കണ്ണൂർ: (KVARTHA) പാപ്പിനിശ്ശേരിയിൽ വാടക ക്വാർട്ടേഴ്സിൽ താമസിക്കുന്ന ഇതര സംസ്ഥാന തൊഴിലാളികളുടെ നാല് മാസം പ്രായമുള്ള പെൺകുഞ്ഞിനെ ദുരൂഹസാഹചര്യത്തിൽ കിണറ്റിൽ മരിച്ച നിലയിൽ കണ്ടെത്തി. തമിഴ്നാട്ടിൽ നിന്ന് ജോലിക്കായി കേരളത്തിലെത്തിയ ദമ്പതികളുടെ മകളാണ് മരണപ്പെട്ടതെന്ന് പൊലീസ് അറിയിച്ചു. തിങ്കളാഴ്ച രാത്രി 9.30 ഓടെ തങ്ങളും ഒരു ബന്ധുവിന്റെ പെൺമക്കളും ഒന്നിച്ച് ഉറങ്ങാൻ കിടന്നതായിരുന്നുവെന്ന് കുട്ടിയുടെ മാതാപിതാക്കൾ വളപട്ടണം പൊലീസിൽ നൽകിയ പരാതിയിൽ പറയുന്നു. 

രാത്രി 11 മണിയോടെ കുഞ്ഞിനെ കാണാതായതോടെ ഭർത്താവിനെ വിളിച്ചുണർത്തുകയായിരുന്നുവെന്ന്  മാതാവ് മൊഴി നൽകി. നിലവിളി കേട്ട് ഓടിയെത്തിയ മറ്റ് ഇതര സംസ്ഥാന തൊഴിലാളികൾ ഉടൻ തന്നെ തിരച്ചിൽ ആരംഭിച്ചു. തുടർന്ന്, രാത്രി 11 മണിയോടെ ക്വാർട്ടേഴ്സിനോട് ചേർന്നുള്ള കിണറ്റിൽ നിന്ന് കുട്ടിയെ കണ്ടെത്തുകയായിരുന്നു. കുട്ടിയെ പുറത്തെടുത്ത് ഉടൻ തന്നെ അടുത്തുള്ള ആശുപത്രിയിൽ എത്തിച്ചെങ്കിലും മരിച്ചതായി ഡോക്ടർമാർ സ്ഥിരീകരിച്ചു.

സംഭവത്തെക്കുറിച്ച് കുട്ടിയുടെ മാതാപിതാക്കൾ ചൊവ്വാഴ്ച പുലർച്ചെയാണ് പൊലീസിൽ വിവരമറിയിച്ചത്. ഭാരതീയ നാഗരിക സുരക്ഷാ സംഹിതയിലെ 194(1) വകുപ്പ് പ്രകാരം അസ്വാഭാവിക മരണത്തിന് പൊലീസ് കേസെടുത്തു. കുഞ്ഞിന്റെ മൃതദേഹം പോസ്റ്റ്‌മോർട്ടത്തിനായി കണ്ണൂർ ജില്ലാ ആശുപത്രിയിലേക്ക് മാറ്റി. സംഭവത്തിൽ കൂടുതൽ അന്വേഷണം നടക്കുകയാണെന്ന് പൊലീസ് അറിയിച്ചു.

ഈ വാർത്തയെക്കുറിച്ചുള്ള നിങ്ങളുടെ അഭിപ്രായങ്ങൾ പങ്കുവെക്കുക.

A 4-month-old baby girl was found dead in a well in Pappinisseri under mysterious circumstances. Police have started an investigation into the unnatural death.

#KasaragodNews #KannurNews #CrimeNews #InfantDeath #KeralaNews #Mystery