ഹലാൽ ബിസിനസിൻ്റെ പേരിൽ കോടികളുടെ നിക്ഷേപ തട്ടിപ്പ്; ഫിദ ഇൻവെസ്റ്റേഴ്സ് ഉടമകൾക്കെതിരെ മുഖ്യമന്ത്രിക്ക് പരാതി നൽകുമെന്ന് നിക്ഷേപകർ

കണ്ണൂർ: (KVARTHA) കണ്ണൂരിൽ വീണ്ടും കോടികളുടെ നിക്ഷേപ തട്ടിപ്പ്. ഫിദ ഇൻവെസ്റ്റേഴ്സ് കമ്പനി സിഇഒ അബ്ദുൽ ജലീൽ കുപ്പുരയിലും ഡയറക്ടർ ബോർഡ് അംഗങ്ങളും ചേർന്ന് പ്രവാസികൾ ഉൾപ്പെടെയുള്ള 300-ഓളം പേരെ സാമ്പത്തികമായി വഞ്ചിച്ചതായാണ് പരാതി. കാൻസർ രോഗികൾ അടക്കം തട്ടിപ്പിനിരയായവരിൽ ഉൾപ്പെടുന്നു. കണ്ണൂർ പ്രസ് ക്ലബ്ബിൽ നടത്തിയ വാർത്താസമ്മേളനത്തിൽ ഫിദ ഇൻവെസ്റ്റേഴ്സ് സംരക്ഷണ സമിതി ഭാരവാഹികളാണ് ഈ ആരോപണങ്ങൾ ഉന്നയിച്ചത്. സംസ്ഥാനത്തെ വിവിധ സ്ഥലങ്ങളിലെ സ്ഥാപനങ്ങൾ അടച്ചുപൂട്ടി പ്രതികൾ ഇതര സംസ്ഥാനങ്ങളിൽ ഭൂമി വാങ്ങിക്കൂട്ടിയതായും തുടർന്ന് മുങ്ങിയതായും നിക്ഷേപകർ ആരോപിച്ചു.

ഹലാൽ ബിസിനസിൻ്റെ പേരിൽ കബളിപ്പിച്ചു

ഭക്ഷ്യോൽപന്നങ്ങൾ ഉൾപ്പെടെയുള്ള വിവിധ കമ്പനികൾ തുടങ്ങുന്നുവെന്ന് പറഞ്ഞ് ഒരു ലക്ഷം മുതൽ ഒരു കോടി രൂപ വരെയാണ് ഓരോരുത്തരിൽ നിന്നും തട്ടിയെടുത്തത്. മതമേലധ്യക്ഷൻമാരെ മുൻനിർത്തി ഉദ്ഘാടനങ്ങൾ നടത്തി ഹലാൽ ബിസിനസ് സംരംഭങ്ങളാണെന്ന് പറഞ്ഞാണ് നിക്ഷേപങ്ങൾ സ്വീകരിച്ചത്. 

പത്രമാധ്യമങ്ങളിലും സമൂഹമാധ്യമങ്ങളിലും പരസ്യങ്ങൾ നൽകിയും വാർത്തകൾ നൽകിയും നിക്ഷേപകരെ വലയിലാക്കുകയായിരുന്നു. ആദ്യമൊക്കെ ലാഭവിഹിതം നൽകിയിരുന്നെങ്കിലും പിന്നീട് ഇത് മുടങ്ങുകയായിരുന്നു. കണ്ണൂർ പള്ളിക്കുളം പൊടിക്കുണ്ടിലാണ് ഫിദ ഫുഡ് ഇൻ്റർനാഷണൽ, ഫിദ ഗോൾഡ് തുടങ്ങിയവയുടെ ഹെഡ് ഓഫീസ് പ്രവർത്തിച്ചിരുന്നത്. കണ്ണൂർ ജില്ലയിലും മറ്റ് വിവിധ സ്ഥലങ്ങളിലും ഇവർക്ക് സ്ഥാപനങ്ങളുണ്ടായിരുന്നു.

നടത്തിപ്പുകാരും നിയമനടപടിയും

സിഇഒ അബ്ദുൽ ജലീൽ, എംഡി കോയക്കുട്ടി തങ്ങൾ, ഫായിസ്, റംഷാദ്, ആറ്റക്കോയ തങ്ങൾ, സൈനുൽ ആബിദ്, തസ്‌ലിം, മുഹമ്മദ് നമീർ തങ്ങൾ, നാസർ ബാഖവി എന്നിവരാണ് കമ്പനി നടത്തിപ്പുകാർ. ഫായിസ്, അബ്ദുൽ ജലീൽ കുപ്പുരയിൽ, നൂർഷാൻ എന്നിവരുടെ പേരിലാണ് കമ്പനി രജിസ്റ്റർ ചെയ്തിരിക്കുന്നത്. വളപട്ടണം, കണ്ണൂർ, കണ്ണപുരം പൊലീസ് സ്റ്റേഷനുകളിൽ പരാതി നൽകിയെങ്കിലും ഒന്നിൽ മാത്രമാണ് കേസെടുത്തത്. 

ഒരു പ്രമുഖ രാഷ്ട്രീയ പാർട്ടിയുമായി ബന്ധമുള്ളവരാണ് കുറ്റാരോപിതരെന്നും ഇവർക്കെതിരെ നിയമനടപടി ശക്തമാക്കണമെന്നും ആവശ്യപ്പെട്ട് മുഖ്യമന്ത്രി, ഡിജിപി എന്നിവർക്ക് പരാതി നൽകുമെന്ന് നിക്ഷേപകർ അറിയിച്ചു. അതേസമയം, ഇതുസംബന്ധിച്ച് കമ്പനി ഉടമകളുടെ പ്രതികരണം ലഭ്യമായിട്ടില്ല. നിക്ഷേപകരായ സിറാജ്, മുഹമ്മദ് കുഞ്ഞി, മുജീബ്, അബ്ദുൽ സലാം, ആഷിം എന്നിവർ വാർത്താസമ്മേളനത്തിൽ പങ്കെടുത്തു. 

ഈ വാർത്ത നിങ്ങളുടെ സുഹൃത്തുക്കൾക്കും വാട്സാപ്പ് ഗ്രൂപ്പുകളിലും ഷെയർ ചെയ്യുക. പുതിയ വാർത്തകളും വിശേഷങ്ങളും അറിയാൻ ഞങ്ങളുടെ വാട്സാപ്പ് ചാനലും ഫേസ്ബുക്ക് പേജും ഫോളോ ചെയ്യുക. നിങ്ങളുടെ അഭിപ്രായങ്ങൾ ഫേസ്ബുക് പോസ്റ്റിന് താഴെ കമൻ്റായി രേഖപ്പെടുത്താം

Article Summary: Around 300 people, including NRIs and cancer patients, were allegedly duped of crores by Kannur-based Fida Investors under the guise of halal businesses. The accused, including CEO Abdul Jaleel, allegedly closed the firm and bought land in other states. 

#Kvartha #KannurNews #InvestmentFraud #FidaInvestors #KeralaPolice #MalayalamNews #CrimeNews #ScamAlert #KannurUpdates #AmmuNews