അടിമാലിയിലെ ഇരട്ടക്കുട്ടികളുടെ മരണം; കാരണം ചോർന്നുവീണ കീടനാശിനി ഉള്ളിൽ ചെന്നതെന്ന് പോസ്റ്റ്‌മോര്‍ട്ടം റിപ്പോർട്ട്, ദുരൂഹതയില്ലെന്ന് പൊലീസ്

അടിമാലി: (KVARTHA) അടിമാലിയിൽ ഇരട്ടക്കുട്ടികളുടെ മരണത്തിന് കാരണം കീടനാശിനി ഉള്ളിൽ ചെന്നതാണെന്ന് പ്രാഥമിക പോസ്റ്റ്മോർട്ടം റിപ്പോർട്ട്. തറയിൽ വീണ കീടനാശിനി കുട്ടികൾ കയ്യിൽ തൊട്ട് വായിൽ വെച്ചതാണ് മരണകാരണമെന്നാണ് പൊലീസിൻ്റെ നിഗമനം. ഈ പ്രാഥമിക റിപ്പോർട്ടിൽ ദുരൂഹസാഹചര്യമൊന്നുമില്ലെന്ന് പൊലീസ് വ്യക്തമാക്കി. 

വീട്ടിൽ സൂക്ഷിച്ചിരുന്ന കീടനാശിനിക്കുപ്പിയുടെ അടിഭാഗം ദ്രവിക്കുകയും ഇതുവഴി പുറത്തുവന്ന ദ്രാവകം കുട്ടികൾ അറിയാതെ വായിൽ വെക്കുകയുമായിരുന്നു എന്നാണ് പൊലീസ് കണ്ടെത്തൽ. വിശദമായ പോസ്റ്റ്മോർട്ടം റിപ്പോർട്ട് ലഭിച്ച ശേഷം കേസിൽ തുടർ നടപടികൾ സ്വീകരിക്കാനാണ് പൊലീസിൻ്റെ നീക്കം. ഇരുമ്പുപാലം ഒഴുവത്തടത്ത് വലിയകാട്ടിൽ അഫ്സൽ - സാന്ദ്ര ദമ്പതികളുടെ മക്കളായ ഇഹാൻ, റിഹാൻ എന്നിവരാണ് കഴിഞ്ഞ ദിവസം മരിച്ചത്.

വൈദ്യുതി ഇല്ലാത്തപ്പോൾ അപകടം
വീട്ടിൽ വൈദ്യുതി ഇല്ലാത്തപ്പോഴാണ് അപകടം നടന്നതെന്ന് കുട്ടികളുടെ പിതാവ് പൊലീസിന് മൊഴിനൽകിയിട്ടുണ്ട്. സംഭവസമയത്ത് കുട്ടികളുടെ അമ്മ അടുക്കളയിൽ ഭക്ഷണം പാകം ചെയ്യുകയായിരുന്നു. പിതാവ് സമീപത്തെ മുറിയിലുമുണ്ടായിരുന്നു. വൈദ്യുതി വന്നതോടെ കുട്ടികളുടെ ദേഹത്ത് എന്തോ പറ്റിപ്പിടിച്ചിരിക്കുന്നത് അമ്മയുടെ ശ്രദ്ധയിൽപ്പെട്ടു. ഉടൻ തന്നെ ഇത് കഴുകിക്കളഞ്ഞതായി മാതാപിതാക്കൾ പൊലീസിനോട് പറഞ്ഞു.

പാൽ നൽകുന്നതിനിടെ അവശനിലയിലായി

ദേഹത്ത് പറ്റിപ്പിടിച്ചിരുന്നത് കഴുകിക്കളഞ്ഞ ശേഷം പിന്നീട് ഒരു കുട്ടിക്ക് പാൽ നൽകുന്നതിനിടെ ഇരുവരും അവശനിലയിലാകുകയായിരുന്നു. ഉടൻ തന്നെ പിതാവ് ഇരുവരെയും ഇരുമ്പുപാലത്തെ സ്വകാര്യ ആശുപത്രിയിലും തുടർന്ന് അടിമാലിയിലെ മറ്റ് ആശുപത്രികളിലും എത്തിച്ചെങ്കിലും ജീവൻ രക്ഷിക്കാനായില്ല. കേസിൻ്റെ അന്വേഷണത്തിൻ്റെ ഭാഗമായി ഫോറൻസിക് സംഘം വീട്ടിലെത്തി വിശദമായ പരിശോധന നടത്തിയിട്ടുണ്ട്.

പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. 

Article Summary: A preliminary postmortem report revealed that the twin babies in Adimali died after accidentally consuming pesticide that leaked onto the floor during a power outage. Police confirmed there is no foul play in the incident, and a forensic team has inspected the house.

#Kvartha #AdimaliNews #Idukki #TwinBabiesDeath #KeralaPolice #ForensicInvestigation #MalayalamNews #KeralaCrimeNews #AccidentalDeath #AmmuNews