ന്യൂഡൽഹി: (KVARTHA) കൊറിയർ സർവീസ് കമ്പനികളുടെ പേരിൽ നടക്കുന്ന തട്ടിപ്പുകളിൽ നിന്ന് ജാഗ്രത പാലിക്കണമെന്ന മുന്നറിയിപ്പുമായി അധികൃതർ. ഇത്തരം തട്ടിപ്പുകാർ ആളുകളെ ഭയപ്പെടുത്തിയോ അല്ലെങ്കിൽ വിശ്വസിപ്പിച്ചോ ബാങ്ക് അക്കൗണ്ട് നമ്പർ, പാസ്‌വേർഡ് തുടങ്ങിയ സ്വകാര്യ വിവരങ്ങൾ തട്ടിയെടുക്കാൻ ശ്രമിക്കും. 

തട്ടിപ്പ് എങ്ങനെ നടക്കുന്നു?

* ഒരു കൊറിയർ കമ്പനിയിൽ നിന്ന് നിങ്ങൾക്ക് പാഴ്സൽ ഉണ്ടെന്നും അതിൽ നിരോധിത വസ്തുക്കൾ, വ്യാജ പാസ്‌പോർട്ടുകൾ തുടങ്ങിയവ അടങ്ങിയിട്ടുണ്ടെന്നും പറഞ്ഞുകൊണ്ട് ഒരു തട്ടിപ്പുകാരൻ നിങ്ങളെ വിളിക്കും.
* പിന്നീട്, അവർ പൊലീസ് ഉദ്യോഗസ്ഥൻ / നാർക്കോട്ടിക്സ് കൺട്രോൾ ബ്യൂറോ ഉദ്യോഗസ്ഥൻ / കസ്റ്റംസ് ഡ്യൂട്ടി ഉദ്യോഗസ്ഥൻ എന്നിവരായി അവകാശപ്പെടും. യാഥാർത്ഥമെന്ന് തോന്നിപ്പിക്കുന്ന തരത്തിൽ വ്യാജ തിരിച്ചറിയൽ രേഖകൾ കാണിച്ചു നിങ്ങളുടെ പേരിൽ കേസ് രജിസ്റ്റർ ചെയ്തിട്ടുണ്ടെന്ന് അവർ വിശ്വസിപ്പിക്കും. 
* കൂടുതൽ ഭീതിപ്പെടുത്തുന്നതിനായി, അവർ നിങ്ങളെ അറസ്റ്റ് ചെയ്യുമെന്ന് ഭീഷണിപ്പെടുത്തുകയും ചെയ്യും.

* തട്ടിപ്പുകാർ പണം തട്ടിയെടുക്കാൻ ഉപയോഗിക്കുന്ന ഒരു സാധാരണ തന്ത്രമാണ് മാനസിക സമ്മർദ്ദം ചെലുത്തുക എന്നത്. ഇവർ ആധാർ നമ്പർ, ബാങ്ക് അക്കൗണ്ട് വിവരങ്ങൾ പോലുള്ള രഹസ്യ വിവരങ്ങൾ തട്ടിയെടുക്കാൻ ശ്രമിക്കും. ഇതിനായി ഭീഷണിപ്പെടുത്തുകയോ, അടിയന്തിര സാഹചര്യങ്ങൾ സൃഷ്ടിക്കുകയോ ചെയ്യും. 
* ഭയന്നുപോകുന്ന മിക്കവരും, വ്യക്തിപരമായ അല്ലെങ്കിൽ സാമ്പത്തിക അല്ലെങ്കിൽ ബാങ്കിംഗ് വിവരങ്ങൾ  പങ്കിടുകയും വ്യാജ കേസ് തീർപ്പാക്കാനും അറസ്റ്റ് ഒഴിവാക്കാനും ശ്രമിക്കുകയും ചെയ്യും.

എങ്ങനെ ജാഗ്രത പാലിക്കാം?

* നിങ്ങളുടെ വ്യക്തിഗത വിവരങ്ങളും സാമ്പത്തിക വിവരങ്ങളും സുരക്ഷിതമായി സൂക്ഷിക്കുക. അപരിചിതരായ ആളുകളോടോ സംഘടനകളോടോ ബാങ്ക് അക്കൗണ്ട് നമ്പർ, പാസ്‌വേഡുകൾ, അല്ലെങ്കിൽ മറ്റ് രഹസ്യ വിവരങ്ങൾ ഒരിക്കലും പങ്കിടരുത്. ഫോൺ കോൾ, വീഡിയോ കോൾ, മെസേജുകൾ അല്ലെങ്കിൽ ഇമെയിലുകൾ വഴി ആരെങ്കിലും വ്യക്തിഗത വിവരങ്ങൾ ചോദിച്ചാൽ ജാഗ്രത പാലിക്കുക.
*  കൊറിയർ സർവീസുകളുടെ പേരിൽ വരുന്ന അറിയിപ്പുകൾ കൈകാര്യം ചെയ്യുമ്പോൾ ജാഗ്രത പാലിക്കുക. നിങ്ങൾ ആവശ്യപ്പെടാത്ത കോളുകൾ, ഇമെയിലുകൾ അല്ലെങ്കിൽ ആപ്പ് നോട്ടിഫിക്കേഷനുകൾ ലഭിക്കുകയാണെങ്കിൽ സൂക്ഷിക്കുക. പ്രത്യേകിച്ചും, എസ്എംഎസ് അല്ലെങ്കിൽ ഇമെയിൽ വഴി അയച്ച ലിങ്കുകൾ തുറക്കുന്നതിനോ രേഖകൾ തുറക്കുന്നതിനോ മുമ്പ് അത് അയച്ചയാളെ പറ്റി ഉറപ്പു വരുത്തുക.

* സിബിഐ, പൊലീസ് അല്ലെങ്കിൽ മറ്റേതെങ്കിലും നിയമ നിർവഹണ ഉദ്യോഗസ്ഥരാണെന്ന വ്യാജേന വരുന്ന  കോളുകൾ സൂക്ഷിക്കുക. അടുത്തുള്ള പൊലീസ് സ്റ്റേഷൻ സന്ദർശിച്ച് നിങ്ങളുടെ പേരിൽ പരാതിയോ അറസ്റ്റ് വാറണ്ടോ ഉണ്ടോ എന്ന് ഉറപ്പുവരുത്തുക.
* തീരുമാനങ്ങൾ എടുക്കുന്നതിനു മുമ്പ് നന്നായി ആലോചിക്കുക എന്നതാണ് നല്ലത്. ധൃതി കൂട്ടിയുള്ള തീരുമാനങ്ങൾ പ്രശ്‌നങ്ങൾ ഉണ്ടാക്കാം. പ്രത്യേകിച്ചും പണം ഉൾപ്പെട്ട കാര്യങ്ങളിൽ, എല്ലാ വിവരങ്ങളും ശേഖരിച്ച് നന്നായി ചിന്തിച്ച ശേഷം മാത്രമേ തീരുമാനമെടുക്കാവൂ.
* ഇത്തരം തട്ടിപ്പ് സംഭവങ്ങൾ ഉണ്ടായാൽ ദേശീയ സൈബർക്രൈം ഹെൽപ്പ്ലൈനിൽ റിപ്പോർട്ട് ചെയ്യുക. 1930 ൽ വിളിക്കുക അല്ലെങ്കിൽ www(dot)cybercrime(dot)gov(dot)in ൽ റിപ്പോർട്ട് ചെയ്യുക.

മുന്നറിയിപ്പുമായി ഐഡിബിഐ ബാങ്ക് 

ബാങ്ക് ജീവനക്കാർ വ്യക്തിപരമായ വിവരങ്ങളോ സുരക്ഷാ വിശദാംശങ്ങളോ വെളിപ്പെടുത്താൻ ഒരിക്കലും ആവശ്യപ്പെടില്ലെന്ന് ഐഡിബിഐ ബാങ്ക് ഉപഭോക്താക്കൾക്ക് മുന്നറിയിപ്പ് നൽകി. എന്തെങ്കിലും സംശയമോ പ്രശ്‌നമോ ഉണ്ടായാൽ 1800-209-4324 അല്ലെങ്കിൽ 1800-22-1070 എന്നീ ടോൾ-ഫ്രീ നമ്പറുകളിൽ നിങ്ങൾക്ക് ഞങ്ങളെ ബന്ധപ്പെടാം. അല്ലെങ്കിൽ, 022-6771 9100 എന്ന നമ്പറിൽ നേരിട്ട് വിളിക്കുക.

#CourierScam #FraudAlert #SafetyTips #Cybercrime #PoliceVerification #StaySafe