രാമക്ഷേത്രത്തിലെ കോടികൾ എങ്ങോട്ട് പോയി? ചെറുകിട ജീവനക്കാരെ കുടുക്കി വൻസ്രാവുകൾ രക്ഷപ്പെടാൻ ശ്രമിക്കുന്നതായി പ്രതിയുടെ കുടുംബത്തിന്റെ ഗുരുതര ആരോപണം; '16000 രൂപ മാത്രം ശമ്പളമുള്ളയാൾ സൂത്രധാരനോ?'

അയോധ്യ: (KVARTHA) രാമക്ഷേത്രത്തിൽ ഭക്തർ സമർപ്പിച്ച കോടികളുടെ സംഭാവനകളിൽ വൻ ക്രമക്കേട് നടന്നെന്ന വാർത്ത രാജ്യം മുഴുവൻ വൻ ഭീതിയും ഞെട്ടലുമാണ് ഉണ്ടാക്കിയിരിക്കുന്നത്. കോടിക്കണക്കിന് ഹിന്ദുക്കളുടെ വിശ്വാസത്തിന്റെ പ്രതീകമായ ഈ പുണ്യഭൂമിയിൽ നടന്ന ധനസമ്പാദന തട്ടിപ്പ് വെളിച്ചത്തുകൊണ്ടുവരാൻ ഉത്തർപ്രദേശ് പൊലീസും പ്രത്യേക അന്വേഷണ സംഘവും അന്വേഷണം ഊർജിതജമാക്കിയിട്ടിട്ടുണ്ട്. എന്നാൽ ഈ കേസിൽ ഇപ്പോൾ അറസ്റ്റിലായ താഴേത്തട്ടിലുള്ള ജീവനക്കാരെ മാത്രം പ്രതികളാക്കി യഥാർത്ഥ കുറ്റവാളികളായ ഉന്നത സ്വാധീനമുള്ള വ്യക്തികളെ രക്ഷപ്പെടുത്താൻ വൻ അണിയറ നീക്കങ്ങൾ നടക്കുന്നുണ്ടെന്നാണ് ഏറ്റവും പുതിയ റിപ്പോർട്ടുകൾ സൂചിപ്പിക്കുന്നത്. 

കേസിലെ പ്രധാന പ്രതികളിലൊരാളായ രാമശങ്കർ മിശ്രയുടെ കുടുംബം പോലീസിന്റെയും ഭരണകൂടത്തിന്റെയും നിലപാടുകൾക്കെതിരെ പരസ്യമായി രംഗത്തെത്തിയതോടെ കേസിന് പുതിയൊരു മാനമാണ് കൈവന്നിരിക്കുന്നത്.  സമൂഹത്തിലെ വലിയ മനുഷ്യരും സ്വാധീനമുള്ളവരുമാണ് ഈ വലിയ തട്ടിപ്പിന് പിന്നിലെന്നും എന്നാൽ അതിന്റെ ഇരകളാകുന്നത് സാധാരണക്കാരായ ചെറുകിട ജീവനക്കാരാണെന്നുമാണ് രാമശങ്കറിന്റെ സഹോദരഭാര്യയായ സാധനാ മിശ്രയെ ഉദ്ധരിച്ച് എ എൻ ഐ റിപ്പോർട്ട്‌ ചെയ്തത്. 

രാമക്ഷേത്രത്തിൽ വരുന്ന സംഭാവനകളും വഴിപാടുകളും എണ്ണുന്ന ജോലിയിൽ കഴിഞ്ഞ ആറ് വർഷമായി ഏർപ്പെട്ടിരുന്ന രാമശങ്കറിന് വെറും പതിനാറായിരം മുതൽ പതിനേഴായിരം രൂപ വരെ മാത്രമാണ് പ്രതിമാസ ശമ്പളമായി ലഭിച്ചിരുന്നതെന്നും ഇത്രയും ചെറിയ തുകയ്ക്ക് ജോലി ചെയ്യുന്ന ഒരാൾക്ക് ഇത്രയും വലിയൊരു തട്ടിപ്പ് ഒറ്റയ്ക്ക് ആസൂത്രണം ചെയ്യാൻ കഴിയില്ലെന്നും അവർ ഉറപ്പിച്ചു പറയുന്നു.

ദുരൂഹമായ അകലം

തങ്ങളുടെ കുടുംബത്തിന് രാമശങ്കറുമായി കഴിഞ്ഞ രണ്ടര വർഷത്തിലേറെയായി യാതൊരുവിധ ബന്ധവുമില്ലെന്ന  വിവരവും സാധന മാധ്യമങ്ങൾക്ക് മുന്നിൽ പങ്കുവെക്കുകയുണ്ടായി. അയോധ്യയിലെ ഒരു വാടകമുറിയിൽ തികച്ചും ഒറ്റപ്പെട്ട ജീവിതമാണ് അയാൾ നയിച്ചിരുന്നതെന്നും കുടുംബവുമായി യാതൊരു പണമിടപാടുകളോ ഫോൺ സംഭാഷണങ്ങളോ പോലും ഉണ്ടായിരുന്നില്ലെന്നും അവർ വ്യക്തമാക്കുന്നു. 

അതുകൊണ്ടുതന്നെ അയോധ്യയിലെ പ്രാദേശിക നിവാസികൾ സംസാരിക്കുന്നതിൽ നിന്നാണ് തങ്ങളുടെ കുടുംബാംഗം ഒരു വലിയ തട്ടിപ്പ് കേസിൽ പ്രതിയായിട്ടുണ്ടെന്ന വിവരം തങ്ങൾ അറിയുന്നത്. കേസിൽ തികച്ചും സുതാര്യവും നിഷ്പക്ഷവുമായ അന്വേഷണം വേണമെന്നും യഥാർത്ഥ കുറ്റവാളികൾ ആരായാലും അവരെ നിയമത്തിന് മുന്നിൽ കൊണ്ടുവരണമെന്നും ആവശ്യപ്പെടുന്ന സാധന, അന്വേഷണം കൃത്യമായി നടന്നില്ലെങ്കിൽ പാവപ്പെട്ടവർ മാത്രം ജയിലിൽ കിടക്കേണ്ടി വരുന്ന അവസ്ഥയുണ്ടാകുമെന്നും ആശങ്കപ്പെടുന്നു.

പൊലീസ് നടപടികൾ

സംഭാവന തട്ടിപ്പ് കേസിൽ പ്രതിയായ അവിനാഷ് ശുക്ലയെ ഉത്തർപ്രദേശ് പോലീസ് കഴിഞ്ഞ ദിവസം രാത്രിയോടെ അയോധ്യ ജില്ലാ ജയിലിലേക്ക് മാറ്റിയിരിക്കുകയാണ്. അവിനാഷ് ശുക്ലയുടെ വീട്ടിൽ സർക്കിൾ ഓഫീസർ അഷുതോഷ് കുമാറിന്റെ നേതൃത്വത്തിലുള്ള സംഘം നേരത്തെ തന്നെ റെയ്ഡ് നടത്തുകയും തട്ടിപ്പുമായി ബന്ധപ്പെട്ട നിർണായക രേഖകളും തെളിവുകളും ശേഖരിക്കുകയും ചെയ്തിരുന്നു. 

നിലവിൽ അയോധ്യയിലെ സ്പെഷ്യൽ ഓപ്പറേഷൻസ് ഗ്രൂപ്പ് ഓഫീസിൽ വെച്ച് സർക്കിൾ ഓഫീസർ അഷുതോഷ് തിവാരി അടക്കമുള്ള ഉന്നത ഉദ്യോഗസ്ഥരുടെ സാന്നിധ്യത്തിൽ അവിനാഷിനെ കടുത്ത ചോദ്യം ചെയ്യലിന് വിധേയനാക്കുകയാണ്. ഇയാളിൽ നിന്ന് ലഭിക്കുന്ന വിവരങ്ങളുടെ അടിസ്ഥാനത്തിൽ തട്ടിപ്പിൽ പങ്കാളികളായ കൂടുതൽ പേരിലേക്ക് അന്വേഷണം വ്യാപിപ്പിക്കാനാണ് പോലീസിന്റെ അടിയന്തര തീരുമാനം.

ഈ കേസിലെ ഗൂഢാലോചനയും പണത്തിന്റെ ഉറവിടവും കണ്ടെത്താനായി നിയോഗിക്കപ്പെട്ടിട്ടുള്ള പ്രത്യേക അന്വേഷണ സംഘത്തിന്  അന്വേഷണം പൂർത്തിയാക്കാൻ സർക്കാർ 15 ദിവസത്തെ സമയം കൂടി നീട്ടി നൽകിയിട്ടുണ്ട്. കേസിന്റെ വ്യാപ്തി വളരെ വലുതാണെന്നും ക്ഷേത്ര ട്രസ്റ്റിനകത്തും പുറത്തുമുള്ള നിരവധി പ്രമുഖർക്ക് ഇതിൽ പങ്കുണ്ടാകാൻ സാധ്യതയുണ്ടെന്നുമുള്ള നിഗമനത്തിലാണ് കാലാവധി നീട്ടിയതെന്നാണ് സൂചന.

 ഭക്തരുടെ പണം എങ്ങോട്ടാണ് വകമാറ്റിയതെന്നും ഇതിനായി വ്യാജ ബാങ്ക് അക്കൗണ്ടുകളോ രേഖകളോ നിർമ്മിച്ചിട്ടുണ്ടോ എന്നും പരിശോധിക്കാൻ സാമ്പത്തിക വിദഗ്ധരുടെ സഹായവും അന്വേഷണസംഘം തേടിയിട്ടുണ്ട്. തെറ്റ് ചെയ്ത ഒരാളെപ്പോലും നിയമത്തിന് മുന്നിൽ നിന്ന് രക്ഷപ്പെടാൻ അനുവദിക്കില്ലെന്ന കർശന നിലപാടിലാണ്  അധികാരികൾ.

അയോധ്യയിലെ രാമക്ഷേത്ര നിർമ്മാണത്തിനും അതിന്റെ ദൈനംദിന ചിലവുകൾക്കുമായി ലോകമെമ്പാടുമുള്ള ദശലക്ഷക്കണക്കിന് ഭക്തരാണ് പണം വാരിക്കോരി നൽകുന്നത്. പ്രതിദിനം ലക്ഷക്കണക്കിന് രൂപയും സ്വർണവും വെള്ളിയും ക്ഷേത്രത്തിലെ കാണിക്ക വഞ്ചിയിൽ വീഴാറുണ്ട്. ഇവ കൃത്യമായി തിട്ടപ്പെടുത്താനും ബാങ്കിൽ നിക്ഷേപിക്കാനുമായി വലിയൊരു വിഭാഗം ജീവനക്കാരെയാണ് ക്ഷേത്ര ട്രസ്റ്റ് നിയോഗിച്ചിരിക്കുന്നത്. 

എന്നാൽ ഈ സംവിധാനത്തിലെ സുരക്ഷാ വീഴ്ചകൾ മുതലെടുത്തുകൊണ്ട് വലിയൊരു സംഘം തന്നെ ക്ഷേത്രത്തിനുള്ളിൽ സജീവമായിരുന്നെന്നാണ് സൂചനകൾ. മാസങ്ങൾക്ക് മുൻപ് തന്നെ പണത്തിൽ കൃത്രിമം നടക്കുന്നുണ്ടെന്ന സൂചനകൾ ഉയർന്നിരുന്നെങ്കിലും കഴിഞ്ഞ ജൂൺ 25 നാണ് ട്രസ്റ്റിന്റെ പരാതിയിൽ പോലീസ് ഔദ്യോഗികമായി എഫ്.ഐ.ആർ രജിസ്റ്റർ ചെയ്യുന്നത്.

ഈ വാർത്ത നിങ്ങളുടെ സുഹൃത്തുക്കൾക്കും ബന്ധുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വിവരങ്ങൾക്കായി ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമന്റായി രേഖപ്പെടുത്താം.

Article Summary: The families of the arrested staff in the Ayodhya Ram Temple donation scam claim that low-level employees are being framed to protect influential individuals. Investigation teams have extended the inquiry timeline, suspecting wider involvement in the alleged financial irregularities.

#AyodhyaRamTemple #DonationScam #SITInvestigation #UttarPradeshPolice #CorruptionCase #AyodhyaNews #AmmuNews