ബെംഗ്ളുറു: (KVARTHA) കഴിഞ്ഞ കുറച്ചു ദിവസങ്ങളായി മാധ്യമങ്ങളിൽ നിറഞ്ഞുനിന്ന കന്നഡ സിനിമാ നടി രണ്യ റാവുവിൻ്റെ സ്വർണക്കടത്ത് കേസിൽ വഴിത്തിരിവ്. യൂട്യൂബ് വീഡിയോകൾ കണ്ടാണ് സ്വർണം ഒളിപ്പിക്കാനുള്ള വിദ്യ താൻ പഠിച്ചതെന്ന് രണ്യ റാവു ഡയറക്ടറേറ്റ് ഓഫ് റെവന്യൂ ഇൻ്റലിജൻസ് (ഡിആർഐ) ഉദ്യോഗസ്ഥർക്ക് മൊഴി നൽകി. ബെംഗ്ളുറു വിമാനത്താവളത്തിൽ 14.2 കിലോ സ്വർണവുമായി പിടിയിലായ രണ്യ റാവുവിൻ്റെ കേസിൽ ഞെട്ടിക്കുന്ന വിവരങ്ങളാണ് ഓരോ ദിവസവും പുറത്തുവരുന്നത്.

വിമാനത്താവളത്തിലെ ശുചിമുറിയിൽ സ്വർണം ഒളിപ്പിക്കാൻ ശ്രമം

ദുബൈയിൽ നിന്ന് ബംഗളൂരുവിലേക്ക് സ്വർണം കടത്താൻ ശ്രമിക്കുന്നതിനിടെയാണ് രണ്യ റാവുവിനെ എയർപോർട്ടിൽ വെച്ച് ഡിആർഐ ഉദ്യോഗസ്ഥർ അറസ്റ്റ് ചെയ്തത്.  വിമാനത്താവളത്തിലെ ശുചിമുറിയിൽ വെച്ച് ക്രേപ്പ് ബാൻഡേജും കത്രികയും ഉപയോഗിച്ച് സ്വർണ ബിസ്ക്കറ്റുകൾ ശരീരത്തിൽ ഒളിപ്പിക്കുകയായിരുന്നു രണ്യ. ജീൻസിനുള്ളിലും ഷൂസിനുള്ളിലുമായിരുന്നു സ്വർണം ഒളിപ്പിച്ചത്.  ആദ്യമായിട്ടാണ് സ്വർണം കടത്തുന്നതെന്നും ഇതിനു മുൻപ് ദുബൈയിൽ നിന്ന് സ്വർണം വാങ്ങിയിട്ടില്ലെന്നും രണ്യ ഡിആർഐ ഉദ്യോഗസ്ഥരോട് പറഞ്ഞു.  12.56 കോടി രൂപ വിലമതിക്കുന്ന 14.2 കിലോഗ്രാം സ്വർണമാണ് നടിയുടെ പക്കൽ നിന്നും കണ്ടെത്തിയത്.

യൂട്യൂബ് ഗുരു; രഹസ്യം വെളിപ്പെടുത്തി നടി

യൂട്യൂബ് വീഡിയോകൾ കണ്ടാണ് സ്വർണം ഒളിപ്പിക്കാനുള്ള തന്ത്രം പഠിച്ചതെന്ന് രണ്യ റാവുവിന്റെ വെളിപ്പെടുത്തൽ അന്വേഷണ ഉദ്യോഗസ്ഥരെ പോലും ഞെട്ടിച്ചു. വിദേശത്തുനിന്നും സ്വർണം കടത്തുന്നതുമായി ബന്ധപ്പെട്ട നിരവധി യൂട്യൂബ് വീഡിയോകൾ പ്രചാരത്തിലുണ്ട്. ഇതിൽ ഏതെങ്കിലും വീഡിയോ കണ്ടിട്ടാണോ നടി ഈ തന്ത്രം പഠിച്ചതെന്ന് ഡിആർഐ അന്വേഷിക്കുന്നുണ്ട്.  കഴിഞ്ഞ രണ്ടാഴ്ചയായി അപരിചിത നമ്പറുകളിൽ നിന്നും ഫോൺ കോളുകൾ വന്നിരുന്നുവെന്നും രണ്യ മൊഴി നൽകി.  മാർച്ച് ഒന്നിനാണ് ആദ്യമായി വിദേശ നമ്പറിൽ നിന്ന് കോൾ വന്നത്. 

ദുബൈ എയർപോർട്ടിലെ ടെർമിനൽ 3-ലെ ഗേറ്റ് എ-യിൽ എത്താനാണ് നിർദേശം ലഭിച്ചത്. സ്വർണം അവിടെ നിന്നും കളക്ട് ചെയ്ത് ബംഗളൂരുവിൽ എത്തിക്കാനായിരുന്നു നിർദ്ദേശം എന്നും രണ്യ വെളിപ്പെടുത്തി. തന്നെ വിളിച്ച വ്യക്തിയെക്കുറിച്ച് കൂടുതൽ വിവരങ്ങൾ അറിയില്ലെന്നാണ് രണ്യ പറയുന്നത്.  വിളിച്ചയാൾക്ക് ആഫ്രിക്കൻ-അമേരിക്കൻ ആക്സെൻ്റ് ഉണ്ടായിരുന്നുവെന്നും ഏകദേശം ആറടി ഉയരവും വെളുത്ത നിറവുമുള്ള ഒരാളാണെന്നും രണ്യ പറയുന്നു.  എന്നാൽ ഈ വ്യക്തിയെക്കുറിച്ചോ മറ്റു കൂട്ടാളികളെക്കുറിച്ചോ കൂടുതൽ വിവരങ്ങൾ ലഭ്യമല്ല.

ജുഡീഷ്യൽ കസ്റ്റഡിയിൽ നടി

മാർച്ച് മൂന്നിനാണ് രണ്യ റാവുവിനെ ഡയറക്ടറേറ്റ് ഓഫ് റെവന്യൂ ഇൻ്റലിജൻസ് (ഡിആർഐ) അറസ്റ്റ് ചെയ്യുന്നത്.  ബംഗളൂരു കെംപേഗൗഡ അന്താരാഷ്ട്ര വിമാനത്താവളത്തിൽ വെച്ചായിരുന്നു അറസ്റ്റ്. സാമ്പത്തിക കുറ്റകൃത്യങ്ങൾക്കായുള്ള പ്രത്യേക കോടതിയിൽ ഹാജരാക്കിയ രണ്യയെ മാർച്ച് 18 വരെ ജുഡീഷ്യൽ കസ്റ്റഡിയിൽ വിട്ടു.  ബിസിനസ് ആവശ്യത്തിനാണ് ദുബായിൽ പോയതെന്നാണ് രണ്യ ചോദ്യം ചെയ്യലിൽ പറഞ്ഞതെങ്കിലും സ്വർണ്ണക്കടത്തിന് വേണ്ടിയുള്ള യാത്രയായിരുന്നു ഇതെന്നാണ് ഉദ്യോഗസ്ഥർ സംശയിക്കുന്നത്.  

തുടരന്വേഷണത്തിനായി നടിയെ മൂന്ന് ദിവസത്തെ ഡിആർഐ കസ്റ്റഡിയിൽ വിട്ടിരുന്നു.  ഈ ദിവസങ്ങളിൽ അഭിഭാഷകനെ കാണാനും കോടതി അനുമതി നൽകി.  അടിസ്ഥാന സൗകര്യങ്ങൾ ഉറപ്പാക്കാനും അന്വേഷണത്തിൻ്റെ പേരിൽ പീഡിപ്പിക്കരുതെന്നും ജഡ്ജി വിശ്വനാഥ് സി ഗൗഡർ ഡിആർഐക്ക് നിർദ്ദേശം നൽകി.

ഡിജിപിയുടെ വളർത്തുമകൾ; വിവാദങ്ങളിൽ കുടുംബവും

കർണാടക ഡിജിപി കെ രാമചന്ദ്ര റാവുവിൻ്റെ വളർത്തുമകളാണ് രണ്യ റാവു.  നടിയുടെ അറസ്റ്റ് വാർത്ത പുറത്തുവന്നതിന് പിന്നാലെ ഡിജിപി കുടുംബവും വിവാദത്തിലായി.  നടിയുമായി തനിക്ക് ബന്ധമില്ലെന്നും രണ്യ വിവാഹം കഴിഞ്ഞ് നാലുമാസമായി ഇവിടെ വന്നിട്ട് എന്നും ഡിജിപി മാധ്യമങ്ങളോട് പറഞ്ഞിരുന്നു.  എങ്കിലും ഉന്നത ബന്ധങ്ങൾ ഉപയോഗിച്ച് കേസ് അട്ടിമറിക്കാനുള്ള ശ്രമങ്ങൾ നടക്കുന്നുണ്ടോ എന്നും അധികൃതർ സംശയിക്കുന്നുണ്ട്.  കേസിനെക്കുറിച്ച് കൂടുതൽ വിവരങ്ങൾ പുറത്തുവരുമ്പോൾ ഇത് സ്വർണക്കടത്ത് റാക്കറ്റുമായി ബന്ധപ്പെട്ടതാണോ എന്നും അന്വേഷണ സംഘം പരിശോധിക്കുന്നുണ്ട്.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

Kannada actress Ranya Rao arrested for gold smuggling at Bengaluru airport, reveals she learned smuggling tactics from YouTube videos. Shocking details revealed.

#GoldSmuggling #RanyaRao #YouTubeConfession #KannadaActress #BengaluruNews #Smuggling