അമിത വേഗതയിലെത്തിയ കാറിടിച്ച് ബൈക്ക് യാത്രികൻ മരിച്ചു; ഭാര്യക്ക് പരിക്ക്

ആലപ്പുഴ: (KVARTHA) നിയന്ത്രണം വിട്ടെത്തിയ കാർ ദമ്പതികൾ സഞ്ചരിച്ച ബൈക്കിലിടിച്ച് ഭർത്താവ് മരിച്ചു. ഭാര്യക്ക് ഗുരുതരമായി പരിക്കേറ്റു. ആലപ്പുഴ നഗരസഭ പി എച്ച് വാർഡിൽ ശാന്തി ആശ്രമത്തിന് സമീപം താമസിക്കുന്ന വാഹിദ് (43) ആണ് ദാരുണമായി മരിച്ചത്. 

ഭാര്യ സെലീനക്ക് (41) ആണ് അപകടത്തിൽ സാരമായ പരിക്കേറ്റത്. കഴിഞ്ഞ ശനിയാഴ്ച രാത്രി 12 മണിയോടെ ജനറൽ ആശുപത്രി-വെള്ളക്കിണർ റോഡിലായിരുന്നു നാടിനെ നടുക്കിയ അപകടം.
 

വെള്ളക്കിണർ ജങ്ഷനിൽ തട്ടുകട നടത്തുന്ന ദമ്പതിമാർ പതിവുപോലെ കടയടച്ച് ബൈക്കിൽ വീട്ടിലേക്ക് മടങ്ങുമ്പോഴാണ് അപകടം സംഭവിച്ചത്. അമിത വേഗതയിലെത്തിയ കാർ ഇവർ സഞ്ചരിച്ചിരുന്ന ബൈക്കിൽ ഇടിക്കുകയും ബൈക്ക് റോഡിലേക്ക് തെറിച്ച് വീഴുകയുമായിരുന്നു. 

അപകടത്തിൽ ഗുരുതരമായി പരിക്കേറ്റ വാഹിദിനെയും സെലീനയെയും ഉടൻതന്നെ ആലപ്പുഴ മെഡിക്കൽ കോളേജ് ആശുപത്രിയിൽ പ്രവേശിപ്പിച്ചെങ്കിലും വാഹിദിന്റെ ജീവൻ രക്ഷിക്കാനായില്ല. സെലീനയുടെ നില ഗുരുതരമായി തുടരുകയാണ്.
 

അപകടമുണ്ടാക്കിയ കാർ ബൈക്കിനെ ഇടിച്ചിട്ടശേഷം നിയന്ത്രണം വിട്ട് മറ്റൊരു കാറിലും റോഡിന് വടക്ക് വശത്തുള്ള മതിലിലും വൈദ്യുതി പോസ്റ്റിലും ഇടിച്ചാണ് നിന്നത്. അപകടത്തിൽ കാറിലുണ്ടായിരുന്ന യാത്രക്കാർക്കും പരിക്കേറ്റതായാണ് പ്രാഥമിക വിവരം. അപകടം നടന്നയുടൻ പ്രദേശവാസികളും അതുവഴിയെത്തിയവരും ചേർന്ന് രക്ഷാപ്രവർത്തനങ്ങൾക്ക് നേതൃത്വം നൽകി.

സംഭവത്തെക്കുറിച്ച് ആലപ്പുഴ സൗത്ത് പോലീസ് കേസെടുത്ത് അന്വേഷണം ആരംഭിച്ചിട്ടുണ്ട്. അമിത വേഗതയാണ് അപകടത്തിന് കാരണമെന്ന് പോലീസ് സംശയിക്കുന്നു.

ഈ വാർത്തയെക്കുറിച്ച് നിങ്ങളുടെ അഭിപ്രായം പങ്കുവെക്കുക.

Article Summary: Man dies, wife seriously injured in Alappuzha bike-car collision.

#Alappuzha #RoadAccident #FatalAccident #KeralaNews #Tragedy #TrafficSafety