300 അടി താഴ്ചയിലേക്ക് പതിച്ച എയർ ഇന്ത്യ വിമാനം; പറക്കുന്നതിനിടെ ഉറങ്ങിയിരുന്നതായി പൈലറ്റിന്റെ മൊഴി

ന്യൂഡൽഹി: (KVARTHA) ഫുക്കെറ്റിൽനിന്ന് ഡൽഹിയിലേക്കുള്ള എയർ ഇന്ത്യ വിമാനം പറക്കുന്നതിനിടെ 300 അടി താഴ്ചയിലേക്ക് പതിച്ച സംഭവത്തിൽ ആരോപണവിധേയനായ പൈലറ്റിന്റെ മൊഴി പുറത്ത്. വിമാനത്തിലായിരിക്കേ അൽപസമയം ഉറങ്ങിയിരുന്നെന്നാണ് പൈലറ്റ് അന്വേഷണ ഉദ്യോഗസ്ഥർക്കു മൊഴി നൽകിയത്. ദിവസങ്ങളായി ഉറക്കക്കുറവ് അനുഭവിക്കുകയും കുടുംബ ഡോക്ടർ കുറിച്ചു തന്ന മരുന്ന് കഴിക്കുകയും ചെയ്തിരുന്നെന്നും എയർക്രാഫ്റ്റ് ആക്സിഡന്റ് ഇൻവെസ്റ്റിഗേഷൻ ബ്യൂറോയോട് പൈലറ്റ് വ്യക്തമാക്കി. ഒരു മണിക്കൂറിലേറെയാണ് പൈലറ്റിനെ ഉദ്യോഗസ്ഥർ ചോദ്യം ചെയ്തത്.

സംഭവവിവരണവും ലഹരി പരിശോധനയും

തായ്ലൻഡിലെ ഫുക്കെറ്റിൽനിന്ന് ഡൽഹിയിലേക്കുള്ള വിമാനമാണ് അപകടത്തിൽപ്പെട്ടത്. സംഭവത്തിൽ 20-ഓളം യാത്രക്കാർക്ക് പരിക്കേറ്റിരുന്നു. പൈലറ്റിന്റെ രണ്ടാമത്തെ ഡ്രഗ് ടെസ്റ്റും പോസിറ്റീവായതിനു പിന്നാലെയാണ് പുതിയ വെളിപ്പെടുത്തൽ പുറത്തുവരുന്നത്. ഇതോടെ പൈലറ്റ് ജോലിസമയത്ത് ലഹരി ഉപയോഗിച്ചിരുന്നെന്ന വാദം ശക്തമായിട്ടുണ്ട്. ഫുക്കെറ്റിലെ ലേ ഓവർ സമയത്ത് വ്യക്തിപരമായ കാരണങ്ങളാൽ ഉറങ്ങാൻ സാധിച്ചില്ലെന്നാണ് പൈലറ്റ് പറയുന്നത്.

തുടർന്ന് വിമാനം ടേക്ക് ഓഫ് ചെയ്തതിനുശേഷം 30 മുതൽ 35 മിനിറ്റ് വരെ ഉറങ്ങി. ഈ സമയം ഫസ്റ്റ് ഓഫിസർ വിമാനം നിയന്ത്രിച്ചു. തുടർന്ന് ശുചിമുറിയിൽ പോയതിനുശേഷം കോക്ക്പിറ്റിലേക്കു തിരിച്ചെത്തുകയും ഫസ്റ്റ് ഓഫിസറിനു പിന്നിൽനിൽക്കുകയും ചെയ്തു. 

അവിടെനിന്ന് ഫസ്റ്റ് ഓഫിസറുമായി വിമാനത്തിലെ എയർ കണ്ടീഷനിങ് സംവിധാനത്തെക്കുറിച്ച് സംസാരിച്ചു നിൽക്കവേയാണ് വിമാനം താഴ്ചയിലേക്ക് പതിക്കുന്ന സംഭവമുണ്ടായത്. വിമാനം താഴേക്കുപോയതോടെ പൈലറ്റ് കോക്ക്പിറ്റിന്റെ തറയിൽ വീഴുകയായിരുന്നു. ബന്ധപ്പെട്ട ഉദ്യോഗസ്ഥരെ ഉദ്ധരിച്ച് 'ഹിന്ദുസ്ഥാൻ ടൈംസ്' ആണ് ഈ വിവരം റിപ്പോർട്ട് ചെയ്തത്.

ഡിജിസിഎ ചട്ടങ്ങളും ആശങ്കകളും

അതേസമയം, കഴിച്ചുകൊണ്ടിരുന്ന മരുന്ന് ഏതാണെന്ന് പൈലറ്റ് വെളിപ്പെടുത്തിയിട്ടില്ല. ഡയറക്ടറേറ്റ് ജനറൽ ഓഫ് സിവിലിയൻ ഏവിയേഷന്റെ നിയമപ്രകാരം ഡ്യൂട്ടിക്കെത്തുന്ന പൈലറ്റ് മരുന്നുകൾ കഴിക്കുന്നുണ്ടെങ്കിൽ ആ വിവരം എയർലൈനിനെ അറിയിക്കണം. അങ്ങനെ ചെയ്യാതിരുന്നാൽ പൈലറ്റിനെതിരെ കർശന നടപടി സ്വീകരിക്കാം. ഫുക്കെറ്റ് വിമാനത്തിലെ പൈലറ്റ് മരുന്നുകളെക്കുറിച്ച് എയർ ഇന്ത്യയെ അറിയിച്ചിരുന്നോയെന്ന കാര്യം ഇതുവരെ വ്യക്തമായിട്ടില്ല.

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം 

Article Summary: The pilot of the Air India flight from Phuket to Delhi, which dropped 300 feet injuring 20 passengers, has admitted to the Aircraft Accident Investigation Bureau (AAIB) that he briefly slept during the flight due to sleep deprivation and prescribed medication. The revelation comes amidst a second positive drug test, raising concerns regarding duty intoxication and DGCA compliance.

#AirIndia #AAIB #DGCA #FlightSafety #PhuketDelhiFlight #AviationNews #MalayalamNews #AmmuNews