ന്യൂഡൽഹി: (KVARTHA) ജീവിതശൈലീ രോഗങ്ങളായ ഉയർന്ന രക്തസമ്മർദം (ഹൈപ്പർടെൻഷൻ), പ്രമേഹം, കാൻസർ തുടങ്ങിയവ വർധിച്ചു വരുന്ന സാഹചര്യത്തിൽ കേന്ദ്ര ആരോഗ്യ കുടുംബക്ഷേമ മന്ത്രാലയം രാജ്യവ്യാപകമായി സൗജന്യ  സ്ക്രീനിംഗ് ഡ്രൈവ്‌ പ്രഖ്യാപിച്ചു. ഫെബ്രുവരി 20 മുതൽ മാർച്ച് 31 വരെയാണ് ഡ്രൈവ് നടക്കുക. 30 വയസിന് മുകളിലുള്ള വ്യക്തികൾ അടുത്തുള്ള സർക്കാർ ആരോഗ്യ കേന്ദ്രത്തിൽ പരിശോധന നടത്തണമെന്ന് മന്ത്രാലയം അറിയിച്ചു.

എല്ലാ സർക്കാർ ആരോഗ്യ കേന്ദ്രങ്ങളിലും രക്താതിമർദ്ദം, പ്രമേഹം, ഓറൽ, സ്തന, സെർവിക്കൽ കാൻസർ എന്നിവയ്ക്കുള്ള പ്രത്യേക സ്ക്രീനിംഗ് ഡ്രൈവ് നടത്തുമെന്നും മന്ത്രാലയം എക്‌സിൽ പങ്കുവെച്ച പോസ്റ്റിൽ  വ്യക്തമാക്കി. പ്രമേഹത്തിന്റെ അവഗണിക്കരുതാത്ത ലക്ഷണങ്ങളും മന്ത്രാലയം ഇൻഫോഗ്രാഫിക്സിലൂടെ പങ്കുവെച്ചു. കാഴ്ച മങ്ങൽ, വിശപ്പ് വർധിക്കുക, മുറിവുകൾ ഉണങ്ങാൻ താമസം, ക്ഷീണം, നിരന്തരമായ ദാഹം, പെട്ടെന്നുള്ള ശരീരഭാരം കുറയൽ, ഇടയ്ക്കിടെ മൂത്രമൊഴിക്കുക എന്നിവ പ്രമേഹത്തിന്റെ ലക്ഷണങ്ങളിൽ ചിലതാണെന്നും പ്രമേഹത്തിന്റെ ഈ ലക്ഷണങ്ങൾ അവഗണിക്കരുതെന്നും മന്ത്രാലയം മുന്നറിയിപ്പ് നൽകി.

രാജ്യത്ത് ജീവിതശൈലീ രോഗങ്ങൾ ഗണ്യമായി വർധിക്കുന്ന സാഹചര്യത്തിലാണ് ഈ സ്ക്രീനിംഗ് ഡ്രൈവ്. ഇന്ത്യൻ കൗൺസിൽ ഓഫ് മെഡിക്കൽ റിസർച്ച്-നാഷണൽ ഇൻസ്റ്റിറ്റ്യൂട്ട് ഓഫ് ന്യൂട്രീഷൻ (ICMR-NIN) ഡാറ്റ പ്രകാരം, രാജ്യത്തെ മൊത്തം മരണങ്ങളിൽ 66 ശതമാനവും ജീവിതശൈലീ രോഗങ്ങൾ കാരണമാണ്.  ഹൃദയ സംബന്ധമായ രോഗങ്ങൾ, പ്രമേഹം, വിട്ടുമാറാത്ത ശ്വാസകോശ രോഗങ്ങൾ, കാൻസർ എന്നിവ ഒരു പ്രധാന പൊതുജനാരോഗ്യ വെല്ലുവിളിയായി മാറിയിരിക്കുകയാണ്. പ്രത്യേകിച്ചും 30 വയസ്സിന് മുകളിലുള്ളവരാണ് കൂടുതലും ഇരയാകുന്നത്.  

വികസിത രാജ്യങ്ങളെ അപേക്ഷിച്ച്, ഇന്ത്യയിൽ ഈ രോഗങ്ങൾ വളരെ ചെറുപ്പത്തിൽ തന്നെ കണ്ടുവരുന്നു എന്നത് ആശങ്കയുണ്ടാക്കുന്നു. രോഗബാധിതരായ ഇന്ത്യക്കാരിൽ മൂന്നിൽ രണ്ട് പേരും 26-59 വയസിനിടയിലുള്ളവരാണ്. അവരുടെ ജീവിതത്തിലെ ഏറ്റവും നിർണായകമായ വർഷങ്ങളിലാണ് രോഗങ്ങൾ കണ്ടുവരുന്നത് എന്നതാണ് പ്രധാനം. ഇതിന് പ്രധാന കാരണം അനാരോഗ്യകരമായ ഭക്ഷണരീതിയും മറ്റ് ജീവിതശൈലീ രീതികളുമാണ്. ഐസിഎംആർ-എൻഐഎൻ  അടുത്തിടെ നടത്തിയ  ഒരു പഠനത്തിൽ രോഗബാധയുടെ 56 ശതമാനവും അനാരോഗ്യകരമായ ഭക്ഷണം മൂലമാണെന്ന്  ചൂണ്ടിക്കാണിക്കുന്നു.

കഴിഞ്ഞ ദിവസം  ഡെറാഡൂണിൽ നടന്ന 38-ാമത് ദേശീയ ഗെയിംസിൽ കായികതാരങ്ങളെയും മറ്റ് പ്രതിനിധികളെയും അഭിസംബോധന ചെയ്ത പ്രധാനമന്ത്രി നരേന്ദ്ര മോദി, ആരോഗ്യകരമായ മനസ്സിന് ആരോഗ്യകരമായ ശരീരം അത്യന്താപേക്ഷിതമാണെന്നും അത്  ആരോഗ്യകരമായ രാഷ്ട്രത്തിലേക്ക് നയിക്കുമെന്നും  ഊന്നിപ്പറഞ്ഞു. ഫിറ്റ് ഇന്ത്യ കാംപയിനെ കുറിച്ച് സംസാരിച്ച അദ്ദേഹം വ്യായാമത്തിന്റെയും ഭക്ഷണക്രമത്തിന്റെയും പ്രാധാന്യത്തെക്കുറിച്ചും  ആരോഗ്യകരമായ  ഭക്ഷണം  കഴിക്കേണ്ടതിനെക്കുറിച്ചും ഓർമിപ്പിച്ചു. ആഹാരത്തിൽ  അനാവശ്യമായ കൊഴുപ്പും എണ്ണയും കുറയ്ക്കേണ്ടതിൻ്റെ  പ്രാധാന്യം  ചൂണ്ടിക്കാട്ടിയ അദ്ദേഹം,  ദിവസേനയുള്ള എണ്ണയുടെ ഉപഭോഗം 10 ശതമാനം കുറയ്ക്കാൻ നിർദേശിച്ചു.

ഈ പ്രധാന വാർത്ത പങ്കുവെക്കുക, നിങ്ങളുടെ അഭിപ്രായങ്ങൾ രേഖപ്പെടുത്തുക.

The Ministry of Health and Family Welfare has announced a nationwide free screening drive for lifestyle diseases like hypertension, diabetes, and cancer. The drive will be held from February 20 to March 31 and is open to individuals above 30 years of age. The initiative aims to detect these diseases early and promote healthy lifestyles.

#HealthScreening #LifestyleDiseases #Diabetes #Hypertension #Cancer #HealthIndia