ചെന്നൈ: (KVARTHA) തമിഴക വെട്രിക് കഴകത്തിന്റെ ആദ്യ സമ്മേളനത്തിൽ ഡിഎംകെയ്ക്കെതിരെ ആഞ്ഞടിച്ച് നടൻ വിജയ്. ഡിഎംകെ ഫാസിസം എന്ന് മാത്രം പറഞ്ഞു നടക്കുന്നുവെന്നും ദ്രാവിഡ മോഡൽ എന്ന് പറഞ്ഞ് ആളുകളെ പറ്റിക്കുന്നുവെന്നും അദ്ദേഹം വിമർശിച്ചു. ഒരു കുടുംബം തമിഴ് നാട് സംസ്ഥാനം കൊള്ളയടിക്കുന്നുവെന്ന ആരോപണവും അദ്ദേഹം ഉന്നയിച്ചു. 

ഒരു ജനവിരുദ്ധ സർക്കാരിനെ 'ദ്രാവിഡ മോഡൽ' സർക്കാരായി ഉയർത്തിക്കാട്ടുന്നു. അവർ നമ്മുടെ രാഷ്ട്രീയ ശത്രുക്കളാണ്. നിങ്ങൾ ബിജെപിയെ ഫാസിസം എന്ന് വിളിച്ച് വിമർശിക്കുന്നു, പക്ഷേ നിങ്ങൾ എന്താണ് ചെയ്യുന്നതെന്ന് ചോദിച്ച വിജയ് അവർ ഫാസിസം കാട്ടുമ്പോൾ നിങ്ങൾ പക്ഷപാതം കാട്ടുന്നുവെന്നും പറഞ്ഞു.

രാഷ്ട്രീയത്തിൽ തങ്ങൾ കുട്ടികളാണെന്ന് ആളുകൾ പറയുന്നു. പക്ഷേ, രാഷ്ട്രീയമെന്ന പാമ്പിനൊപ്പം ആത്മവിശ്വാസത്തോടെ കളിക്കുന്ന കുട്ടികളാണ് തങ്ങൾ. എല്ലാം മാറികൊണ്ടിരിക്കുന്ന ഈ കാലഘട്ടത്തിൽ, രാഷ്ട്രീയവും മാറേണ്ടത് അനിവാര്യമാണ്. ശാസ്ത്രവും സാങ്കേതികവിദ്യയും മാത്രം വളരുകയും പുരോഗമിക്കുകയും ചെയ്യണമെന്നില്ലല്ലോ? രാഷ്ട്രീയം മാറുകയും വികസിക്കുകയും ചെയ്യേണ്ടതല്ലേ? 

ഞാൻ മണിക്കൂറുകളോളം സംസാരിക്കുകയോ ചരിത്രം വിവരിക്കുകയോ സ്ഥിതിവിവരക്കണക്കുകൾ തട്ടിവിടുകയോ ചെയ്യില്ല.  പെരിയാർ ഞങ്ങളുടെ പ്രത്യയശാസ്ത്ര നേതാവാണ്, എന്നാൽ അദ്ദേഹത്തിൻ്റെ നിരീശ്വരവാദ നിലപാട് ഞങ്ങൾ സ്വീകരിക്കില്ല, ഞങ്ങൾ അതിനോട് യോജിക്കുകയുമില്ല. എന്നിരുന്നാലും, സ്ത്രീകളുടെ വിദ്യാഭ്യാസം, സമത്വം, സാമൂഹിക നീതി എന്നിവയെക്കുറിച്ചുള്ള പെരിയാറിൻ്റെ തത്വങ്ങൾ സ്വീകരിക്കും.

രാഷ്ട്രീയ നിലപാട് സ്വീകരിക്കുക എന്നത് പ്രധാനമാണ്. ഒരു നിലപാട് എടുക്കുമ്പോൾ നമ്മുടെ എതിരാളികൾ ആരാണെന്ന് സ്വയം തിരിച്ചറിയാൻ സാധിക്കും. വിഭജന രാഷ്ട്രീയത്തിനെതിരെയും അഴിമതി ശക്തികൾക്കെതിരെയും ഒരുപോലെ പോരാടുന്നു. ഛിദ്രശക്തികളെ തിരിച്ചറിയാൻ എളുപ്പമാണെങ്കിലും, പ്രത്യയശാസ്ത്രത്തിന്റെയും തത്വങ്ങളുടെയും മുഖംമൂടിക്ക് പിന്നിൽ ഒളിച്ചിരിക്കുന്ന അഴിമതി ശക്തികളെ തിരിച്ചറിയുക പ്രയാസകരമാണ്. ഇവിടെ ഭരിക്കുന്നവർ അഴിമതിക്കാരാണ്', ഡിഎംകെയെ പരോക്ഷമായി വിമർശിച്ച് വിജയ് കൂട്ടിച്ചേർത്തു.

ഈ നാടിനെ നശിപ്പിക്കുന്ന ഭിന്നിപ്പിന്റെ രാഷ്ട്രീയക്കാരാണ് ടിവികെയുടെ ഒന്നാം ശത്രു. ദ്രാവിഡ മോഡൽ എന്ന് പറഞ്ഞ് തമിഴ്നാടിനെ ചൂഷണം ചെയ്യുകയും തമിഴ്നാടിനെ കൊള്ളയടിക്കുകയും ചെയ്യുന്ന ഒരു കുടുംബമാണ് അടുത്ത ശത്രു. ടിവികെയുടെ പ്രത്യയശാസ്ത്രം മതേതര സാമൂഹ്യനീതി ആശയങ്ങളിൽ അധിഷ്ഠിതമാണെന്നും അതനുസരിച്ചായിരിക്കും പാർട്ടി പ്രവർത്തിക്കുകയെന്നും അദ്ദേഹം പറഞ്ഞു. ഭൂരിപക്ഷം നൽകി ടിവികെയെ ജനങ്ങൾ വിജയിപ്പിക്കുമെന്ന് ഉറപ്പുണ്ടെന്ന് പറഞ്ഞാണ് വിജയ് പ്രസംഗം അവസാനിപ്പിച്ചത്.

#Vijay #DMK #TamilNadu #Politics #SocialJustice #Criticism