പാലക്കാട്: (KVARTHA) ജില്ലയിൽ വീണ്ടും നിപ രോഗബാധ സ്ഥിരീകരിച്ചു. നിപ ബാധിച്ച് മരിച്ച വ്യക്തിയുടെ 32 വയസ്സുള്ള മകനാണ് പുതുതായി രോഗം സ്ഥിരീകരിച്ചിരിക്കുന്നത്. മഞ്ചേരി മെഡിക്കൽ കോളേജിൽ നടത്തിയ പരിശോധനയിലാണ് ഇദ്ദേഹത്തിന് നിപയുണ്ടെന്ന് വ്യക്തമായത്.

പാലക്കാട് നിപ രോഗം സ്ഥിരീകരിക്കുന്ന മൂന്നാമത്തെയാളാണ് ഈ 32-കാരൻ. ജില്ലയിൽ ആദ്യം നിപ സ്ഥിരീകരിച്ചത് ഒരു യുവതിക്കാണ്. അവർ ചികിത്സയിൽ കഴിയുന്നതിനിടെയാണ് 58 വയസ്സുകാരൻ നിപ രോഗം ബാധിച്ച് മരിച്ചത്. പ്രാഥമിക, ദ്വിതീയ സമ്പർക്കപ്പട്ടികകളിലായി ജില്ലയിൽ 347 പേർ നിലവിൽ നിരീക്ഷണത്തിൽ കഴിയുന്നുണ്ട്.

ഹൈ റിസ്ക് കാറ്റഗറിയിൽ നിരീക്ഷണത്തിലായിരുന്നു 32-കാരൻ. അച്ഛൻ അവശനായി ആശുപത്രിയിൽ കഴിഞ്ഞ സമയത്ത് ഇദ്ദേഹമായിരുന്നു ഒപ്പമുണ്ടായിരുന്നത്. നിലവിൽ പാലക്കാട് മെഡിക്കൽ കോളേജിലെ തീവ്രപരിചരണ വിഭാഗത്തിൽ ചികിത്സയിൽ കഴിയുകയാണ് ഇദ്ദേഹം. ആരോഗ്യനില സംബന്ധിച്ച് വ്യക്തമായ റിപ്പോർട്ട് ഇതുവരെ പുറത്തുവിട്ടിട്ടില്ല.

നിപ സ്ഥിരീകരിച്ച തച്ചനാട്ടുകര സ്വദേശിനി കോഴിക്കോട് മെഡിക്കൽ കോളേജിൽ ചികിത്സ തുടരുകയാണ്. മരിച്ച 58-കാരനായ കുമരംപുത്തൂർ സ്വദേശി ജോലി ചെയ്ത അട്ടപ്പാടി അഗളിയിലെ കള്ളമലയിലെ തോട്ടം കഴിഞ്ഞ ദിവസം വിദഗ്ധ സംഘം പരിശോധിച്ചു. നിയന്ത്രണമുള്ള മേഖലകളിൽ നിന്ന് 160 വവ്വാലുകളുടെ സാമ്പിളുകൾ പരിശോധനയ്ക്കായി അയച്ചിട്ടുണ്ട്. കുമരംപുത്തൂർ, കാരക്കുറിശ്ശി, കരിമ്പുഴ പഞ്ചായത്തുകളിലും മണ്ണാർക്കാട് മുനിസിപ്പാലിറ്റിയിലെ അഞ്ച് വാർഡുകളിലും നിയന്ത്രണങ്ങൾ തുടരുമെന്ന് അധികൃതർ അറിയിച്ചു.
 

പാലക്കാട്ടെ നിപ സാഹചര്യത്തെക്കുറിച്ച് നിങ്ങളുടെ ആശങ്കകൾ എന്തൊക്കെയാണ്? കമൻ്റ് ചെയ്യുക.

Article Summary: Nipah confirmed in Palakkad, son of deceased patient positive.

#Nipah #Palakkad #Kerala #HealthAlert #VirusOutbreak #PublicHealth