ദിലീപിന്‍റെ വീടിന് മുന്നിൽ നാടകീയ രംഗങ്ങൾ; നുഴഞ്ഞു കയറിയ ആൾ പിടിയിൽ

കൊച്ചി: (KVARTHA) നടൻ ദിലീപിന്‍റെ ആലുവയിലെ വീട്ടിൽ അതിക്രമിച്ച് കയറിയ ഒരാളെ പൊലീസ് കസ്റ്റഡിയിലെടുത്തു. അഭിജിത്ത് എന്നയാളാണ് ആലുവ പൊലീസിന്‍റെ പിടിയിലായത്. വെള്ളിയാഴ്ച രാത്രി ഏകദേശം 12 മണിയോടെയാണ് ആലുവ കൊട്ടാരക്കടവിലുള്ള ദിലീപിന്‍റെ വസതിയിൽ ഇയാൾ അതിക്രമിച്ചു കയറിയതായി പരാതി ലഭിച്ചത്.

വീട്ടുകാരുടെയും സുരക്ഷാ ജീവനക്കാരുടെയും ശ്രദ്ധയിൽപ്പെട്ടതിനെ തുടർന്ന് ഇരുവരും ചേർന്ന് യുവാവിനെ തടഞ്ഞുവെച്ച് ആലുവ പൊലീസിൽ ഏൽപ്പിക്കുകയായിരുന്നു. കുടുംബം നൽകിയ പരാതിയുടെ അടിസ്ഥാനത്തിലാണ് അഭിജിത്തിനെ കസ്റ്റഡിയിലെടുത്തതെന്ന് ആലുവ പൊലീസ് അറിയിച്ചു.

കസ്റ്റഡിയിലെടുത്ത യുവാവ് മദ്യലഹരിയിലായിരുന്നെന്ന് പൊലീസ് പറയുന്നു. ‘മോഷണം ആയിരുന്നില്ല ഇയാളുടെ ഉദ്ദേശമെന്നും’ പ്രാഥമിക അന്വേഷണത്തിൽ വ്യക്തമായിട്ടുണ്ട് എന്ന് പൊലീസ് കൂട്ടിച്ചേർത്തു. 

അഭിജിത്തിനെ വിശദമായി ചോദ്യം ചെയ്ത് വരികയാണെന്നും അതിക്രമിച്ചു കയറിയതിനെക്കുറിച്ചുള്ള കൂടുതൽ വിവരങ്ങൾ പുറത്തുവരുമെന്നും അന്വേഷണ സംഘം വ്യക്തമാക്കി.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ കമൻ്റ് ചെയ്യുക.

Article Summary: Man arrested for trespassing into actor Dileep's Aluva home.

#Dileep #Aluva #KeralaPolice #Trespassing #Abhijith #KeralaNews