മദ്യപിച്ചുണ്ടായ തർക്കം കലാശിച്ചത് കൊലപാതകത്തിൽ; കുടിയാന്മലയിൽ യുവാവിനെ കഴുത്തറുത്ത് കൊന്ന കേസിൽ സഹോദരീഭർത്താവ് അറസ്റ്റിൽ

കണ്ണൂർ: (KVARTHA) കുടിയാന്മല പൊലീസ് സ്റ്റേഷൻ പരിധിയിലെ പൂപ്പറമ്പിൽ അതിഥി തൊഴിലാളിയെ കുളിമുറിയിൽ കഴുത്തറുത്ത് കൊന്ന സംഭവത്തിൽ സഹോദരീഭർത്താവ് അറസ്റ്റിൽ. ഒഡീഷ സ്വദേശിയായ ഫിലിപ്പ് (35) ആണ് കൊല്ലപ്പെട്ടത്. ഫിലിപ്പിൻ്റെ സഹോദരീഭർത്താവായ രമേഷാണ് കൊലപാതകം നടത്തിയതെന്ന് പൊലീസ് പറയുന്നു. ചൊവ്വാഴ്ച (ജൂലൈ 14) രാത്രി തന്നെ കസ്റ്റഡിയിലായ ഇയാളുടെ അറസ്റ്റ് പൊലീസ് രേഖപ്പെടുത്തി. മദ്യപാനവും കുടുംബപ്രശ്‌നങ്ങളുമാണ് കൊലപാതകത്തിന് കാരണമെന്നാണ് നാട്ടുകാർ പറയുന്നത്.

വിവരം പുറത്തറിയിച്ചത് സഹതൊഴിലാളി

ചൊവ്വാഴ്ച രാത്രി പത്ത് മണിയോടെയാണ് നാടിനെ നടുക്കിയ ഈ സംഭവം പുറത്തറിയുന്നത്. കൊല്ലപ്പെട്ട ഫിലിപ്പിനും പ്രതിയായ രമേഷിനുമൊപ്പം താമസിച്ചിരുന്ന മറ്റൊരു ഇതര സംസ്ഥാന തൊഴിലാളിയാണ് കൊലപാതക വിവരം നാട്ടുകാരോട് പറഞ്ഞത്. നാട്ടുകാർ വിവരമറിയിച്ചതിനെ തുടർന്ന് കുടിയാന്മല പൊലീസ് സ്റ്റേഷൻ പ്രിൻസിപ്പൽ എസ് ഐ ജോസ്, എസ് ഐമാരായ പ്രകാശൻ പടിക്കൽ, സുനിൽ എന്നിവരുടെ നേതൃത്വത്തിലുള്ള പൊലീസ് സംഘം സ്ഥലത്തെത്തിയാണ് പ്രതിയെ കസ്റ്റഡിയിലെടുത്തത്.

കെട്ടിട നിർമാണ തൊഴിലാളികൾ; ആയുധം കണ്ടെടുത്തു

കെട്ടിട നിർമാണ ജോലികൾക്കായി എത്തിയ തൊഴിലാളികളാണിവർ. വർഷങ്ങളായി പൂപ്പറമ്പിൽ വാടക കെട്ടിടത്തിലാണ് ഇവർ താമസിച്ചുവരുന്നത്. കൊലപാതകം നടത്താൻ പ്രതി ഉപയോഗിച്ച കത്തി പൊലീസ് ഇതിനോടകം കണ്ടെടുത്തിട്ടുണ്ട്. രമേഷ് കുറ്റം സമ്മതിച്ചതായും ഉദ്യോഗസ്ഥർ പറഞ്ഞു. പ്രതിയെ വിശദമായി ചോദ്യം ചെയ്തതിന് ശേഷം ബുധനാഴ്ച തന്നെ കോടതിയിൽ ഹാജരാക്കുമെന്ന് പൊലീസ് അറിയിച്ചു.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Kudiyanmala police arrested Ramesh for the murder of his brother-in-law Philip.

#KannurNews #KudiyanmalaPolice #CrimeNews #MigrantWorkerMurder #KeralaPolice #MalayalamNews #AnjanaNews