പത്തു കോടിയുടെ സ്വർണവും പണവും തട്ടിപ്പ്: ആയിഷ ഗോൾഡ് നിക്ഷേപകർ പെരുവഴിയിൽ

കണ്ണൂർ: (KVARTHA) പാപ്പിനിശ്ശേരി ആസ്ഥാനമായി പ്രവർത്തിച്ചിരുന്ന ആയിഷ ഗോൾഡ് ജ്വല്ലറിയിൽ പണം, സ്വർണം എന്നിവ നിക്ഷേപിച്ചവർക്ക് പണമോ ആഭരണങ്ങളോ തിരികെ ലഭിക്കാതെ വഞ്ചിക്കപ്പെട്ടുവെന്ന് പരാതി. 

10 കോടിയിലധികം രൂപയും, സമാനമായ മൂല്യമുള്ള സ്വർണവും തട്ടിയെടുത്തെന്ന് ആരോപിച്ച് നിക്ഷേപകർ രംഗത്തെത്തി. തട്ടിപ്പിനിരയായവർക്കായി സാജിത ഹാരീസും നിക്ഷേപകരും കണ്ണൂർ പ്രസ്‌ക്ലബ്ബിൽ നടത്തിയ വാർത്താസമ്മേളനത്തിലാണ് പോലീസിൻ്റെ അനാസ്ഥക്കെതിരെ ആരോപണമുന്നയിച്ചത്.

2004-ൽ അഷ്റഫ് എന്നയാളാണ് ആയിഷ ഗോൾഡ് എന്ന സ്ഥാപനം തുടങ്ങിയത്. ചക്കരക്കല്ല്, ചെറുകുന്ന്, മാട്ടൂൽ, നാറാത്ത്, അഴീക്കോട്, വാരം കക്കാട്, കണ്ണൂർ ടൗൺ, കണ്ണാടിപ്പറമ്പ് എന്നിവ ഉൾപ്പെടെ പതിനൊന്ന് ബ്രാഞ്ചുകൾ സ്ഥാപനത്തിനുണ്ടായിരുന്നു. 

2021-ൽ അഷ്റഫിന്റെ മരണശേഷം അദ്ദേഹത്തിന്റെ ഭാര്യയും നാല് മക്കളും ബന്ധുക്കളും ജീവനക്കാരും ചേർന്ന് പുതിയ മാനേജ്‌മെന്റ് രൂപീകരിക്കുകയും വ്യാപാരത്തിൽ തട്ടിപ്പ് നടത്തുകയും ചെയ്തതായി നിക്ഷേപകർ ആരോപിക്കുന്നു. അഷ്റഫ് ജീവിച്ചിരുന്ന കാലത്ത് നിക്ഷേപകർക്ക് കൃത്യമായി ലാഭവിഹിതം ലഭിച്ചിരുന്നു.

നിക്ഷേപകർ ഭൂരിഭാഗവും സാധാരണക്കാർ തട്ടിപ്പിനിരയായവരിൽ 80 ശതമാനവും സാധാരണക്കാരായ രോഗികളും വീട്ടമ്മമാരും ഓട്ടോറിക്ഷാ തൊഴിലാളികളുമാണ്. ചിട്ടിയായും പലിശയ്ക്ക് പണമായും 73 പേരിൽനിന്നായി 10 കോടിയിലധികം രൂപയും, പണിക്കൂലിയില്ലാത്ത പുതിയ സ്വർണം നൽകാമെന്ന് വാഗ്ദാനം ചെയ്ത് 10 കോടിയിലധികം രൂപ വിലമതിക്കുന്ന സ്വർണാഭരണങ്ങളും ജ്വല്ലറി സ്വീകരിച്ചിരുന്നു. 

കാലാവധി കഴിഞ്ഞിട്ടും ഇവ തിരികെ നൽകിയില്ല. കൂടാതെ, സ്ഥാപനത്തിലുണ്ടായിരുന്ന സ്വർണം, ഡയമണ്ട്, വെള്ളി എന്നിവ വിറ്റ് പണമാക്കി വിദേശത്തേക്ക് കടത്തിയതായും സംശയിക്കുന്നതായി ഇവർ പറഞ്ഞു. 

ഓരോ ബ്രാഞ്ചും അടച്ചുപൂട്ടുകയും, സ്ഥാവര-ജംഗമ വസ്തുക്കൾ രഹസ്യമായി വിൽക്കുകയും ചെയ്തു. ഈ വിൽപ്പനയിൽ നിന്ന് ലഭിച്ച പണം നിക്ഷേപകർക്ക് നൽകിയില്ലെന്നും സാജിത ഹാരീസ് ആരോപിച്ചു.

പോലീസ് നടപടി വൈകുന്നു 2024-ൽ പലതവണ വളപട്ടണം പോലീസിൽ പരാതി നൽകിയിട്ടും യാതൊരു നടപടിയും ഉണ്ടായില്ല. മുൻപ് അവിടെ ജോലി ചെയ്തിരുന്ന ഒരു ഉന്നത പോലീസ് ഉദ്യോഗസ്ഥന്റെ സ്വാധീനമാണ് ഇതിന് കാരണമെന്ന് കരുതുന്നു. മുഖ്യമന്ത്രി, കണ്ണൂർ സിറ്റി പോലീസ് കമ്മീഷണർ എന്നിവർക്ക് പരാതി നൽകിയതിനെ തുടർന്ന്, അടിയന്തര നടപടിയെടുക്കാൻ കമ്മീഷണർ വളപട്ടണം പോലീസിന് നിർദേശം നൽകിയിരുന്നു. 

വാർത്താസമ്മേളനം നടത്താൻ തീരുമാനിച്ച ദിവസം മാത്രമാണ് പേരിന് രണ്ട് പേർക്കെതിരെ കേസെടുത്തതെന്നും, മുഖ്യപ്രതിയായ അഷ്റഫിന്റെ മകനെയും കൂട്ടാളികളെയും ഇതുവരെ കസ്റ്റഡിയിലെടുത്തിട്ടില്ലെന്നും നിക്ഷേപകർ പറഞ്ഞു. ഇവർ ഇപ്പോഴും ഗൾഫിലടക്കം ബിസിനസ് നടത്തുന്നുണ്ടെന്നും ആരോപണമുണ്ട്.

വാർത്താസമ്മേളനത്തിൽ പണം നഷ്ടപ്പെട്ട നിക്ഷേപകരായ കെ. ഹസീന, കെ.വി. സറീന, വി.വി. സത്യൻ എന്നിവരും പങ്കെടുത്തു.

ഈ വാർത്തയെക്കുറിച്ച് നിങ്ങളുടെ അഭിപ്രായം അറിയിക്കുക. സുഹൃത്തുക്കളുമായി പങ്കുവയ്ക്കുക.

Article Summary: Investors in Aisha Gold Jewelry scam allege police inaction and fraud.

#AishaGold #KannurScam #InvestorFraud #KeralaNews #PoliceInaction #JewelryScam