ജീവൻ്റെ തുടിപ്പിന് സംരക്ഷണമേകാൻ മഞ്ചേരിയിൽ 'അമ്മത്തൊട്ടിൽ' തുറന്നു

മഞ്ചേരി: (KVARTHA) ഉപേക്ഷിക്കപ്പെടുന്ന കുഞ്ഞുങ്ങൾക്ക് താങ്ങും തണലുമായി മഞ്ചേരി മെഡിക്കൽ കോളേജിൽ നവീകരിച്ച 'അമ്മത്തൊട്ടിൽ' ഉദ്ഘാടനം ചെയ്തു. ബാലാവകാശ സംരക്ഷണ കമ്മീഷൻ ചെയർപേഴ്‌സൺ അഡ്വ. കെ.വി. മനോജ് കുമാറാണ് അമ്മത്തൊട്ടിൽ ഉദ്ഘാടനം ചെയ്തത്. 

വനിതാ ശിശു വികസന വകുപ്പ്, ശിശുക്ഷേമ സമിതി, ജില്ലാ ചൈൽഡ് വെൽഫെയർ കമ്മിറ്റി എന്നിവയുടെ സഹകരണത്തോടെ പാറമ്മൽ കുടുംബ കൂട്ടായ്മയാണ് ഇതിന് നേതൃത്വം നൽകിയത്.

കുട്ടികളുടെ അതിജീവനത്തിനുള്ള അവകാശമാണ് ഏറ്റവും പ്രധാനപ്പെട്ടതെന്ന് ഉദ്ഘാടന പ്രസംഗത്തിൽ അഡ്വ. കെ.വി. മനോജ് കുമാർ പറഞ്ഞു. അത് ആർക്കും നിഷേധിക്കാൻ കഴിയില്ല. ഓരോ കുട്ടിയും കുടുംബത്തിൻ്റെ സ്നേഹത്തിൽ വളരണം. അതിനായി പ്രവർത്തിക്കുക എന്നതാണ് ശിശുക്ഷേമ സമിതിയുടെ ലക്ഷ്യമെന്നും അദ്ദേഹം കൂട്ടിച്ചേർത്തു.

'സനാത ബാല്യം സംരക്ഷിത ബാല്യം' എന്ന മുദ്രാവാക്യത്തിൻ്റെ ഭാഗമായി സംസ്ഥാന ശിശുക്ഷേമ സമിതിയുടെ നേതൃത്വത്തിൽ നടപ്പാക്കുന്ന സാമൂഹിക പ്രതിബദ്ധതയുള്ള പദ്ധതിയാണ് 'അമ്മത്തൊട്ടിൽ'. ഇതുവരെ സംസ്ഥാനത്തുടനീളം 1050 കുട്ടികൾക്കാണ് അമ്മത്തൊട്ടിലിലൂടെ സംരക്ഷണം ലഭിച്ചത്.

എം.എൽ.എ അഡ്വ. യു.എ. ലത്തീഫ് അധ്യക്ഷത വഹിച്ച ചടങ്ങിൽ, സംസ്ഥാന ശിശുക്ഷേമ സമിതി ജനറൽ സെക്രട്ടറി അഡ്വ. അരുൺ ഗോപി, ജില്ലാ ചൈൽഡ് വെൽഫെയർ കമ്മിറ്റി ചെയർപേഴ്‌സൺ അഡ്വ. സുരേഷ്, ചൈൽഡ് വെൽഫെയർ കമ്മിറ്റി അംഗങ്ങളായ അഡ്വ. പി. ജാബിർ, സി. ഹേമലത, ശ്രീജ പുളിക്കൽ, ജില്ലാ ചൈൽഡ് പ്രൊട്ടക്ഷൻ ഓഫീസർ ഷാജിത ആറ്റശ്ശേരി, പാറമ്മൽ കുടുംബ കൂട്ടായ്മ അംഗം ഹമീദ് പാറമ്മൽ, മഞ്ചേരി ജനറൽ ആശുപത്രി സൂപ്രണ്ട് ഡോ. പ്രഭുദാസ്, ജില്ലാ ശിശുക്ഷേമ സമിതി സെക്രട്ടറി പി. സതീശൻ മാസ്റ്റർ എന്നിവരും പങ്കെടുത്തു.

ഈ വാർത്തയെക്കുറിച്ച് നിങ്ങളുടെ അഭിപ്രായം എന്താണ്? കമൻ്റ് ചെയ്യൂ, ഷെയർ ചെയ്യൂ.

Article Summary: Manjeri Medical College inaugurates a renovated 'Ammathottil' for abandoned babies.

#Manjeri, #Ammathottil, #KeralaNews, #ChildProtection, #ManjeriMedicalCollege, #ChildWelfare