കണ്ണൂർ: (KVARTHA) ആലക്കോട് ഒടുവള്ളി പ്രാഥമികാരോഗ്യ കേന്ദ്രത്തിലെ ജീവനക്കാരി ഉഷാകുമാരിയുടെ ആത്മഹത്യയുമായി ബന്ധപ്പെട്ട് മെഡിക്കൽ ഓഫിസർക്കെതിരായ ആരോപണങ്ങളിൽ വഴിത്തിരിവ്. ഉഷാകുമാരിയുടെ ആരോപണങ്ങൾ ശരിയാണെന്ന് ചൂണ്ടിക്കാട്ടുന്ന ഓഡിറ്റ് റിപ്പോർട്ട് പുറത്തുവന്നു. കൊവിഡ് കാലത്ത് മെഡിക്കൽ ഓഫീസറുടെ നേതൃത്വത്തിൽ സാമ്പത്തിക ക്രമക്കേടുകൾ നടന്നുവെന്നും ഇത് ചോദ്യം ചെയ്തതിനാണ് ഉഷാകുമാരിക്കെതിരെ ചിലർ നീക്കം നടത്തിയതെന്നുമാണ് ആരോപണം.

ജില്ലാതല കണക്ക് പരിശോധന വിഭാഗം നടത്തിയ ഓഡിറ്റിൽ സാമ്പത്തിക ക്രമക്കേട് കണ്ടെത്തിയതായി റിപ്പോർട്ടിൽ പറയുന്നു. പ്രാഥമികാരോഗ്യ കേന്ദ്രത്തിലെ സീനിയർ ക്ലർക്ക് ആയിരുന്ന ഉഷാകുമാരിയുടെ ആത്മഹത്യാക്കുറിപ്പിലും സാമ്പത്തിക ക്രമക്കേടുകളെക്കുറിച്ച് പരാമർശമുണ്ടായിരുന്നു.

ജനുവരി 26-നാണ് ഉഷാകുമാരിയെ തളിപ്പറമ്പിലെ വീട്ടു കിണറ്റിൽ മരിച്ച നിലയിൽ കണ്ടെത്തിയത്. ഫണ്ട് തിരിമറിയിൽ തന്നെ പങ്കാളിയാക്കാൻ ശ്രമിച്ചെന്നും, കൂട്ടുനിൽക്കാത്തതിൻ്റെ പേരിൽ മെഡിക്കൽ ഓഫീസർ മാനസികമായി പീഡിപ്പിച്ചെന്നുമാണ് ഉഷാകുമാരിയുടെ ആത്മഹത്യാക്കുറിപ്പിലെ ആരോപണം. ഇതിൻ്റെ അടിസ്ഥാനത്തിൽ ജില്ലാ മെഡിക്കൽ ഓഫീസർ അന്വേഷണം പ്രഖ്യാപിച്ചിരുന്നു.

ജില്ലാ കണക്ക് പരിശോധന വിഭാഗം നടത്തിയ ഓഡിറ്റിൽ സാമ്പത്തിക ക്രമക്കേടുകൾ നടന്നതായി കണ്ടെത്തി. എൻ.എച്ച്.എം ഫണ്ട്, പ്രോജക്ട് ഫണ്ട് എന്നിവയിലുള്ള സാമ്പത്തിക ഇടപാടുകളിൽ കൃത്യതയില്ലെന്നും, ബില്ലുകളുടെ ആധികാരികത ഉറപ്പുവരുത്താതെ സാമ്പത്തിക ഇടപാട് നടത്തിയെന്നും റിപ്പോർട്ടിൽ പറയുന്നു.

പല ഫണ്ടുകളും സ്ഥാപനങ്ങളുടെ അക്കൗണ്ടിലേക്ക് നൽകാതെ വ്യക്തിഗത അക്കൗണ്ടിലേക്ക് കൈമാറിയെന്നും, പരിശീലന പരിപാടികൾക്കായി സർട്ടിഫിക്കറ്റ് പ്രിൻ്റ് ചെയ്തതിലടക്കം തിരിമറി നടന്നെന്നും റിപ്പോർട്ടിൽ ആരോപണമുണ്ട്. മെഡിക്കൽ ഓഫീസർ കൃത്യമായി ഒ.പിയിൽ രോഗികളെ പരിശോധിച്ചിട്ടില്ലെന്നും റിപ്പോർട്ടിൽ പറയുന്നു. 2022 മുതൽ മൂന്ന് വർഷ കാലയളവിലെ ഓഡിറ്റ് റിപ്പോർട്ടിൻ്റെ വിവരങ്ങളാണ് പുറത്തുവന്നത്. ഉഷാകുമാരിയുടെ ആത്മഹത്യക്ക് പിന്നാലെ കുടുംബം മെഡിക്കൽ ഓഫീസർക്കെതിരെ തളിപ്പറമ്പ് ഡിവൈ.എസ്.പിക്ക് പരാതി നൽകിയിരുന്നു.

ഓഡിറ്റിൽ കണ്ടെത്തിയ സാമ്പത്തിക ക്രമക്കേടുകൾക്ക് മൂന്നാഴ്ചയ്ക്കുള്ളിൽ മറുപടി നൽകാൻ പോലീസ് നിർദേശം നൽകി. ആരോപണം ഉന്നയിച്ചതിൻ്റെ പേരിൽ സർവീസിൽ നിന്ന് വിരമിക്കാൻ മാസങ്ങൾ ബാക്കി നിൽക്കെ ഉഷാകുമാരിക്ക് കടുത്ത മാനസിക പീഡനം നേരിടേണ്ടി വന്നെന്നാണ് ബന്ധുക്കളുടെ ആരോപണം.

ശ്രദ്ധിക്കുക: ആത്മഹത്യ ഒന്നിനും ഒരു പരിഹാരമല്ല. ജീവിതം വിലമതിക്കേണ്ടതാണ്. ആത്മഹത്യ ചിന്തകൾ ഉണ്ടെങ്കിൽ ദിശ ഹെല്പ് ഡെസ്കിൽ സഹായം തേടുക, നമ്പർ: 1056, അല്ലെങ്കിൽ iCALL- നമ്പർ: 9152987821.  നിങ്ങളുടെ പ്രശ്നങ്ങൾക്ക് പരിഹാരമുണ്ട്.

An audit report confirms financial irregularities at Odavally PHC, supporting the allegations made by Usha Kumari, who died by suicide. The report reveals financial discrepancies during the COVID period, with funds diverted to personal accounts. Usha Kumari's Death note also mentioned these irregularities. Police have asked for a response to the audit findings within three weeks.

#FinancialIrregularities, #OdavallyPHC, #AuditReport, #Death, #Kannur, #Kerala