രേഖാമൂലം ലഭിച്ചിട്ടില്ലെങ്കിലും, പ്രാഥമിക റിപ്പോർട്ടിൽ ശരീരത്തിൽ വിഷാംശം കണ്ടെത്തിയിട്ടില്ലെന്നാണ് വിവരം. ആന്തരിക അവയവങ്ങൾ വിശദമായ പരിശോധനയ്ക്കായി ആഗ്രയിലെ ഫോറൻസിക് ലാബിലേക്ക് അയക്കും', എന്നും അദ്ദേഹം കൂട്ടിച്ചേർത്തു. സിറിഞ്ചിന്റെ കവറും, പ്രതികൾ ഉപേക്ഷിച്ചുപോയ ഹെൽമെറ്റും പൊലീസ് കണ്ടെടുത്തിട്ടുണ്ട്.

പ്രതികളെക്കുറിച്ച് നിർണായക വിവരങ്ങൾ ലഭിച്ചിട്ടുണ്ടെന്നും ഉടൻതന്നെ അവരെ പിടികൂടാൻ സാധിക്കുമെന്നാണ് പ്രതീക്ഷയെന്നും സംഭാൽ സൂപ്രണ്ട് കൃഷ്ണ കുമാർ ബിഷ്ണോയ് പറഞ്ഞു. 'ഈ കേസിൽ എല്ലാ സാധ്യതകളും ഞങ്ങൾ പരിശോധിക്കുന്നുണ്ട്. ദൃക്‌സാക്ഷികൾ ഇല്ലാത്തതിനാൽ, നിലവിൽ ഇതൊരു വ്യക്തമല്ലാത്ത കൊലപാതകമായിട്ടാണ് കണക്കാക്കുന്നത്', അഡീഷണൽ പൊലീസ് സൂപ്രണ്ട് അനുക്രിതി ശർമ്മ കൂട്ടിച്ചേർത്തു. ശരീരത്തിൽ സൂചി കുത്തിയ പാടല്ലാതെ മറ്റ് പരിക്കുകളൊന്നും ഉണ്ടായിരുന്നില്ലെന്നും അവർ വ്യക്തമാക്കി.

മുതിർന്ന ബിജെപി നേതാവായ ഗുൽഫാം സിംഗ് യാദവ് 2004 ൽ ഗുന്നയൂർ നിയമസഭാ മണ്ഡലത്തിൽ നിന്നും അന്നത്തെ മുഖ്യമന്ത്രിയായിരുന്ന മുലായം സിംഗ് യാദവിനെതിരെ മത്സരിച്ചതിലൂടെയാണ് ശ്രദ്ധേയനായത്. സർക്കാർ ജോലി ഉപേക്ഷിച്ച് 1976 ൽ ആർഎസ്എസിൽ ചേർന്ന ഗുൽഫാം, സംഘപരിവാർ സംഘടനകളുമായി അടുത്ത ബന്ധം പുലർത്തിയിരുന്നു. പിന്നീട് ബിജെപി വെസ്റ്റ് യുപി യൂണിറ്റിൻ്റെ വൈസ് പ്രസിഡന്റായി. 2022 ലെ പാർലമെന്റ് തിരഞ്ഞെടുപ്പിലും 2024 ലെ നിയമസഭാ തിരഞ്ഞെടുപ്പിലും സംഭാൽ ലോക്സഭാ, നിയമസഭാ സീറ്റുകളുടെ ചുമതലയും അദ്ദേഹം വഹിച്ചു. യുപി സ്റ്റേറ്റ് കമ്മീഷൻ ഫോർ ബാക്ക്വേർഡ് ക്ലാസ്സസ് അംഗമായും അദ്ദേഹം സേവനമനുഷ്ഠിച്ചിട്ടുണ്ട്Z

ദേബ്താര ഹിമാചൽ ഗ്രാമത്തിലെ തുടർച്ചയായി മൂന്നാം തവണയും പഞ്ചായത്ത് പ്രസിഡന്റായി തിരഞ്ഞെടുക്കപ്പെട്ട ഭാര്യ ജാവിത്രി, രണ്ട് ആൺമക്കൾ, ആറ് പെൺമക്കൾ എന്നിവരടങ്ങുന്നതാണ് ഗുൽഫാമിന്റെ കുടുംബം.

BJP leader Gulfam Singh Yadav was allegedly killed by unknown assailants with a poisonous injection in Sambhal, Uttar Pradesh. The post-mortem report did not find any traces of poison, and further forensic tests are being conducted.

#SambhalMurder #BJPLeader #Investigation #CrimeNews #UttarPradesh #PoliceInvestigation