കാബൂൾ: (KVARTHA) പാക് വ്യോമാക്രമണത്തിൽ മൂന്ന് പ്രാദേശിക ക്രിക്കറ്റ് താരങ്ങൾ കൊല്ലപ്പെട്ടതിനെത്തുടർന്ന് പാകിസ്ഥാൻ ഉൾപ്പെടുന്ന ത്രിരാഷ്ട്ര പരമ്പരയിൽ നിന്ന് പിൻമാറി അഫ്ഗാനിസ്ഥാൻ. അടുത്തമാസം അഞ്ച് മുതൽ 29 വരെ പാകിസ്ഥാനും അഫ്ഗാനിസ്ഥാനും ശ്രീലങ്കയും ഉൾപ്പെട്ട ത്രിരാഷ്ട്ര പരമ്പര പാകിസ്ഥാനിൽ നടക്കേണ്ടിയിരുന്നതാണ്. അഫ്ഗാനിസ്ഥാനിലെ പാക്തിക പ്രവിശ്യയിൽ പാകിസ്ഥാൻ നടത്തിയ വ്യോമാക്രമണത്തിലാണ് മൂന്ന് പ്രാദേശിക ക്രിക്കറ്റ് താരങ്ങൾ അടക്കം എട്ട് പേർ കൊല്ലപ്പെട്ടത്.

ആക്രമണത്തെ ശക്തമായി അപലപിച്ച അഫ്ഗാൻ ക്രിക്കറ്റ് ബോർഡ് പാകിസ്ഥാൻ്റെ നടപടി ഭീരുത്വമാണെന്ന് ആരോപിച്ചു. ത്രിരാഷ്ട്ര പരമ്പരയിൽ നിന്ന് പിൻമാറാനുള്ള അഫ്ഗാൻ ക്രിക്കറ്റ് ബോർഡിന്റെ തീരുമാനത്തോട് പൂർണ്ണമായും യോജിക്കുന്നുവെന്ന് അഫ്ഗാൻ ടീം നായകൻ റാഷിദ് ഖാൻ വ്യക്തമാക്കി. പാകിസ്ഥാൻ്റെ നടപടി പ്രാകൃതമാണെന്നും അദ്ദേഹം കൂട്ടിച്ചേർത്തു.

അഫ്ഗാനിസ്ഥാനിലെ ഉർഗൂൺ ജില്ലയിൽ പാകിസ്ഥാൻ സൈന്യം നടത്തിയ വ്യോമാക്രമണത്തിലാണ് പ്രാദേശിക താരങ്ങളായ കബീർ, സിബ്ഗത്തുള്ള, ഹാരൂൺ എന്നിവർ കൊല്ലപ്പെട്ടതെന്ന് അഫ്ഗാൻ ക്രിക്കറ്റ് ബോർഡ് അറിയിച്ചു. അതിർത്തിയിൽ പാക് സൈനിക പോസ്റ്റുകൾക്ക് നേരെ അഫ്ഗാൻ സൈന്യം ആക്രമണം നടത്തിയെന്ന് ആരോപിച്ച് പാകിസ്ഥാൻ തിരിച്ചടിക്കാൻ തുടങ്ങിയതോടെയാണ് ഇരു രാജ്യങ്ങളും തമ്മിലുള്ള സംഘർഷം മൂർച്ഛിച്ചത്.

സംഘർഷത്തിൽ ഇരുവശത്തും ആൾനാശമുണ്ടായിരുന്നു. പിന്നീട് ഇരു സൈന്യങ്ങളും 48 മണിക്കൂർ വെടിനിർത്തൽ പ്രഖ്യാപിച്ചത് സംഘർഷങ്ങളിൽ അയവുവരുത്തുമെന്ന് കരുതിയെങ്കിലും പാകിസ്ഥാൻ നടത്തിയ വ്യോമാക്രമണം വീണ്ടും സ്ഥിതിഗതികൾ രൂക്ഷമാക്കുകയായിരുന്നു. ഇതിനെത്തുടർന്നാണ് കായിക ബന്ധങ്ങൾ അവസാനിപ്പിച്ചുകൊണ്ട് ത്രിരാഷ്ട്ര പരമ്പരയിൽ നിന്ന് അഫ്ഗാനിസ്ഥാൻ പിൻമാറാൻ തീരുമാനിച്ചത്.

അഫ്ഗാനിസ്ഥാൻ്റെ പിൻമാറ്റം ശരിയോ? ത്രിരാഷ്ട്ര പരമ്പര റദ്ദാക്കിയ സംഭവത്തെക്കുറിച്ച് നിങ്ങളുടെ അഭിപ്രായം കമൻ്റ് ചെയ്യുക.

Article Summary: Afghanistan withdraws from cricket series after 3 players killed in Pakistan's air strike.

#CricketDiplomacy #AFGvPAK #TriSeries #AirStrike #AfghanistanCricket #RashidKhan