പണം നൽകാത്തതിൽ പ്രകോപനം; കണ്ണൂരിൽ ലഹരിക്ക് അടിമയായ യുവാവ് സ്വന്തം വീടിന് തീവെച്ച കേസിൽ അറസ്റ്റിൽ

കണ്ണൂർ: (KVARTHA) രക്ഷിതാക്കൾ ആവശ്യപ്പെട്ട പണം നൽകാത്തതിൽ പ്രകോപിതനായി സ്വന്തം വീടിന് തീവെച്ചെന്ന കേസിൽ യുവാവ് അറസ്റ്റിൽ. അഭിഷേക് (25) എന്നയാളെ ആണ് കണ്ണൂർ സിറ്റി പൊലീസ് ഇൻസ്പെക്ടർ ഇ കെ ഷിജുവും സംഘവും അറസ്റ്റ് ചെയ്തത്. ചൊവ്വാഴ്ച (ജൂലൈ 14) പുലർച്ചെ മൂന്ന് മണിയോടെയായിരുന്നു സംഭവം. ലഹരിക്ക് അടിമയായ മകനെ ഭയന്ന് വീട്ടിൽ താമസിക്കാത്തതുകൊണ്ടാണ് വൻ ദുരന്തം ഒഴിവായതെന്ന് പിതാവ് രാജേഷ് പൊലീസിനോട് പറഞ്ഞു.

മകനെ ഭയന്ന് മാതാപിതാക്കൾ; ഒഴിവായി ദുരന്തം

കണ്ണൂർ കോവിലകം ആയിക്കര ദണ്ഡമാരിയമ്മൻ കോവിലിന് സമീപത്തെ രാജേഷിൻ്റെ വീടിൻ്റെ കിടപ്പുമുറിയാണ് തീപിടിത്തത്തിൽ പൂർണമായും കത്തി നശിച്ചത്. വീട്ടിൽ ആളില്ലാത്ത സമയത്തായിരുന്നു അഭിഷേക് വീടിന് തീയിട്ടതെന്നാണ് പരാതി. വീടിന് തീവെച്ച കാര്യം അയൽവാസികളാണ് രാജേഷിനെ വിവരമറിയിച്ചത്. രാത്രികാലങ്ങളിൽ ടിവി കണ്ടുകൊണ്ടിരിക്കുമ്പോൾ തന്നെയും ഭാര്യയെയും അഭിഷേക് കൊല്ലുമെന്ന് ഭീഷണിപ്പെടുത്താറുണ്ടെന്നും പണം നൽകിയില്ലെങ്കിൽ തീവെക്കുമെന്ന് പരസ്യമായി പറഞ്ഞിരുന്നതായും രാജേഷ് പൊലീസിൽ നൽകിയ പരാതിയിൽ പറഞ്ഞിട്ടുണ്ട്. മകൻ ദിവസവും പണം ആവശ്യപ്പെടാറുണ്ടെന്നും ചോദിച്ച പണം കൊടുത്തില്ലെങ്കിൽ പ്രകോപനമുണ്ടാക്കാറുണ്ടെന്നും കുടുംബം പറയുന്നു.

കത്തിനശിച്ചത് ഫുട്ബോൾ ട്രോഫികളടക്കം; വൻ നഷ്ടം

തീപിടിത്തത്തിൽ വീട്ടിലെ കിടപ്പുമുറിയിലുണ്ടായിരുന്ന കിടക്ക, ഫർണിച്ചർ, ഫാൻ, വസ്ത്രങ്ങൾ, വയറിങ് എന്നിവയെല്ലാം പൂർണമായും കത്തി നശിച്ചു. വീട്ടിലുണ്ടായിരുന്ന പണവും നഷ്ടപ്പെട്ടതായി ഇദ്ദേഹം പറഞ്ഞു. മികച്ച ഫുട്ബോൾ കളിക്കാരനായിരുന്ന രാജേഷിന് ലഭിച്ച അംഗീകാരങ്ങൾ, ട്രോഫികൾ, സർട്ടിഫിക്കറ്റുകൾ എന്നിവയെല്ലാം അഗ്നിക്കിരയായി. ഏകദേശം മൂന്ന് ലക്ഷം രൂപയുടെ നഷ്ടമാണ് തീപിടിത്തത്തിലൂടെ കുടുംബത്തിന് ഉണ്ടായിട്ടുള്ളതെന്നാണ് പ്രാഥമിക നിഗമനം.

ലഹരി സംഘങ്ങളുടെ താവളം; ഫയർഫോഴ്സ് ഇടപെടൽ

100, 200 രൂപയൊക്കെ സാധാരണ അഭിഷേകിന് വട്ടച്ചെലവിന് കൊടുക്കാറുണ്ടെങ്കിലും, ഇത്തവണ 2000 രൂപ ചോദിച്ചപ്പോൾ അത് ലഹരി ഉപയോഗിക്കാനാണെന്ന് തോന്നിയതുകൊണ്ടാണ് നൽകാതിരുന്നതെന്ന് രാജേഷ് പറഞ്ഞു. മകനെ കാണാനും ലഹരി ഉപയോഗത്തിനായി കൂട്ടിക്കൊണ്ടുപോകാനും നിരവധി യുവാക്കൾ രാപകൽ ഭേദമില്ലാതെ വീട്ടിൽ എത്താറുണ്ടെന്നും പിതാവ് പറഞ്ഞു. പ്രദേശത്തെ വർധിച്ചുവരുന്ന ലഹരി ഉപയോഗത്തിൻ്റെ ഭീകരതയാണ് ഈ സംഭവം ചൂണ്ടിക്കാട്ടുന്നത്.

വിവരമറിഞ്ഞ് സ്ഥലത്തെത്തിയ കണ്ണൂർ അഗ്നിരക്ഷാ സേനാംഗങ്ങളാണ് തീയണച്ചത്. എസ് ടി ഒ ജി ബി ഫിലിപ്പ്, എസ് എഫ് ആർ ഒ ശ്രീകാന്ത് പവിത്രൻ, ഫയർമാൻമാരായ ടി കെ ശിവപ്രസാദ്, പി എം വൈശാഖ്, അശ്വിൻ, ഹോം ഗാർഡുമാരായ പ്രമോഷ്, നിജിൽ എന്നിവരാണ് രക്ഷാപ്രവർത്തനത്തിന് നേതൃത്വം നൽകിയത്.

കൂടുതൽ വാർത്തകൾ അറിയാൻ ഞങ്ങളുടെ വാട്സ്ആപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക്ക് പേജിൽ ഈ വാർത്തയുടെ പോസ്റ്റിന് താഴെ കമൻ്റായി രേഖപ്പെടുത്തുക.

Article Summary: Kannur police arrested a youth for allegedly setting his house on fire.

#KannurNews #KeralaPolice #DrugAbuse #CrimeNews #FireRescue #MalayalamNews #AnjanaNews