ബെല്ലാരിയിൽ കോൺഗ്രസ് പ്രവർത്തകൻ വെടിയേറ്റ് മരിച്ച സംഭവത്തിൽ നടപടി തുടരുന്നു; ഡിഐജിയെ സ്ഥലം മാറ്റി; പുതിയ ഐജിയെയും എസ്പിയെയും നിയമിച്ചു

ബംഗളൂരു: (KVARTHA) ബല്ലാരിയിൽ കഴിഞ്ഞ വ്യാഴാഴ്ച കോൺഗ്രസ് - ബിജെപി എംഎൽഎമാരുടെ നേതൃത്വത്തിൽ ഇരുവിഭാഗങ്ങൾ തമ്മിലുണ്ടായ സംഘർഷത്തിൽ കോൺഗ്രസ് പ്രവർത്തകൻ വെടിയേറ്റ് മരിച്ച സംഭവവുമായി ബന്ധപ്പെട്ട് ബല്ലാരി റേഞ്ച് ഡിഐജി വർത്തിക കത്യാറിനെ കർണാടക സർക്കാർ ബുധനാഴ്ച ഉടൻ പ്രാബല്യത്തോടെ സ്ഥലം മാറ്റി. പകരം ഡോ. പി.എസ്. ഹർഷയെ ബല്ലാരി റേഞ്ച് ഐജിയായി നിയമിച്ചു.

സംഭവത്തെത്തുടർന്ന് നേരത്തെ ജില്ലാ പോലീസ് സൂപ്രണ്ട് പവൻ നെജ്ജൂറിനെ സസ്പെൻഡ് ചെയ്തിരുന്നു. ഈ ഒഴിവിൽ സുമൻ ഡി പെണ്ണേക്കറെ പുതിയ എസ്പിയായി നിയമിച്ചു. വർത്തിക കത്യാറിനെ ഡയറക്ടറേറ്റ് ഓഫ് സിവിൽ റൈറ്റ്സ് എൻഫോഴ്‌സ്‌മെന്റിൽ ഡിഐജിയായാണ് മാറ്റിയിരിക്കുന്നത്. ഇന്റലിജൻസ് ഡെപ്യൂട്ടി പോലീസ് കമ്മീഷണർ സ്ഥാനത്തുനിന്നാണ് സുമൻ എസ്പിയായി എത്തുന്നത്. സ്ഥലംമാറ്റ ഉത്തരവിൽ പ്രത്യേക കാരണങ്ങളൊന്നും പറയുന്നില്ല.

ജനുവരി ഒന്നിന് രാത്രി ബല്ലാരിയിലെ ചില ഭാഗങ്ങളിൽ കടുത്ത സംഘർഷാവസ്ഥ നിലനിന്നിരുന്നു. ബല്ലാരിയിലെ കോൺഗ്രസ് എംഎൽഎ നര ഭാരത് റെഡ്ഡിയുടെയും ഗംഗാവതി ബിജെപി എംഎൽഎ ജി ജനാർദൻ റെഡ്ഡിയുടെയും അനുയായികൾ തമ്മിൽ ബാനർ സ്ഥാപിക്കുന്നതുമായി ബന്ധപ്പെട്ട തർക്കമാണ് സംഘർഷത്തിലേക്ക് നയിച്ചത്. സംഘർഷത്തിനിടെ കല്ലേറും വെടിവെപ്പുമുണ്ടാവുകയും കോൺഗ്രസ് പ്രവർത്തകൻ രാജശേഖർ കൊല്ലപ്പെടുകയും ചെയ്തു.

ബല്ലാരിയിലെ ജനാർദന റെഡ്ഡിയുടെ വസതിക്ക് മുന്നിൽ വാൽമീകി പ്രതിമ അനാച്ഛാദനവുമായി ബന്ധപ്പെട്ട ബാനർ ഭരത് റെഡ്ഡിയുടെ അനുയായികൾ സ്ഥാപിച്ചതിനെ തുടർന്നായിരുന്നു തർക്കം ആരംഭിച്ചത്. സാഹചര്യം കൈകാര്യം ചെയ്യുന്നതിൽ ഫലപ്രദമായി പ്രവർത്തിച്ചില്ലെന്നും മുതിർന്ന ഉദ്യോഗസ്ഥരെ സ്ഥിതിഗതികൾ കൃത്യമായി അറിയിക്കുന്നതിൽ പരാജയപ്പെട്ടുവെന്നും ആരോപിച്ചാണ് സംഭവത്തിന്റെ തലേന്നാൾ എസ്പിയായി ചുമതലയേറ്റ നെജ്ജൂറിനെ സസ്പെൻഡ് ചെയ്തത്. സമാനമായ ആരോപണം ബുധനാഴ്ച സ്ഥലം മാറ്റിയ ഡിഐജി വർത്തിക കത്യാർക്കെതിരെയും ഉയർന്നിരുന്നു.

ഈ വാർത്ത പങ്കുവെക്കൂ. 

Article Summary: Karnataka government transferred Bellary DIG and appointed new SP following the death of a Congress worker in political violence.

#Ballary #KarnatakaPolice #PoliticalViolence #Congress #BJP #NewsUpdate #KarnatakaPolitics