തിരുവനന്തപുരം: (KVARTHA) കുട്ടികളുടെ വളര്‍ച്ചയെയും ആരോഗ്യത്തെയും പ്രതികൂലമായി ബാധിക്കുന്ന വിരബാധയെക്കുറിച്ച് ജാഗ്രത പാലിക്കണമെന്ന് ആരോഗ്യ മന്ത്രി വീണാ ജോര്‍ജ് അഭ്യര്‍ഥിച്ചു. ലോകാരോഗ്യ സംഘടനയുടെ കണക്കുകള്‍ പ്രകാരം ഇന്ത്യയിലെ ഒന്ന് മുതല്‍ 14 വയസ്സുവരെയുള്ള 64% കുട്ടികളില്‍ വിരബാധയുണ്ടാകാനുള്ള സാധ്യതയുണ്ട്. ഈ ഗുരുതരമായ പ്രശ്നത്തെ നേരിടാന്‍ സര്‍ക്കാര്‍ ശക്തമായ ഇടപെടലുകള്‍ നടത്തുന്നു.

എന്താണ് വിരബാധ?

വിരബാധ എല്ലാ പ്രായക്കാരെയും ബാധിക്കുമെങ്കിലും കുട്ടികളാണ് കൂടുതല്‍ ഇതിനിരയാകുന്നത്. മണ്ണില്‍ കളിക്കുക, പാദരക്ഷകള്‍ ഉപയോഗിക്കാതിരിക്കുക എന്നീ ശീലങ്ങള്‍ വിരബാധയ്ക്ക് കാരണമാകാം. ശരീരത്തിലെ പോഷകങ്ങള്‍ വിരകള്‍ വലിച്ചെടുക്കുന്നതിനാല്‍ കുട്ടികള്‍ക്ക് വളര്‍ച്ച മുരടിച്ചാല്‍, വിളര്‍ച്ച, ക്ഷീണം തുടങ്ങിയ പ്രശ്നങ്ങള്‍ ഉണ്ടാകാം.

സാധാരണ കുടലിലാണ് വിരകള്‍ കാണപ്പെടുന്നത്. ഉരുളന്‍ വിര (റൗണ്ട് വേം), കൊക്കൊപ്പുഴു (ഹുക്ക് വേം), കൃമി (പിന്‍ വേം), നാട വിര (ടേപ്പ് വേം) ചാട്ട വിര (വിപ്പ് വേം) എന്നിവയാണ് സാധാരണ കാണുന്ന വിരകള്‍.

വിരബാധയുടെ ലക്ഷണങ്ങള്‍

* ഉത്സാഹക്കുറവ്
* ക്ഷീണം
* വിളര്‍ച്ച
* വയറുവേദന
* തലകറക്കം
* ഛര്‍ദ്ദി
* പോഷകക്കുറവ്
* വിശപ്പില്ലായ്മ
* ഭാരക്കുറവ്
* ശ്രദ്ധക്കുറവ്
* വയറിളക്കം

കുട്ടികളില്‍ വിരകളുടെ തോത് വളരെ കൂടുതലാണെങ്കില്‍ കുടലിന്റെ പ്രവര്‍ത്തനം തടസപ്പെടാനും ശരിയായ ചികിത്സ യഥാസമയം ലഭ്യമായില്ലെങ്കില്‍ സങ്കീര്‍ണമാകാനും സാധ്യതയുണ്ട്.

വിരമുക്ത ദിനം

നവംബര്‍ 26ന് വിരമുക്ത ദിനമായി ആചരിക്കുന്നു. ഈ ദിവസം സ്‌കൂളുകളിലും അങ്കണവാടികളിലും എത്തുന്ന കുട്ടികള്‍ക്ക് വിരനശീകരണ ഗുളിക നല്‍കുന്നു. ഏതെങ്കിലും കാരണവശാല്‍ ഈ ദിവസം ഗുളിക കഴിക്കാന്‍ കഴിയാത്തവര്‍ക്ക് ഡിസംബര്‍ മൂന്നിന് ഗുളിക നല്‍കുമെന്ന് മന്ത്രി അറിയിച്ചു.

എങ്ങനെ കഴിക്കണം ഗുളിക?

* 1 മുതല്‍ 2 വയസ്സുവരെ അര ഗുളികയും 2 മുതല്‍ 19 വയസ്സുവരെ ഒരു ഗുളികയും നല്‍കണം.
* ചെറിയ കുട്ടികള്‍ക്ക് ഗുളിക തിളപ്പിച്ച വെള്ളത്തില്‍ അലിയിച്ചു കൊടുക്കാം.
* മുതിര്‍ന്ന കുട്ടികള്‍ ഉച്ചഭക്ഷണത്തിന് ശേഷം ഗുളിക ചവച്ചരച്ച് കഴിക്കണം.
* അസുഖമുള്ള കുട്ടികള്‍ക്ക് ഗുളിക നല്‍കരുത്.
* വിരബാധ കൂടുതലുളള കുട്ടികളില്‍ ഗുളിക കഴിക്കുമ്പോള്‍ അപൂര്‍വമായി വയറുവേദന, ഛര്‍ദ്ദി, ചൊറിച്ചില്‍, ശരീരത്തില്‍ തടിപ്പുകള്‍ തുടങ്ങിയവ ഉണ്ടായോക്കാം.

എന്തുകൊണ്ട് വിരനശീകരണം പ്രധാനം?

വിരബാധ കുട്ടികളുടെ ശാരീരികവും മാനസികവുമായ വളര്‍ച്ചയെ പ്രതികൂലമായി ബാധിക്കുന്നു. അതിനാല്‍ എല്ലാ കുട്ടികള്‍ക്കും വിരനശീകരണം അനിവാര്യമാണ്.

എങ്ങനെ തടയാം വിരബാധ?

* ശുചിത്വം പാലിക്കുക
* വൃത്തിയുള്ള ഭക്ഷണം കഴിക്കുക
* പാദരക്ഷകള്‍ ഉപയോഗിക്കുക
* മണ്ണില്‍ കളിക്കുന്നത് ഒഴിവാക്കുക

#worminfestation #childhealth #kerala #deworming #health