നിതിൻ രാജിൻ്റെ മരണം; കണ്ണൂരിൽ ഹർത്താൽ തുടരുന്നു; വാഹനങ്ങൾ തടയാൻ ശ്രമിച്ചവരെ നീക്കി പോലീസ്; പയ്യന്നൂരിൽ പ്രതിഷേധക്കാർ കസ്റ്റഡിയിൽ

കണ്ണൂർ: (KVARTHA) അഞ്ചരക്കണ്ടി മെഡിക്കൽ കോളജ് ബിഡിഎസ് വിദ്യാർഥി നിതിൻ രാജിൻ്റെ മരണത്തിന് കാരണക്കാരായവരെ നിയമത്തിന് മുന്നിൽ കൊണ്ടുവരണമെന്ന് ആവശ്യപ്പെട്ട് ദളിത് സംഘടനകൾ ആഹ്വാനം ചെയ്ത ഹർത്താൽ കണ്ണൂരിൽ തുടരുന്നു. 

2026 ഏപ്രിൽ 28 ചൊവ്വാഴ്ച രാവിലെ മുതൽ നടന്ന ഹർത്താലിൽ ജില്ലയിലെ നഗരപ്രദേശങ്ങളിൽ ജനജീവിതം മിക്കവാറും സാധാരണ നിലയിലായിരുന്നു. എന്നാൽ കണ്ണൂർ നഗരത്തിലും പയ്യന്നൂർ മേഖലയിലും വാഹനങ്ങൾ തടയാനും കടകൾ അടപ്പിക്കാനുമുള്ള ശ്രമങ്ങൾ ഹർത്താൽ അനുകൂലികളുടെ ഭാഗത്തുനിന്നുണ്ടായി.

കണ്ണൂർ നഗരത്തിലെ കാല് ടെക്സ് ജംഗ്ഷൻ ഉൾപ്പെടെയുള്ള തിരക്കേറിയ ഭാഗങ്ങളിൽ വാഹനങ്ങൾ തടയാൻ ശ്രമിച്ച പ്രതിഷേധക്കാരെ പോലീസ് ഇടപെട്ട് നീക്കം ചെയ്തു. ഗതാഗതം തടസ്സപ്പെടുത്താൻ അനുവദിക്കില്ലെന്ന നിലപാടിലായിരുന്നു പോലീസ്. ഇതേത്തുടർന്ന് പ്രതിഷേധക്കാരും പോലീസും തമ്മിൽ നേരിയ വാക്കേറ്റവുമുണ്ടായി. 

പയ്യന്നൂരിൽ കടകൾ നിർബന്ധപൂർവ്വം അടപ്പിക്കാൻ ഇറങ്ങിയ ഹർത്താൽ അനുകൂലികളെ പോലീസ് കസ്റ്റഡിയിലെടുത്തു. നഗരത്തിലെ കടകമ്പോളങ്ങൾ മിക്കയിടങ്ങളിലും സാധാരണ നിലയിൽ തുറന്ന് പ്രവർത്തിച്ചു.

ചേലേരി മുക്കിൽ ബസുകളും സ്വകാര്യ വാഹനങ്ങളുമടക്കം തടഞ്ഞ ദളിത് സംഘടന പ്രവർത്തകരെ പോലീസ് ബലപ്രയോഗത്തിലൂടെയാണ് നീക്കിയത്. ഇവിടെ ഗതാഗതം ദീർഘനേരം തടസ്സപ്പെട്ടതിനെത്തുടർന്ന് പോലീസ് ഇടപെടുകയായിരുന്നു. 

നിതിൻ രാജിൻ്റെ മരണത്തിൽ ഉന്നതതല അന്വേഷണം വേണമെന്നും കുറ്റവാളികളെ ഉടൻ അറസ്റ്റ് ചെയ്യണമെന്നും ആവശ്യപ്പെട്ടാണ് വിവിധ സംഘടനകൾ പ്രതിഷേധവുമായി രംഗത്തെത്തിയത്. പ്രധാന കേന്ദ്രങ്ങളിലെല്ലാം വൻ പോലീസ് സന്നാഹത്തെയാണ് സുരക്ഷയ്ക്കായി വിന്യസിച്ചിരിക്കുന്നത്.

അതേസമയം, ഹർത്താൽ ആഹ്വാനം ചെയ്‌തെങ്കിലും ഭൂരിഭാഗം വ്യാപാരികളും കടകൾ തുറക്കുമെന്ന് നേരത്തെ അറിയിച്ചിരുന്നു. നഗരത്തിൽ സ്വകാര്യ ബസുകൾ ഉൾപ്പെടെയുള്ള വാഹനങ്ങൾ സർവീസ് നടത്തുന്നുണ്ട്. സമരത്തിൻ്റെ ഭാഗമായി അനിഷ്ട സംഭവങ്ങൾ ഒഴിവാക്കാൻ പോലീസ് ജാഗ്രത തുടരുകയാണ്. വാഹനങ്ങൾ തടയുന്നവർക്കെതിരെ കർശന നടപടി സ്വീകരിക്കുമെന്ന് പോലീസ് അറിയിച്ചു.

ഹർത്താൽ സമരങ്ങൾ പൊതുജനങ്ങളെ ബുദ്ധിമുട്ടിക്കാതെ നടത്തുന്നതിനെക്കുറിച്ച് നിങ്ങളുടെ അഭിപ്രായമെന്താണ്? ഈ വാർത്ത സുഹൃത്തുക്കൾക്കായി ഷെയർ ചെയ്യൂ.

Article Summary: Dalit organizations held a hartal in Kannur seeking justice for Nithin Raj, with police intervention in Caltex, Payyanur, and Cheleri Mukku.

#KannurNews #HartalAlert #NithinRajCase #JusticeForNithin #KeralaPolice #DalitOrganizations #BreakingNews #TravelAlert #Ancharakandy #MalayalamNews