തിരുവനന്തപുരം: (KVARTHA) വാക്‌സിൻ സ്വീകരിച്ചിട്ടും പേവിഷബാധയേറ്റതിനെ തുടർന്ന് ഏഴ് വയസ്സുള്ള പെൺകുട്ടിയെ തിരുവനന്തപുരം എസ്.എ.ടി. ആശുപത്രിയിൽ പ്രവേശിപ്പിച്ചു. ഒരു മാസം മുൻപ് തെരുവ് നായയുടെ കടിയേറ്റ കൊല്ലം സ്വദേശിനിയാണ് ചികിത്സയിലുള്ളത്. വാക്‌സിൻ്റെ അവസാന ഡോസ് എടുക്കുന്നതിന് മുൻപ് കുട്ടിക്ക് പനി അനുഭവപ്പെട്ടിരുന്നു.

കൊല്ലത്ത് ചികിത്സയിലായിരുന്ന കുട്ടിയെ വെള്ളിയാഴ്ചയാണ് എസ്.എ.ടി. ആശുപത്രിയിൽ എത്തിച്ചത്. ഏപ്രിൽ എട്ടിന് ഉച്ചയോടെ വീടിൻ്റെ മുറ്റത്ത് കളിക്കുകയായിരുന്ന കുട്ടിയെ തെരുവ് നായ ആക്രമിക്കുകയായിരുന്നു. താറാവിനെ പിന്തുടർന്നെത്തിയ നായ കുട്ടിയെ കടിച്ചു. തുടർന്ന് ഡോക്ടർമാർ നിർദ്ദേശിച്ചതനുസരിച്ച് പേവിഷബാധക്കെതിരായ വാക്‌സിൻ ഉൾപ്പെടെയുള്ള ചികിത്സ നൽകിയിരുന്നതായി മാതാപിതാക്കൾ പറഞ്ഞു.

മൂന്ന് ഡോസ് വാക്‌സിൻ കുട്ടിക്ക് നൽകിയിരുന്നു. നാലാമത്തെ ഡോസ് എടുക്കുന്നതിന് മുൻപാണ് പനി ആരംഭിച്ചത്. മെയ് ആറിനായിരുന്നു അടുത്ത ഡോസ് നൽകേണ്ടിയിരുന്നത്. എന്നാൽ ഏപ്രിൽ 28ന് കുട്ടിക്ക് പനി വരുകയും തുടർന്ന് ആശുപത്രിയിൽ ചികിത്സ തേടുകയും ചെയ്തു. ഇതിനുശേഷമാണ് കുട്ടിക്ക് പേവിഷബാധ സ്ഥിരീകരിച്ചത്. മലപ്പുറത്ത് വാക്‌സിൻ സ്വീകരിച്ചിട്ടും പേവിഷബാധ മൂലം അഞ്ചര വയസ്സുകാരി മരിച്ചതിന് പിന്നാലെയാണ് കൊല്ലത്തും സമാനമായ സംഭവം റിപ്പോർട്ട് ചെയ്യുന്നത്.

വാക്‌സിൻ എടുത്തിട്ടും പേവിഷബാധയേറ്റ കുട്ടിയുടെ അവസ്ഥ ദയനീയമാണ്. നിങ്ങളുടെ അഭിപ്രായങ്ങളും പ്രതികരണങ്ങളും അറിയിക്കുക. 

Seven-year-old girl from Kollam has been hospitalized in Thiruvananthapuram with rabies despite receiving anti-rabies vaccinations following a street dog attack a month prior. She developed a fever before her final vaccine dose. This incident follows a similar case in Malappuram where a child died of rabies after vaccination, raising concerns about vaccine efficacy.

#Rabies, #VaccineFailure, #StreetDogAttack, #KeralaNews, #Thiruvananthapuram, #PublicHealth