ജയലക്ഷ്മി സില്‍ക്സ് തീപിടിത്തം: വസ്ത്രങ്ങൾ കുത്തിനിറച്ചത് വിനയായി; സുപ്രധാന റിപ്പോർട്ട് പുറത്ത്

കോഴിക്കോട്: (KVARTHA) പാളയം ജയലക്ഷ്മി സില്‍ക്സിലുണ്ടായ വന്‍ തീപിടിത്തത്തിൽ ജില്ലാ ഫയർ ഓഫീസറുടെ നിർണ്ണായക റിപ്പോർട്ട് പുറത്ത്. കെട്ടിടത്തിൽ വസ്ത്രങ്ങൾ എല്ലാം കുത്തിനിറച്ച നിലയിൽ ആയിരുന്നുവെന്നാണ് റിപ്പോര്‍ട്ടിലെ പ്രധാന കണ്ടെത്തല്‍. ഗോഡൗണിൽ അമിതമായി വസ്ത്രങ്ങൾ സൂക്ഷിച്ചിരുന്നു. അഗ്നി സുരക്ഷാ സംവിധാനം പ്രവർത്തിച്ചിട്ടും തീ അണയാതിരിക്കാൻ ഇത് കാരണമായെന്നും ജില്ലാ ഫയർ ഓഫീസറുടെ റിപ്പോർട്ടിൽ പറയുന്നു.

കുത്തിനിറച്ച വസ്ത്രങ്ങൾ

കെട്ടിടത്തിലെ അഗ്നി സുരക്ഷാ സംവിധാനങ്ങള്‍ കൃത്യമായി പ്രവര്‍ത്തിച്ചിരുന്നുവെന്നും എന്നാല്‍ പരിധിയിൽ കൂടുതൽ സ്റ്റോക്ക് സംഭരിച്ചതാണ് തീപിടിത്തത്തിന്‍റെ ആഘാതം കൂട്ടിയതെന്നുമാണ് റിപ്പോര്‍ട്ടില്‍ വ്യക്തമാക്കുന്നത്. ഗോഡൗണിൽ വസ്ത്രങ്ങൾ കുത്തിനിറച്ച നിലയിലായിരുന്നു. കഴിഞ്ഞ ദിവസം നടന്ന പ്രാഥമിക പരിശോധനയിൽ തീപിടിത്തത്തിന്റെ കൃത്യമായ കാരണം കണ്ടെത്താൻ കഴിഞ്ഞിരുന്നില്ല.

അന്വേഷണം പുരോഗമിക്കുന്നു

സംഭവത്തിൽ സ്ഥാപനത്തിന്‍റെ മാനേജര്‍ നൽകിയ പരാതിയില്‍ ടൗണ്‍ പൊലീസ് കേസെടുത്തിട്ടുണ്ട്. ജില്ലാ ഫയര്‍ ഓഫീസറും ഇലക്ട്രിക്കല്‍ ഇന്‍സ്പക്ടറേറ്റും കോര്‍പ്പറേഷനും വെവ്വേറെ അന്വേഷണമാണ് നടത്തുന്നത്. ഇലക്ട്രിക്കൽ ഇൻസ്‌പെക്ടറേറ്റിന്‍റെ വിദഗ്ധ പരിശോധനയും ഫോറൻസിക് പരിശോധനയും വ്യാഴാഴ്ച നടക്കും.

വ്യാപാരികളുടെ പ്രതിഷേധം

നഗരത്തിലെ തുടർച്ചയായ തീപിടിത്തത്തെ തുടർന്ന് പരാതിയുമായി വ്യാപാരി വ്യവസായി ഏകോപന സമിതി രംഗത്തെത്തി. നഗരത്തിൽ മതിയായ സുരക്ഷാ ക്രമീകരണങ്ങൾ ഇല്ലെന്നും മുൻപ് നൽകിയ ഉറപ്പുകൾ സർക്കാർ നടപ്പാക്കിയില്ലെന്നും അവർ ആരോപിച്ചു. നഗരത്തിലെ ഫയർ സ്റ്റേഷന് സ്വന്തമായി കെട്ടിടം പോലും ഇല്ലെന്നത് ഗൗരവകരമാണ്. മന്ത്രിമാരെ നേരിൽ കണ്ട് പരാതി നൽകാനാണ് തീരുമാനം.

മിഠായിത്തെരുവ് തീപിടിത്തതിന് പിന്നാലെ നൽകിയ ഒരു ഉറപ്പും പാലിക്കപ്പെട്ടില്ല. വ്യാപാരികൾ മാത്രമല്ല, നഗരവാസികളും സുരക്ഷാ ഭീഷണിയിലാണെന്ന് സംഘടന ചൂണ്ടിക്കാട്ടുന്നു. കഴിഞ്ഞ രണ്ട് പതിറ്റാണ്ടിനിടെ കോഴിക്കോട് നഗരത്തിൽ 40-ഓളം വലിയ തീപിടിത്തങ്ങളാണ് ഉണ്ടായത്.

തിരക്കേറിയ മിഠായിത്തെരുവിലും മെഡിക്കൽ കോളേജ് കെട്ടിടത്തിലും കളക്ടറേറ്റിലുമെല്ലാം തീ പടർന്നപ്പോൾ നടത്തിയ പ്രഖ്യാപനങ്ങൾ പലതും ജലരേഖയായി മാറിയെന്നാണ് പുതിയ സംഭവങ്ങളും തെളിയിക്കുന്നത്.

പുതിയ വാർത്തകൾ സമയബന്ധിതമായി അറിയാൻ ഞങ്ങളുടെ വാട്സ്ആപ്പ് ചാനൽ ഫോളോ ചെയ്യുക. ഈ വാർത്ത ഷെയർ ചെയ്യൂ. അഭിപ്രായം കമന്റായി രേഖപ്പെടുത്താനും മറക്കരുത്.

Article Summary: A report by the District Fire Officer reveals that overstocking of clothes at Jayalakshmi Silks hindered firefighting efforts. Traders protest against the lack of fire safety infrastructure in Kozhikode.

#Kozhikode #JayalakshmiSilks #FireAccident #SafetyReport #FireForce #KozhikodeTraders #KeralaNews #PublicSafety #KVARTHA