പ്രശസ്ത നടനും എസ്.ഐ.യുമായ പി. ശിവദാസൻ കണ്ണൂരിനെതിരെ കേസ്: മദ്യപിച്ച് വാഹനമോടിച്ച് അപകടമുണ്ടാക്കി

കണ്ണൂർ: (KVARTHA) പ്രശസ്ത ചലച്ചിത്ര താരവും കണ്ണൂർ സ്പെഷ്യൽ ബ്രാഞ്ച് എസ് ഐയുമായ പി ശിവദാസൻ കണ്ണൂരിനെതിരെ മദ്യപിച്ച് വാഹനമോടിച്ച് അപകടമുണ്ടാക്കിയതിന് കേസെടുത്തു.

കഴിഞ്ഞ വെള്ളിയാഴ്ച രാത്രി ചാവശ്ശേരിയിൽ വെച്ച് പി ശിവദാസൻ കണ്ണൂർ ഓടിച്ച കാർ ആദ്യം ഒരു കലുങ്കിലിടിക്കുകയും തുടർന്ന് നിയന്ത്രണം വിട്ട് റോഡരികിൽ നിർത്തിയിട്ട മറ്റൊരു കാറിലിടിക്കുകയുമായിരുന്നു. അപകടത്തെ തുടർന്ന് മട്ടന്നൂർ പോലീസ് സ്ഥലത്തെത്തി. പോലീസ് നടത്തിയ പരിശോധനയിൽ വാഹനമോടിച്ച ശിവദാസൻ മദ്യപിച്ചതായി തെളിയുകയായിരുന്നു.

അശ്രദ്ധമായി വാഹനമോടിച്ചതിനും ഡ്രൈവിങ്ങിനിടെ മദ്യപിച്ചതിനുമാണ് പോലീസ് കേസെടുത്തത്. മലയാള സിനിമയിൽ ഒട്ടേറെ വേഷങ്ങൾ അവതരിപ്പിച്ച നടൻ കൂടിയാണ് ശിവദാസൻ കണ്ണൂർ. സംസ്ഥാന അവാർഡുകൾ വാരിക്കൂട്ടിയ ‘ആൻഡ്രോയ്ഡ് കുഞ്ഞപ്പൻ’ ഉൾപ്പെടെ നിരവധി ചിത്രങ്ങളിൽ അദ്ദേഹം അഭിനയിച്ചിട്ടുണ്ട്.

പോലീസ് സർവീസിൽ ജോലിയിൽ തുടരവെയാണ് അദ്ദേഹം അവധിയെടുത്ത് ചലച്ചിത്രാഭിനയം നടത്തിവന്നിരുന്നത്. നാട്ടിലേക്ക് മടങ്ങുന്ന വഴിയിൽ ഇരിട്ടി -മട്ടന്നൂർ റൂട്ടിലെ ചാവശ്ശേരിയിൽ വെച്ചാണ് വാഹനാപകടം ഉണ്ടായത്.

തനിക്കെതിരെയുള്ള പെറ്റി കേസിനെക്കുറിച്ച് ശിവദാസൻ കണ്ണൂർ ഇതുവരെ പ്രതികരിച്ചിട്ടില്ല. മികച്ച അഭിനേതാവ് എന്നതിലുപരി സർവീസിൽ നല്ല പേരുള്ള അന്വേഷണ ഉദ്യോഗസ്ഥൻ കൂടിയാണ് പി ശിവദാസൻ.

ഈ വാർത്തയെക്കുറിച്ച് നിങ്ങളുടെ അഭിപ്രായം കമന്റ് ചെയ്യുക. 

Article Summary: Case filed against actor and SI P. Sivadasan Kannur for drunk driving and causing an accident in Kannur.

#PSivadasanKannur #DrunkDriving #AccidentCase #KeralaPolice #MalayalamActor