അയോധ്യ രാമക്ഷേത്ര സംഭാവനാ തട്ടിപ്പ്; അറസ്റ്റിലായ എട്ട് പ്രതികളുടെ വീടുകളിൽ എസ്‌ഐടി റെയ്ഡ്

ലഖ്‌നൗ: (KVARTHA) അയോധ്യ രാമക്ഷേത്ര നിർമാണത്തിനായി ഭക്തർ നൽകിയ സംഭാവനകൾ തട്ടിയെടുത്ത കേസിലെ പ്രതികളുടെ വീടുകളിൽ എസ്‌ഐടി റെയ്ഡ് നടത്തി. കേസുമായി ബന്ധപ്പെട്ട് ഇതുവരെ അറസ്റ്റിലായ എട്ടു പ്രതികളുടെ വീടുകളിലാണ് ഞായറാഴ്ച രാവിലെ ഏഴ് മണിയോടെ പരിശോധന ആരംഭിച്ചത്. 

തട്ടിപ്പിലൂടെ പ്രതികൾ അനധികൃതമായി സമ്പാദിച്ച സ്വത്തുക്കൾ കണ്ടുകെട്ടാനാണ് എസ്‌ഐടിയുടെ നീക്കം. ഈ റെയ്ഡിലൂടെ കൂടുതൽ രേഖകളും പണവും വീണ്ടെടുക്കാൻ കഴിയുമെന്നാണ് അന്വേഷണ സംഘത്തിൻ്റെ പ്രതീക്ഷ. പ്രതികളുടെ ബന്ധുക്കളെയും അയൽവാസികളെയും പൊലീസ് ചോദ്യം ചെയ്യുകയും അവരുടെ മൊഴികൾ രേഖപ്പെടുത്തുകയും ചെയ്യുന്നുണ്ട്.

200 കോടിയുടെ തട്ടിപ്പ്

പ്രാഥമിക പരിശോധനയിൽ തന്നെ 80 ലക്ഷം രൂപ എസ്‌ഐടി പിടിച്ചെടുത്തിരുന്നു. പ്രതികളുടെ വീടുകളിൽ സ്വർണമായും മറ്റ് മൂല്യവസ്തുക്കളായും കോടിക്കണക്കിന് രൂപയുടെ സ്വത്തുക്കൾ സൂക്ഷിച്ചിട്ടുണ്ടെന്ന വിവരം നേരത്തെ തന്നെ പ്രത്യേക അന്വേഷണ സംഘത്തിന് ലഭിച്ചിരുന്നു. 

200 കോടിയുടെ തട്ടിപ്പാണ് നടന്നതെന്നാണ് പ്രാഥമിക കണ്ടെത്തൽ. ഭക്തർ നൽകിയ പണവും സ്വർണ, വെള്ളിക്കട്ടികളും ചേർത്ത് പ്രതികൾ വൻതോതിൽ ഭൂസ്വത്തുക്കൾ വാങ്ങിക്കൂട്ടിയതായി എസ്‌ഐടി കണ്ടെത്തിയിട്ടുണ്ട്. ഈ രേഖകൾ പിടിച്ചെടുക്കുന്നതിനാണ് പരിശോധനകൾ ഊർജിതമാക്കിയിരിക്കുന്നത്.

ടിനു യാദവ്, അനിരൽപ് മിശ്ര, ലവ്കുശ് മിശ്ര, മനീഷ് യാദവ്, സുഭാഷ് ശ്രീവാസ്തവ, അവിനാഷ് ശുക്ല, കരുണേഷ് പാണ്ഡെ, രാം ശങ്കർ മിശ്ര എന്നിവരാണ് കേസിൽ അറസ്റ്റിലായിരിക്കുന്നത്. ഇതിൽ ചമ്പത്ത് റായിയുടെ അസിസ്റ്റൻ്റാണ് ടിനു യാദവ്. ഇയാളിൽ നിന്ന് കാണിക്ക വഞ്ചികളുടെ താക്കോലുകൾ കണ്ടെത്തിയിട്ടുണ്ട്. 

സംഭാവനകൾ എണ്ണിത്തിട്ടപ്പെടുത്തിയ വ്യക്തിയാണ് അനിരൽപ് മിശ്ര. ഇയാളുടെ ബന്ധുവാണ് ലവ്കുശ് മിശ്ര, ഇയാളുടെ വീട്ടിൽ നിന്ന് 10 ലക്ഷം രൂപ പിടിച്ചെടുത്തിരുന്നു. ടിനു യാദവിൻ്റെ ബന്ധുവായ മനീഷ് യാദവിൻ്റെ വീട്ടിൽ നിന്നും പണം കണ്ടെത്തിയിട്ടുണ്ട്. 

പണം എണ്ണിത്തിട്ടപ്പെടുത്തിയ മറ്റൊരാളാണ് അവിനാഷ് ശുക്ല. സംഭാവനകളുടെ കണക്കെടുപ്പിന്റെ ഭാഗമായിരുന്നവരാണ് കരുണേഷ് പാണ്ഡെയും രാം ശങ്കർ മിശ്രയും. തട്ടിപ്പിൻ്റെ സൂത്രധാരൻ രാം ശങ്കർ മിശ്രയാണെന്നാണ് വിവരം. ഇയാളിൽ നിന്നും കാണിക്കപ്പെട്ടിയുടെ താക്കോൽ കണ്ടെടുത്തത് കേസിൽ നിർണായക തെളിവായി മാറിയിട്ടുണ്ട്.

സർക്കാരിനെതിരെ വിമർശനം

ട്രസ്റ്റ് സെക്രട്ടറിയായിരുന്ന ചമ്പത്ത് റായിക്കെതിരെ ഇതുവരെ പൊലീസ് കേസെടുത്തിട്ടില്ല. ചമ്പത്ത് റായി, ട്രസ്റ്റ് അംഗം അനിൽ മിശ്ര അടക്കം 17 പേർക്കെതിരെ കേസെടുക്കണമെന്നായിരുന്നു എസ്‌ഐടിയുടെ ശുപാർശ. എന്നാൽ തൽക്കാലം കേസെടുക്കേണ്ടതില്ലെന്നും വിശദമായ അന്വേഷണത്തിന് ശേഷം മാത്രം തുടർനടപടികൾ ആലോചിക്കാമെന്നുമാണ് യുപി സർക്കാരിൻ്റെ നിലപാട്. 

ഭക്തർ നൽകിയ സംഭാവനകളും സ്വർണക്കട്ടികളും വെള്ളിക്കട്ടികളുമടക്കം ഇവർ ഭൂസ്വത്തുക്കളാക്കി മാറ്റിയെന്നാണ് എസ്‌ഐടി കണ്ടെത്തൽ. ഇത് പിടിച്ചെടുക്കാനാണ് എസ്‌ഐടി നീക്കം നടത്തുന്നത്.

വിവാദം കടുത്തതോടെ ചമ്പത്ത് റായ് സ്ഥാനം രാജിവെച്ചിരുന്നു. ഇദ്ദേഹത്തിന് ക്ലീൻ ചിറ്റ് നൽകിയിട്ടില്ലെന്ന് എസ്‌ഐടി കഴിഞ്ഞ ദിവസം വ്യക്തമാക്കിയിരുന്നു. അതേസമയം, സംഭവത്തിൽ മുഖ്യമന്ത്രി യോഗി ആദിത്യനാഥിനെതിരെ രൂക്ഷ വിമർശനവുമായി സമാജ്‌വാദി പാർട്ടി നേതാവ് അഖിലേഷ് യാദവ് രംഗത്തെത്തി. 

യോഗി ഇടയ്ക്കിടെ അയോധ്യ സന്ദർശിച്ചിരുന്നത് അവിടെ നടന്നുകൊണ്ടിരുന്ന കൊള്ളയ്ക്ക് മേൽനോട്ടം വഹിക്കാനായിരുന്നോ എന്ന് അഖിലേഷ് ചോദിച്ചു. സിസിടിവി ദൃശ്യങ്ങളിൽ കൃത്രിമം നടന്നുവെന്നത് എസ്‌ഐടിയുടെ കണ്ടെത്തലാണ്. അങ്ങനെയെങ്കിൽ യോഗി ആദിത്യനാഥ് അയോധ്യയിൽ നിരന്തരം സന്ദർശനം നടത്തിയിട്ടും ഈ കൊള്ള നേരത്തെ കണ്ടെത്താൻ സാധിച്ചില്ലേ എന്നും അദ്ദേഹം പരിഹസിച്ചു.

രാമക്ഷേത്ര സംഭാവനയുമായി ബന്ധപ്പെട്ട ഈ വാർത്ത സുഹൃത്തുക്കൾക്കും ബന്ധുക്കൾക്കും വാട്സാപ്പ് ഗ്രൂപ്പുകളിൽ ഷെയർ ചെയ്യുക. ഏറ്റവും പുതിയ വാർത്തകൾ അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമന്റായി രേഖപ്പെടുത്താം.

Article Summary: SIT conducted raids at the residences of eight arrested suspects in the Ayodhya Ram Temple donation fraud case, aiming to seize assets worth crores.

#AyodhyaRamTemple #SITRaid #DonationFraud #UPGovernment #AkhileshYadav #RamTempleTrust #AmmuNews