തൃശ്ശൂർ: (KVARTHA) നിപ രോഗബാധയെന്ന് സംശയത്തെ തുടർന്ന് 15 വയസ്സുകാരിയെ തൃശ്ശൂർ മെഡിക്കൽ കോളജിൽ പ്രവേശിപ്പിച്ചു. പെരിന്തൽമണ്ണ സ്വദേശിനിയായ കുട്ടിയെ വെള്ളിയാഴ്ച (19.07.2025) രാത്രിയാണ് മെഡിക്കൽ കോളജിലെ ഐസൊലേഷൻ വാർഡിൽ എത്തിച്ചത്. പരിശോധനാ ഫലം ലഭിച്ചതിന് ശേഷം തുടർനടപടികൾ സ്വീകരിക്കുമെന്ന് ആശുപത്രി അധികൃതർ അറിയിച്ചു.

സംസ്ഥാനത്ത് അടുത്തിടെ നാല് നിപ കേസുകൾ റിപ്പോർട്ട് ചെയ്തെങ്കിലും, നിപയുടെ കാര്യത്തിൽ ആശങ്കപ്പെടേണ്ട സാഹചര്യമില്ലെന്ന് ആരോഗ്യ മന്ത്രി വീണാ ജോർജ് തിരുവനന്തപുരത്ത് പ്രതികരിച്ചു. രോഗവ്യാപനം തടയാനുള്ള എല്ലാ നടപടികളും സ്വീകരിച്ചിട്ടുണ്ടെന്നും മന്ത്രി വ്യക്തമാക്കി.

മറ്റ് വിഷയങ്ങളിൽ മന്ത്രിയുടെ പ്രതികരണം

സംസ്ഥാനം ബാല സുരക്ഷിതമാക്കി മാറ്റുമെന്നും ബാല ഭിക്ഷാടനം ഒഴിവാക്കുമെന്നും മന്ത്രി പറഞ്ഞു. തേവലക്കരയിൽ 13 വയസ്സുകാരന് സുരക്ഷ ഉറപ്പുവരുത്തേണ്ടത് ഉത്തരവാദിത്തമല്ലേ എന്ന ചോദ്യത്തിന്, അത് വളരെ നിർഭാഗ്യകരമായ സംഭവമാണെന്നും അതാത് വകുപ്പുകൾ കാര്യങ്ങൾ വിശദീകരിച്ചിട്ടുണ്ടെന്നും മന്ത്രി മറുപടി നൽകി. ശ്രീചിത്ര ഹോമിലെ ആത്മഹത്യാശ്രമവുമായി ബന്ധപ്പെട്ട് ജില്ലാ കളക്ടറോട് റിപ്പോർട്ട് തേടിയിട്ടുണ്ടെന്നും, കളക്ടർ ചെയർപേഴ്സണായ മേൽനോട്ടസമിതിയാണ് ശ്രീചിത്ര ഹോമിലെ കുട്ടികളുടെ സുരക്ഷ ഉറപ്പുവരുത്തേണ്ടതെന്നും മന്ത്രി വിശദീകരിച്ചു. പ്രാഥമിക റിപ്പോർട്ട് ലഭിച്ചിട്ടുണ്ടെന്നും കുട്ടികൾക്ക് എല്ലാവിധ സംരക്ഷണവും ഒരുക്കുമെന്നും അവർ കൂട്ടിച്ചേർത്തു.
 

ഈ നിപ ജാഗ്രതാ വാർത്ത നിങ്ങളുടെ സുഹൃത്തുക്കളുമായി പങ്കുവെക്കുക.

Article Summary: 15-year-old admitted to Thrissur Medical College with suspected Nipah.

#Nipah #Thrissur #Kerala #HealthNews #VirusAlert #MedicalCollege